يسعدلي مساكن يا اصحاب الرشاقة والروح المتفائلة
طبعا وعدتكن خبركن شو صار معي بس نزلت علبنان
اول شي الكل بلبنان من تلات سنين وعشر اشهر شافوني بوزن ال٧٤ قبل ما سافر من بعد ما زدت ٢٤ كيلو اثناء تناولي ادوية الوسواس والاكتئاب
والاكثرية شافني بالصور من بعد ما نزل وزني بس وقفت الادوية وصار وزني ٦٥ و٦٤ بس الصور شي والواقع شي تاني
وقبل ما انزل على لبنان وصل وزني بسويسرا لل٥٩
وكنت متوقعة اني زيد بلبنان شي ٦ او ٧ كيلو عالاكل لانو قلت رح استمتع مع الاهل واكل كل شي بحبه وما احرم نفسي من الاشياء اللي ما موجودة بسويسرا وخاصة اني من محبي السندويشات على انواعها واجازتي قصيرة ورح ارجع اكل من اكلي الصحي وارجع لممارسة هوايتي المشي

وبلبنان ماا باكل من عند اي حدا الا من المطاعم اللي بضيعتي او بمحيطي عند ناس بنعرفهن وموثوقين وبنعرف نظافتهن وجودة الطعام عندهن

وهيدي بعض الاكلات اللي اكلتها وبعد في صور للترويقة ان كان لحم بعجين ومناقيش الخضرة والزعتر والكفتة والسودة وفول وحمص بس مش عارفة بأي تلفون مصورتهن لانو استعملت كذا تلفون من كتر الصور هههه
بعدين بس نزل تقرير عن لبنان بنزلهن اذا الله راد

أغلب اكلي كان سندويشات تويستر وزنجر ودجاج وشاورما ومشاوي وكباب تركي وهمبرغر وسجق مع جبنة عالصاج وطبعا اللحمة المدقوقة والفراكة يوم بعد يوم اعتبرهن تحلاية
وخبز المرقوق كل يوم الصبح اكل طازة قبل الترويقة واكلات كتير مع التحلاية من كيك وايس كريم وكنافة بالجبن وحلويات للاسف البعض ما صورتها













هيدول الصور نزلتهن لتشوفوا ئديش زدت مع هيدا الاكل وئديش إفادة المشي البطيئ لحرق الدهون عالبطيئ من الجسم على المدى البعيد


المهم بس نزلت الكل اتفاجأ فيني ويقولولي كتير نحفانة عن الصور اللي كنا نشوفهن
وابتدأ مشوار اكل كل شي بحبه من سندويشات وايس كريم وحلويات يشكل يومي
وبنفس الوقت اجازتي كانت كتير قصيرة ٢٠ يوم كانوا يركضوا ركض وانا اركض معهن وضل بحركة دائمة
ولقبل ما سافر مين ما يشوفني يقلي كتير نحفانة ويستغربوا اني ما زدت بالرغم من الاكل اللي عم آكله
وطبعا بس رجعت وزنت نفسي زدت بس تلاتة كيلو وما ظهر عليي اني زايدتهن

اللي استنتجته لو كاينة عاملي ريجيم قاسي مع حرمان جسمي من كتير اشياء بشكل نهائي ان كان من السكر او الحلويات او الاجبان وانواع الكريمة والصوصات والمعجنات
كنت من اول اسبوع رح اسمن بشكل مش طبيعي
بس لأني عودت جسمي ياخد من كل شي وبشكل صحي مع تمرير بعض الايام اكل اكلات مش صحية او فيها سعرات حرارية ولو بشكل معقول


والكل بيعرف اثناء تواجدي بسويسرا ما عملت ريجيم اكل قاسي ولا حرمت نفسي وحرقت اغلب الدهون من ورا المشي وتخفيف بعض الاشياء اللي فيها سعرات حرارية عالية متل الشوكولا والمايونيز بس ما وقفتها بس قللت منها وكنت مرر تارت وايس كريم وفواكه مع كريما وعسل
بالاضافة الى اغلب ايام الاسبوع كل اكلي صحي وكتير خضار مثلا خمس ايام اكل صحي
ويومين اكل مطاعم او اي شي من برا



وحبي وفا على سيرة الايس كريم مثلا البارحة اشتهيته رحت اشتريت واحد وفيه ٢٤٠ سعرة حرارة فرحت اتمشيت انا وعم اكل الايس كريم كنت مستمتعة بأكله وبنفس الوقت عم امشي
فمشيت ساعة ونص ورجعت عملت تمارين نص ساعة
وضميري مرتاح
فهون ما حرمت نفسي وبنفس الوقت حرقت اكتر من اللي اكلتهن
ومن تجربة اللي كل مرة عم اتعلم منها اكثر واكثر
انو ما ضل على نفس المستوى بالسعرات وكميات الاكل
لانو الجسم اذا اتعود على نفس الكمية بيقل الحرق عنده
يعني مرات باكل انواع فيها سعرات اكثر ومرات اقل
ومرات بعمل ساعات رياضة اكثر ومرات اقل
والشي الوحيد اللي ما وقفته هو شرب عصير الجريب فروت كوبين او تلاتة باليوم

بالتوفيق للجميع

__________________





اللهم إني أستودعك ديني و نفسي وأهلي وزوجي
وأولادي وأحبتي فاحفظهم يا من لا تضيع ودائعه