وعليكم السلام ورحمة الله وبركاته

اهلين بالعسولة ملكة يسعدلي صباحك وصباح أحبابك⚘⚘⚘⚘

ماما ربي يطول بعمرها وبعمر امهاتكن اتعلمت منها التخطيط و الادارة والمسؤولية

كانت ما تقلي اعملي هيك وساوي هيك لا بل كانت تحكي بشكل عام كيف بابا معتمد عليها
وهيي كيف بتتصرف وكيف لازم المرأة تكون بتعرف تحافظ على بيتها من الناحية المادية وباقي النواحي

كنت مرات قول عنها قاسية وبابا الحنون
بس من بعد ما صرت أم ومريت بظروف بالحياة عرفت انها ما كانت تقسى بس كانت تتحمل و تمر بظروف ان كانت ماادية اوغيرها من دون ما تخبرنا
وكان عندها ادارة وميزانية ما بتقدر تتخطاهن وظروف اقوى منها كرمال هيك كنت شوفها قاسية وإلجأ لبابا لاحصل عاللي بدي ياه واعرف ما بيقدر يقول لاء




ماخدة من ماما العصبية بالوراثة😄😄😄😄😄😄😄😄😄😄
وبنفس الوقت طيبة القلب 😊😊😊😊😊


اتعلمت منها انو نحترم اللي اكبر مننا واللي اصغر واهم شغلة اتعلمتها منها وعم علمها لاولادي انو ما بتسمح يصير في نميمة ولا بتسمحلنا
بالعكس في عقاب اذا ولد اجا بدو يخبرها شي سمعه فما كانت تفتح مجال لنقل الكلام




في اشيا كتير بتصرفها بتقلي انت متلي ان كان بتربايتي لاولادي او بوجهات نظري
او من انا وصغيرة على سبيل المثال كنت حب حط خضرة عالسفرة بالوان مختلفة ودايما تردد انت متلي انا هيك كنت وانت طالعتلي

في اشياء كتير بحب اللي بتحبه
ومع كل هيدا كنت حس انو مش متفقين ولا قراب من بعض
ما بعرف اذا فرق العمر بيناتنا الصغير كان السبب
او لانها عانت بحياتها وحملت مسؤولية بعمر صغير كتير وما كان بدها ياني مر بنفس الظروف
لبعدين فهمت متأخرة انو كل شي كانت عم تقوله لصالحنا وانا فسره منها قساوة

مع انها كانت تقلي بس تكبري بتعرفي اللي عم اعمله لصالحكن






اتعلمت منها انو ما خبي شي وانو ما في شي لازم يكون مخبى و خاف منو
مثلا كانت اذا عاقبتنا او مرت بأيحدث كانت تخبر بابا وتخليه يسمع منها قبل ما يسمع من غيرها
كانت صريحة بكل شي بيخص البيت من دون ما يسأل
وأنا نفس الشي مع زوجي اي شي بيخص حياتنا مع بعض عالمكشوف
وشو ما يصير معي مواقف ان كان خارج البيت او على سبيل المثال عبر وسائل التواصل و اي شي مشتركة فيه بالعالم الافتراضي بيعرف مني من دون ما يسألني فصار لا بيسأل ولا بيمنعني من شي


ياااي شو صرت حاكية خلص بيكفي هالقد هههههه

مشكورة حبيبتي عالموضوع الحلو متلك ⚘⚘⚘⚘⚘⚘⚘⚘⚘

__________________





اللهم إني أستودعك ديني و نفسي وأهلي وزوجي
وأولادي وأحبتي فاحفظهم يا من لا تضيع ودائعه