رد : خالة زوجي تستفزني
صدقيني إن خالته ماتمادت وصارت تتصرف هالتصرفات معاك إلا إنك مخليتها على راحتها ومعطيتها اكبر من حجمها وبعدين انتي ليش تسمحين لزوجك إنه يروح بها هي وبناتها وانتي تجلسين عند اهله حتى وقت متأخر يا اختي البسي عبايتك وقبلها على السيارة لاتنتظرين الإذن منها انتي جالسة في سيارة زوجك مو على راسها ولا هو بكيفها تقول لك اجلسي حتى زوجك يرجع لكم بعدين قولي لها انا تعبانه وبروح لبيتي وما ابغى زوجي يتعب يرجع لنا الين هنا مرة ثانية بعدين وش دراك إنها ماتوز وز في اذانه في الطريق وهي رايحه معاه لبيتها يا اختي لاتقولين بكيفهم يزوجونه هذا زوجك وهاذي حياتك لا تسمحين لأي احد يتدخل فيها وسالفة البحوث والأوراق اللي تكلف فيها زوجك وهي عندها اولاد خير ان شاء الله عيالها وش دورهم في الحياة وبعدين زوجك مو ملزوم ولا مكلف فيها هي وبناتها دام عندها عيال هي شايفة اهتمام زوجك فيها وحبه واحترامه لها تحسب إنه زوجك له رغبة بالزواج من بناتها وهي جالسة تمهد له الطريق وتنغز بالكلام وتلمح له واتوقع لو زوجك غير معاملته لها وخفف من اهتمامه فيها راح تبطل هالحركات لو طلبت منه شئ او كلفته بشئ يعتذر منها ويقول لها انا مشغول ولو اصرت عليه عادي يقبل بمهمتها لاكن يروح يعطيها لواحد من اخوانه ويقول لها اخوه فلان مشغول اللي هو زوجك وقال لي اروح للي كلفتيه فيه حتى تحس على نفسها ولو في راسها وساوس تطيح اهم شئ انتي تفاهمي مع زوجك بهدوء ترى زعلك منه وتطنيشك له ماله داعي هو بالأساس ماله ذنب بالموضوع وانتي شايفة وعارفة انه هي اللي تطرد وراه وتحاول تجذبه لوحده من بناتها بأي طريقة ثم موضوع الخلفة وش دخلها هي بتربي معاك يعني ولا بترعاهم ولا وش تقصد بكلامها بعدين لما هي تجيب طاري الحمل يا اختي قولي لها انا للحين مافكرت اني احمل وابو فلان اللي هو زوجك عاجبه الوضع ومرتاح وباقي بنعيش حياتنا ونستمتع فيها مانبغى ازعاج الأطفال واللي عندنا مكفينا والخير والبركة في طفل لو اراد الله يصلحه لك ويهديه
اما انك تكتمين وتسكتين هذا اسلوب ما ينفع مع هالأشكال والله يتمادون عليك ولا يحسبون لك حساب لاكن انصحك لاتخلين لها فرصة وروحي مع زوجك عند اهله ولا تتركينه يروح لوحده خليك معاه رجلك على رجله اما انك تبتعدين عنها وتخلينها عل كيفها تسرح وتمرح هذا اسمه انهزام وهروب ونصيحة لك خير الوسيلة لدفاع هي الهجوم لو انتي او زوجك يكون لكم ردة فعل قوية تجاه مواقفها راح تبطل حركاتها هاذي وتنعدل
وانصحك انك تتفاهمين مع زوجك بكل هدوء زوجك طيب ويحبك وماراح يرضى فيك ابد لاكن بعض الأوقات الواحد ينحرج ويستحي انه يردعلى واحد اكبر منه وقريبه امام الحاضرين ويحس انه ماعنده احترام وتقدير للي يرد عليه وهو ماوده امه تزعل منه اوتتضايق لو رد على خالته في حضورها لاكن انتي تفاهمي مع زوجك على اساس إنه يقلل اهتمامه فيها وما يعطيها مجال تتدخل في حياتكم سوى في الحمل او غيره لأن اذا امه ماتدخلت هي وش دخلها الصراحة والله ان بطني مغصني من خالة زوجك هاذي ما ادري وش اللي يحشرها ويدخلها في اشياء خاصة بينك وبين زوجك يعني ضروري اي واحد يشوفونه عايش ومبسوط ومرتاح في حياته يبغون ينغصون عليه
الله يهديهم ويصلحهم وبناتها ربنا يرزقهم بالأزواج الصالحين لاكن الله يعينهم على حماتهم هاذي
وانتي اهم شئ زوجك روحي راضيه وتفاهمي معاه ترى والله هو ماله ذنب ومابيده شئ الرجل استحى منها مقدرها وحاشمها ومحترمها وهي زودتها تبغى تفتح مشكلة بينكم وهو لما قال لك خلاص لأن انتي زوجته وتفهمينه وتحترمين كلمته لاكن هي خالته واكبر من امه وشاف انه صعب انه يطلب منها السكوت لأنه راح يفسرونها بطرق اخرى وكلامه لك هو يمكن لاحظ انفعالك وحس فيك انك متضايقة وخاف ان الأمور تزداد بينكم والكلام يكثر وتصير مشكلة فحب انه يقطع السالفة بكلمته لك فلا تواخذينه بكلامه
وربنا يوفقكم ويسعدكم ويكفيك شر خالة زوجك بما يشاء ويصرف كيدها عنكم ويشغلها في نفسها يارب .
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله
التعديل الأخير تم بواسطة أم سلطان1 ; 20-12-2012 الساعة 11:01 PM