اهلا فيكي عزيزتي نورتي
اللي بعرفه الدخل ببلجيكا ما كتير عالي بعكس لندن
ما عندي خلفية كتير بس اخوان زوجي وعمومته واولادهم عايشين هونيك
ومتل ما قالت دوندرمة لازم تعملوا حساب الصغيرة قبل الكبيرة
طبعا اذا معكن الجنسية الحصول علئ شغل ومعاش محترم اسهل بكتير
الدراسة ببلاش وفي مدارس خاصة بتدرس عربي ودين وانكليزي وبنفس الوقت مكلفة
الحكمة على حساب الدولة بس اللي بعرفه انو كتير في زحمة وفي نطرة ومماطلة
بعكس اذا كنت عاملة تأمين صحي خاص فرح يكون عندك دكتور للعيلة ودكتورة نسائية ودكتورة اطفال بتروحي على عياداتهم الخاصة
بالنسبة للعرب عندك شارع العرب من مطاعم ومحلات وقهاوي واستراحات وكل شي بيخص العرب لدرجة انك بتفكري حالك عايشة ببلد عربي
حتى بعض المحلات كاتبة بالعربي والانكليزي
في جالية عربية قد ما بدك

بالنسبة للسكن غالي اما اذا حصلتي على اقامة بالبلد او جنسيتها بتساعدك باجار البيت حتى في جمعيات بتساعد االاطفال كمصروف الهن
واجار البيوت بقلب لندن غالية بعكس ضواحيها
اول شي لازم تكونوا تعرفوا ناس هونيك ليأمن زوجك شغل قبل ما تخطوا هالخطوة
وعلى حسب ما بذكر انو اللي معو جنسية اوروبية غير بريطانية ما بتساعده الدولة فلازم هو يشتغل ويتكفل بأجار البيت ودفع الفواتير والافضل تسألوا بهالنقطة

ورح حاول احكي سلفي ليعطيني معلومات اوضح
بس الافضل تعرفوا ناس هونيك وتكونوا على بينة اكتر ولو بتروحوا سياحة جمعتين يتدرسوا الوضع وبتقرروا اذا بتنقلوا او لا

اسأل الله ان يقدم لك كل الخير

احترامي

__________________





اللهم إني أستودعك ديني و نفسي وأهلي وزوجي
وأولادي وأحبتي فاحفظهم يا من لا تضيع ودائعه