بنتك بالإبتدائي .. يعني فاتت عليك المدرسة الي بقولها .. لكن بما إن الموضوع بيكون مرجع بقولكم عن مدارس:

روض الجنان

مدارس أهلية
رسومهم في السنة 8000تقريبا ..

نظامهم رياض أطفال قبل الإبتدائي 3سنوات ..
يدرس الطفل القرآن والحديث ويحفظ منظومة ماأدري وش اسمها ويتعلم الأخلاق وغيرها ..
أسلوبهم تربوي جدا جدا جدا ..
أحلى شي في الموضوع إن الطفل يطلع من رياض الأطفال وهو حافظ






































6 أجزاء من القرآن الكريم حفظا متقنا مع التفسير المبسط ..

قولوا ماشاء الله تبارك الله ..

الأولاد لما يكملون رياض الأطفال يطلعون لأي مدرسة ثانية ،، أما البنات يكملون عندهم الإبتدائي ..

يختمون القرآن في رابع ابتدائي ويراجعونه في خامس وسادس ..

طبعا لاتسأل عن الطفل بعد كل هذا !

يطلع من عندهم وهو طفل مختلف تماما عن بقية أقرانه ..

ذكي .. وتفكيره نظيف .. ولماح .. وذاكرته قوية .. وخلوق .. ومؤدب .. شخصيته بُنيت على أساس صلب ..
محبّ لله ولرسوله صلى الله عليه وسلم حب شديد شديد ،، يكفي إنك تقوله إن الله يحب كذا أو الرسول أمر بكذا وتلاقيه ينفذ بسرعة ويقناعة تااااااااامة ..

من ضمن الأمور المميزة في الخطة الدراسية الأسبوعية خانة اسمها الشاهد التربوي: عبارة عن آية أو حديث من ضمن الي تعلموهم أثناء الأسبوع تكون تتحدث عن خلق معين أو نهي عن سلوك قبيح ،، تركز عليها الأستاذة وتفهمهم تفسيرها وتذكر مواقف تربطهم بهالآية ..
مثلا (ويلٌ لكل همزة لمزة) و (إن جاءكم فاسقٌ بنبأ فتبيّنوا) ..

فاللي يصير إن الطفل يلتزم تماما بما رود في الشاهد التربوي وإذا حصل أمامه أي موقف يتعلق فيه تلاقيه بسرعة يذكر الشاهد ويذكر الي حوله ..
فيتربى الطفل ويربي أخوانه وأقرانه معه ..

وهذا كله من بركة القرآن .. الله لايحرمنا فضله ..

التسجيل في الفصل الثاني ، والطفل تجرى معه مقابلة قبل التسجيل ..
يتسجل الطفل إذا تم ثلاث سنوات ،، وأهم شي يكون وصل للسن القانوني إذا جاء لأولى ابتدائي ..

بعض الأطفال ماوهبهم الله موهبة الحفظ .. وبعضهم عندهم فرط حركة ونشاط ،، أي طفل من هالنوعية قدلايستمر عندهم ..
وصارمين جدا في هذا الشأن .. حتى ابن المديرة أ.بدرية الراجحي ماكمل عندهم لأنه ماكان يحفظ ..

دخلوا فيها أخوين لي .. والآن الكبير في سادس والصغير في ثاني .. ودخلت أختي والآن في ثالث ابتدائي .. وكلهم دخلوا لما كان عمرهم 3سنوات ..
دعواتكم الله يسهل لي أدخل بنتي السنة الجاية ..

نسيت أقول إن مع هالكم الهائل من الحفظ فان الطفل أبدا مايتعب ولايمل لأن عندهم طرق وأساليب مناسبة جدا لأعمار الأطفال ..
يوازنون جدا بين الدراسة والمتعة ..
كل أربعاء عندهم يوم مفتوح في آخر الدوام ..
رحلاتهم مميزة وحلوة .. بكرة بيودون الأطفال في رحلة للحكير لاند ..
الأطفال كلهم تقريبا يحبون المدرسة بشغف .. ويكرهون أيام الإجازات ..
أخوي الصغير بكى وحزن جدا لما طلع منها ..

المدرسة كان اسمها سابقاً "براعم الإعمار" وكانت تابعة لمؤسسة الإعمار ،، لكن انفصل المالك عن الإدارة وأخذ الاسم والإدارة أخذت المدرسات وهم الأصل طبعا ،، وصار اسمهم الجديد: "روض الجنان" ..

تقع المدرسة في مخرج 5 ..

أي سؤال أنا حاضرة ..