رد : متزوجون ومتزوجات.. الى اي حد يبلغ الاستغلال
اقتباس:
المشاركة الأصلية كتبت بواسطة أم سلطان1
طبعا الإستغلال المادي هو ابشع صفة يتصف بها الشخص سوى زوج او زوجه مثلا هناك ازواج يستغلون زوجاتهم الموظفات تلاقيهم اما يستغلونهم في الصرف على البيت وعلى الأطفال او انه يحملها اقساط سيارات وعقارات وهو المستفيد منها او انه يتسلف ويماطل بحقوق الناس وزوجته هي اللي تدفع عنه ديونه هذا استغلال سيئ والله يعن الزوجات اللي ابتليوا بمثل هالأزواج
بالنسبة لإستغلال الزوجات لأزواجهم ماديا مافيه غير سببين واحد منها مهم جدا يخلي الزوجة تستغل زوجها ماديا وبقوله بس اخشى البنات يشنون عليه هجوم ويزعلون من كلامي والسبب الثاني وهي مجارة الناس بكل ماهب ودب يعني تلاقي الوحدة تبهذل بزوجها الين تخليه على الحديدة وهي تبغى تواكب العصر وكل همها الكماليات ما عمرها تفكر بالضروريات مثل شراء مسكن او ارض او يجمعون لهم مبلغ يفيدهم وقت حاجتهم او انها تصرف الفلوس في شئ مفيد ويعود عليهم بمصلحة او منفعه لا تلاقيها تخلي زوجها يدفع الوف في الكماليات بينما إيجار الشقة ما دفعه ويمكن انها تصمم على فستان او غرض قيمته تساوي ايجار البيت اللي هي فيه وتلبسه مرة وحدة وترميه والشهر اللي بعده تتراكم عليه الإيجارات والديون والأقساط ويضطر انه يتسلف ويسدد ولو ما لقى احد يسلفه الله يعينه يدخل السجن والزوجة هاذي لو سمح الله وطلعت جاحدة فوق استغلالها له بعد مايدخل السجن تقوم تطالبه بالطلاق وهو اللي ورط نفسه بالديون يستاهل ما حصل طيب هذا الزوج مسكين تورط علشانها وبهذل نفسه علشان يرضيها وفي النهاية إما انها تطلب الطلاق منه او إنها تعيش معاه حياتها وهي تتذمر وتدعوا الويل والثبور وان الله بلاها بالزوج هذا الفقير الحافي المنتف طيب بسبب من وصل به الحال مو علشانها هي
طبعا هذا النوع من الصنفين انا امقته
بالنسبة لباقي الأمور بين الأزواج انا ما اعتبرها استغلال بقدر ماهي تعاون بينهم وانهم مكملين لبعضهم البعض وإذا كانوا متفاهمين اكثر بيتعاونون اكثر
طبعا بالنسبة لي شخصيا انا في بيتي اسوي كل شئ اقدر عليه ولا اعتبره استغلال فيه اشياء اقوم بها في البيت غير شغل البيت ومسؤلية الأطفال مثلا اركب افياش الكهرباء والمصابيح لو احترقن وكمان اجيد تركيب كوالين الأبواب وبعض الأدوات اللي تحتاج تغيير مثل صنابير الماء والحمدالله اضبطها بنفسي عندي معدات واشيل واركب والقطعه اللي ناقصتني ارسل لها يجيبونها لي واركبها في بيتي بالرغم من تحذيرات زوجي من الكهرباء وكمان اوقات ارسل معاه في القطع اللي تحتاج تغير اتفاجئ فيه جايب معاه العامل اللي يصلح الأشياء التالفة ولما اقول له ليش انا اضبطهة ووفر فلوس العامل يقول لا خلاص خليه يضبطها العامل واعطيه اجرة ويروح هذا خطير ومتعب عليك لاكن انا الصراحة انقهر لما العامل يجيبه يفك ويركب القطعه ويطلب مبلغ 50 ريال او 100 ريال والقطعه قيمتها ما تتجاوز عشرين ريال احس انه استغلال من العاملين لخلق الله وانا موجودة واركبها لوحدي واوفر عليه الفلوس اللي بيدفعها للعامل لاكن الحمدالله الحين ابتدى زوجي يتعلم في مجال الكهرباء والسباكة على خفيف يضبط فيها اللي يعرفه بس الله يستر لا يصعقه الكهرب ويروح في خبر كانا لاسمح الله لأنه اغلب شغلته في دينمو الموية اللي تابعة للخزان الأرضي اللي بالعمارة
واعرف وحدة جارة لي والله حتى بيتها هي اللي تدهنه بالدهان وتسوي له تعتيق وما شاء الله عليها مايفوتها شئ بسوالف السراميك والتبليط والدهان والتعتيق
طبعا شفت بأم عيني عندنا بالبادية في البر نساء يسوقون السيارات ويجلبون الماء والحطب لمنازلهم على السيارات ويرعون ابلهم واغنامهم واتعجب من صنعهم بالرغم من وجود الرجال في بيوتهم ياترى وش وضيفتهم هالرجال اللي موجودين عند هائولاء النساء اكثر من مرة نكشت للبر واشاهد الكثير من النساء يقومون بتلك الأعمال ولما تقترب من بيوتهم وخيامهم تشاهد الرجل عند دلال القهوة والنار شابه والبنت توقف وايت الماء وإلا سيارة الشاص التويوتا وتنزل الحطب ولا تلاقيها سارحة بالحلال في البر
والرجل في الخيمة جالس ماعنده لا شغل ولا مشغله طبعا مو كلهم لاكن الغالبية معتمدين على النساء في كل شئ اتكلم عن اللي يقطنون في البادية واتوقع انه الكثير من الناس يلاحظون هالشيئ في البادية تجد المرأة عليها الحمل الأكثر والأكبر وتعيش ادوار غير ادوارها المطلوبة منها وتقوم بأعمال شاقة ومتعبة وغير مناسبة لتكوينها الجسماني
طبعا ولكل مجتمع عادات وتقاليد وثقافات تختلف عن بعضها البعض ويصبح فيها اتكالية واستغلال بين الطرفين النساء والرجال الأزواج والزوجات
والله يعين النساء لو سمح الله ووافقوا على قيادة المرأة لسيارة شكل الزوجة تروح مشاويرها بنفسها وهو في البيت جالس يتصل ام فلان مري السوبر جيبي لي معاك كود رد بايسن ولا مالبورو ولا تنسين مري المطعم الفلاني جيبي معاك العشاء قبل ما المبارة تبتدي لا تتأخرين بسرعة وهلما جرى يكرها داخل البيت وخارج البيت مسكينه حتى يجننها وهوجالس بالبيت ويتشرط
وكل ماجاء لزوجات المبتليات بالأزواج الغير مبالين والإستغلالين والإتكالين إلا وبلاويهم ومصايبهم تزيد وربنا يكون في عونهم
ويصلح كل زوج استغلالي اتكالي غير مبالي ويهديه لزوجته واهل بيته
موضوع جميل ورائع بارك الله فيك اخي الفاضل مشكلته زوجته
ونسأل الله انه تكون سعادتك زوجتك يارب ويوفقكم في حياتكم بإذن الله تعالى
واحب اشيد بمشاركة الأخ الفاضل حمد البي بو مشاركاته رائعه وجميلة وقيمة بارك الله فيه وجزاه الله خير الجزاء ونفع به اخوانه واخواته في المنتدى الراقي .
|
ماشالله تبارك الله يا ام سلطان
اجل يعتمد عليك في البيت حتى في الاعمال اللي المفترض يقوم فيها العامل
والله انك سنعه
بس اتوقع هالسنع جاي من ثقة وليس من قلة حيلة ..
وهذا هو التعاون بين الازواج
ولكن حين تكون الحياة فيها طرف يعمل بقلب واخر يستغل هذا المجهود في سبيل نفسه واهواءه فان هذا هو الغبن بعينه
النموذج الذي قلتيه في اعتماد بعض الرجال على نسائهم موجود ايضاً في افريقيا بشكل موسع بالذات وسط افريقيا وما دونها
وهو عرف لديهم.. فالرجال ينامون في البيت والنساء هن من يعملن..!! الله يستر لا ينتشر هذا النموذج عندنا.!!
