إنت مش جوازك بعد شهر ؟
ليه الوساوس و الأفكار الهدامة اللي مالية بيها راسك دي ؟
خلاص 30 يوم إن شاء الله و ينتهي الموضوع كله
بالنسبة للهدايا فإحنا عندنا مواسم , هل جابلك حاجة في المواسم ؟
إذا لأ يبقا غلطان لازم يجيب هدايا تساعدك في التجهيز و والدك عنده حق
أما لو كان قصدهم هدايا من غير مناسبات فدي ترجع لخطيبك
أنا لاحظت من كلامك إن شخصيتك ضعيفة جدا جدا , مش بس قدام أهلك , لأ قدام أهلك و خطيبك و باقي الناس
تبوسي راس و خد فهمنا , تبوسي أيادي ليه ؟ مش المفروض تعملي كده
بوس اليد بيكون من باب بر الوالدين لأن ايدهم ليها أفضال عليك , أما جد خطيبك ايه أفضاله عليك عايزة أفهم !!
حل مشاكلك كلها انك تتشجعي و تتكلمي أما انك تفضلي خايفة كده و تتقبلي الموضوع بانهزامية فإنتِ اللي حتجني على نفسك
بقولك حاجة , اللي مش بيطالب بحاجته محدش بيجيبهاله
و لما أهلك بيقولولك ليه مش بيجبلك هدايا زي فلانة و خطيبها لازم تردي عليهم بجملة وحدة :
ما تقارنوش بيني و بين غيري و إلا أنا كمان حقارن بينكم و بين غيركم , ليه بتقولولي أخد هدوم قديمة أحطها في جهازي !!
اكتبي لأمك اللي انتِ عايزاه في ورقة و خليها الحاجات اللي محتاجاها فعلا و عايزاها
و خليكِ قوية و اطلبي منهم , ضعفك ده مش حينفعك بحاجة
و بطلي تقارني نفسك بإخواتك في تخيلاتك , انتش تعرفي منين ان أبوكِ مش حيعدل بينكم
ليه بترسمي لنفسك أوهام و تعيشيها
و ايه الأسئلة البايخة اللي بتسئليها لخطيبك دي ؟
تفكيرك في السيكولوجي اسمه تفكير استشهادي , دايما متخيلة انك ضحية معذبة حتموتي
ده كله غلط على صحتك النفسية , انتِ حتستفيدي ايه لما تعرفي جوزك حيتجوز بعد موتك و لا لأ
المهم عندك تعرفي جوزك حيعمل ايه و لا المهم إنك تفكري في الحساب و الجنة و القبر
ما تربطيش فكرة الموت بالدنيا , لأن فكرة الموت ليها قدسيتها اللي لازم ترتبط بالعبادة و الحرص و الطاعة
مش الكلام الفاضي اللي بتتخيليه ده
و في الآخر بقولك . 30 يوم قدامك عشان تهتمي بنفسك و بشرتك و صحتك و تجهيزاتك
مش عشان تبكي و تحزني و تتخيلي الموت !!!
مبرووووووك يا عروسة
__________________
سبحان الله
الحمد لله
و لا إله إلا الله
