مرحبا أخوي جنتل
سبحان الله استشفيت من كلامك شبه كبيييير جدا بينك وبين طليقي الله يسامحه !
تدري أنا ثالث زوجه يطلقها !!
تدري وش آخر كلمه قلتها له قبل أطلع من بيته !!
قلت له .. نصيحه لوجه الله لعاد تتزوج، بنات الناس مو لعبه، لعاد تظلم أحد معاك، وش ذنبنا
تطلعنا من بيوت أهالينا وفي الأخير طلاق لأمور انت واهلك السبب فيها .. ولو بغيت يوم من
الأيام تتزوج غيّر من نفسك ومن تفكيرك ومن نظرتك للأمور .. ودعيت له إن الله يهديه ويفتح
على قلبه وبصيرته ....
نجي لموضوعك
اخوي معليش مع احترامي لك ولوالدتك الفاضلة .. المفروض ما تقول لها ما بدر من زوجتك.
وش استفدت انت الحين غير زرع العداوات على غير سنع !!!
وبعدين والدتك حطت لك العقده في المنشار زي مايقولون ..
كيف يعني رجعها بس بيتي لا تدخله !!!
ذكرتني بأم زوجي الله يذكرها بالخير
بعد ما تدخلت في خصوصياتي، ونجّست زوجي علي وعبت راسه بكلام فاضي ماله
أساس من الصحه، وحشرت نفسها في مشكله بيني وبينه دون ما نطلب منها
وأخذت من حاجاتي أغراض بدون ما تبلغني ولا تعطيني خبر ما راح اقول تستأذن عشان
مهما كان هي كبيره ولها حق علينا وإلخ وإلخ من الأمور اللي ما يقبلها عقل ولا منطق
تزيعلت "يعني زعلت" وقالت معاد أدخل بيتكم وضيقت صدر زوجي وكبرت السالفه على
غير سنع .. يعني ضربني وبكا سبقني واشتكى ..
وبعدين يوم جيت أرجع له ياحبي لها شبت النار وطلعت سالفه قدييييمه، كلمه دارت
بينها وبين ابوي لما جو يتفاهمون مع بعض في موضوع ما وكان ابوي ما يقصد بس هي
فهمتها بطريقه شينه وجت طاااايره تقولها لزوجي عشان يزعل علينا أنا وابوي ويطلقني
على قولها
ليش ما يكون فيه تسامح وكرم وادفع بالتي هي أحسن زي ما قال رب العالمين!!
وبعدين اسمح لي مافي دخان من غير نار .. زوجتك ما سبت اهلك واشتكت منهم لأمها وأختها
إلا فيه أمور تدار بالخفاء انت ما تدري عنها بينهم .. أكيد بدر من أهلك شي تجاها .. مو معقول
تسبهم بدون سبب إلا لو كانت مجنونه !
وبعدين معليش اخوي فيه شوي تناقض في كلامك عنها .. كنت في الأول تقول ما تضحك ومبوزه طول
الوقت وما تتكلم ومو مطيعه وبس تلبس وتطبخ، وفي الأخير تقول اشتقت لها ولكلامها وضحكنا مع
بعض وأوقاتنا الحلوه !! مابي أظلمك يمكن خانك التعبير ماعرفت تعبر لنا أو يمكن توك تحس بقيمتها
الآن بعد ما خسرتها !
وبعدين موقف اهلها وامها غريب وهي بعد موقفها غريب ! يعني ما اشوف امها متخوفه من طلاق
بنتها للمره الثانيه ولا اشوف زوجتك نفسها "من كلامك طبعا" أبدت ندم أو خوف أو رغبه في الرجوع
معناته فيه غلط عليك في التعامل معها أو فيه شي من جانب اهلك تجاهها .. وهذا اللي خلا الأم
تقول لك تبي تاخذ زوجتك تعال خذها ماتبي خلاص طلقها ! يعني كأن مو فارقه معهم!
وهذا شي غريب
أخي الكريم
انت كتبت مشكلتك هنا وطلبت منا النصح .. واسمح لي انصحك كأخ لي وبكل صدق
محد راح ينفعك .. وبكره احتمال تندم بس ما راح يفيدك الندم بوقتها !!
حياتك قاعده تتسرب بين يديك لأمور يمكن معالجتها ... ابدأ بنفسك
انت رجال ولازم تكوّن بيت وأسره وعيال يسرونك في شبابك ويشيلونك في كبرك
لازم يكون لك رفيقة درب وحياه تكبر انت وياها سوا تحن عليك وتحن عليها، تهتم
فيك وتهتم فيها، تشاركك وتقاسمك أيامك بحلوها ومرها ..
لازم تنتبه لنفسك ولحياتك وتعرف انت وش تبي بالضبط.
زوجتك لو كويسه لازم تحافظ عليها بالمعامله الطيبه والعشره الطيبه وحسن الخلق ..
وصدقني كل هذا بيقعد لك في موازين أعمالك وبيوفقك ربي في حياتك وبيبارك لك
و أهم شي لا تخلي أحد يدخل بينكم حتى لو أهلك ..
أهلك على العين والراس الله يخليهم لك ويحفظهم وكل شي وبرهم واجب عليك
واحترامهم واجب عليك وعليها
لكن زوجتك بعد لها حق، ولها احترامها بعد ولها حياتها وخصوصيتها
(ياخي اعتبرها اختك
ما تتمنى لأختك الزين والحياة الكريمة وتكره لها الظلم!!)
ولازم تعطي كل ذي حق حقه لأنك محاسب عن هالشي قدام الله سبحانه وتعالى ..
وعشان تنجح حياتك الزوجيه بشكل عام سواء مع هذي الزوجه أو اللي قبلها أو لو
تزوجت الثالثه أو الرابعه أو إن شاءالله العاشره لازم تغير من نفسك ومن نظرتك للأمور
ولا تسمع لولا أحد غير لكلام رب العالمين لأنه منهج حياة كامل ولرسوله الكريم
ولصوت الضمير فقط لا غير.
واذا بغيت تستشير، استشير شخص ناصح وعاقل وأمين ..
ويمكن اللي صار لك حوبة زوجتك الأولى .. يمكن ظلمتها انت وأهلك
ترى الظليمه شينه وانا اختك ودعوة المظلوم مابينها وبين رب العباد حجاب !
عموما أتمنى انك ما تزعل مننا ومن كلامنا واعتبرنا اخوانك ولو قسينا عليك
واسأل الله تعالى أن يكتب لك التوفيق والسداد والنجاح في حياتك
تحياتي لك،،،