اقتباس:
المشاركة الأصلية كتبت بواسطة الاوزون
مديلات الاندكروزر ال جي اكس ار من 2004 الى 2006 تقريبا من 90 الف الى 120 على حسب المواصفات
كم سلندر 6 او 8 وحسب القير اتوماتك او عادي وحسب النظافه الله يوفقكم في بجيب ممتاز وسعره حلو
الفتره اللي مضت كنت انا وزوجي بنشتري جيب لاندكروزر مستعمل وبحثنا وبحثنا والله اراد وقررنا نشتري برادو 2011 والحمد لله
الله يسرلنا الامور اي سؤال عن السيارات انا حاضره خلاص ما بقي الا اسوق
|
هلا فيك أختي الغالية الأوزون وألف مبروك عليك البرادو 2011 والله يعطيك خيره ويكفيك شره يارب وربنا يبارك لكم فيه إن شاء الله تعالى
بالنسبه لنا حنا طال عمرك أسرتنا كبيرة شوية عددنا 7 أفراد ولما نسافر نقطع مسافة طويلة حدود 2000 كيلو برا والبرادو أحس إن حجمه صغير علينا فحبينا اللاند كروزر علشان إنه أوسع علينا أكثروكمان حنا من عشاق البر والطلعات أحيان نطلع جبال وطعوس وتضاريس صعبه والجيب لاند كروزر عزمه أقوى في هاذي الأماكن وحنا قد سبق وأخذنا جيب سوبر سفاري نيسان وجلس معانا مدة وبعناه وأشترينا بعده جيب لاند كروزر موديل 2002 وبعناه تقريبا قبل ثلاث سنوات علشان كنا نبني بيت وصارت معانا أزمة في المصاريف وضحينا بالجيب
الأند كروزر وكملنا مشرو ع بناء البيت وشوفي الحين بعناه الجيب قبل ثلاث سنوات بحدود 100000 ألف ريال والحين جينا ندور بالمئة ألف ريال وزيادة عليها عشرة الآف ريال موديل 2004 أو 2005 أو 2006 وتنازلنا إلين 2003 وما لاقينا جيب نظيف وينشد فيه الظهر أكثر الاند كروزر إللي وجدناها تصميم خليجي قير تماتيك و8 سلندر وموديل 2005 ماشي فوق الثلاث مية ألف وفيها رشات وبعض الدقات في الرفارف والجوانب وحصلنا جيب في أحد صالات العرض لاند كروزر موديل 2002 gxr تصميم سعودي اللون أبيض وداخليته بيج ماشي 140000 ألف كيلو والجيب صراحة تتعب وأنت تقول عنه نظيف ماشاء الله تبارك الله البودي يلق لق داخليته لماتشوفيها تقولي كأنه ما أحد قد ركب فيه كل شئ نظيف من الداخل والخارج وعلى يد صاحبه وصيانته في الوكاله بإستمرار وزوجي أعجبه مرة وصلى إستخاره وحس نفسيته مرتاحه لشرائه وتوكلنا على الله وشريناه بمبلغ 110000 بمئة وعشرة آلاف ريال كاش طبعا قبل ماناخذه فحصناه في الوكاله و فحص على الكمبيوتر وفي ورشتين عادية
والحمدالله طلع كل شئ فيه تمام وأشتريناه وطلعنا فيه مسافة 200 كيلو والحمدالله ماظهر فيه أي شئ ورحنا فيه البر والطعوس وجربناه في البر
وكل شئ فيه طيب وممتاز ويستاهل المبلغ إللي إندفع فيه وحنا عندنا في منطقتنا الاند كروزر طايرة وأسعارها في أرتفاع وكل السيارات الياباني أسعارها صارت عالية زوجي عنده دباب سوزوكي بك أب أشتراه تقريبا قبل 4 سنوات موديل 2001 بمبلغ 22000 ألف ريال الحين لما نزل معارض السيارت يبغى يشتري جيب لاند كروزر والشريطيه شافوا السوزوكي معاه أعطوه عليه 25 ألف ريال بس زوجي رفض مايبغى يبيعه وأنا ما أدري وش سبب إرتفاع السيارات الواردة من اليابان وفيه بعض الناس رجحوا سبب هالإرتفاع في الأسعار الزلزال إللي صار في اليابان بالرغم من إن اليابان تمتلك مصانع لشركة تويوتا في إستراليا علشان اليد العامله في أستراليا أقل تكلفه من اليد العامله في اليابان بس الإرتفاعات مازالت متواصله عندنا والله العالم وش الأسباب .
المهم ياغاليتي شاكرة لك مشاركتك الطيبه والله يوفقك ويجزاك خير على تقديم المساعدة لنا وبارك الله فيك يالغلا و بإذن الله تعالى ماراح نستغني عن معلوماتك القيمة .