رد: إتهام زوجي بأني السبب بالا
اقتباس:
المشاركة الأصلية كتبت بواسطة سموره ☆
مشكوره حبيبتي مهره ... مو قادره اوقف تفكير ... حاسه بتأنيب ضمير عشان عمي .. خجلانه كثير باللي صار ... مو ندمانه لاني من زمان ابي اعطيه درس ... بس خايفه اني غلطت باللي سويته امس ... حتى كل ماتذكر وربي قلبي يعورني على منظر عمي وزوجته ... وخجلانه من اخو زوجي وعمي لما وصلوني 4 ساعات رايحين و4 راجعين ... متفشله .. وفوق هذا تو ارسل لي انه قد كلمته ومارح يحصل لي بسبب اللي صار امس .. أحاول انسى واقول كله خيره من ربي ... بس مدري شلون ... الحين قاعده أحاول اقنع نفسي اني على صح ... ودي اقول لامي على اللي صار بس وعدت عمي اني مابقول لأهلي ... ولا أنا ودي افضفض لها من الليل عشان ارتاح ..
|
أكيد الموقف اللي صار مب حلو .. بس مثل ما قالت بنت طيبة اللي صار غصب عنج .. وإنتي ما كنتي مخططة ولا ناوية تتكلمين جدام عمج .. ولو إن زوجج ما صغّر عقله كان ما رحتي لعمج ولا قلتي اللي قلتيه.
أنا مريت بالإجهاض مرتين .. وعارفة شو يعني فقدان جنين .. صح نقول الأم لازم تكون متماسكة وتستعوض الله في اللي راح لكن نفسية الوحدة تكون سيئة وتحتاج ولو شوية مراعاة ودعم معنوي على الأقل .. وبدل ما زوجج يقدر هالظرف قام يتصرف بطريقة طفولية وخالية من المسؤولية .. وإلا محد يقول لوحدة توها طالعة من حالة إجهاض وفقدان جنين اطلعي عند أهلي وإلا باقول لهم إنج مب مرتاحة عندهم! .. عيب هالتصرف ترا وما فيه أي تقدير.
بخصوص عمج ما أعتقد إنه متضايق منج .. لكن إذا كنتي لازلتي خجلانة منه كلميه واعتذري منه .. وقولي له إنج ما كنتي حابة إنه يشوف مثل هالموقف السيء .. لكن زوجج للأسف ما ترك لج خيار أفضل.
وبخصوص أمج فأنا فاهمة شكثر إنتي محتاجة لحضنها واحتواءها .. لكن ما أدري كلامج معاها هل ممكن يكبّر المشكلة أو لا .. وهل ممكن تسمع منج ويتم الكلام بينج وبينها وإلا ممكن تروح تقول لإخوانج والموضوع يكبر .. فانتي استخيري حبيبتي وأخري هالجزئية شوي على قدر استطاعتج وتحملج.
أما زوجج فمب إنتي اللي صغّرتيه .. هو اللي صغّر نفسه بتصرفاته الطفولية .. وبالنسبة لتهديداته فلا تردين عليها أبداً .. لا تسألينه على شو ناوي مثلاً؟ .. ولا حتى تقولين له: ما يهمني وسوي اللي تباه ...... تجاهلي هالجزئية تماماً تماماً ولا تردين بأي كلمة عليها.
__________________
اللهم طِيبَ الأثر .. وحُسْنَ الرحيل.
التعديل الأخير تم بواسطة مهره ; 19-05-2017 الساعة 06:07 PM