منتدى عالم الأسرة والمجتمع - عرض مشاركة واحدة - زاويتي / يوميات مبتعث من ارض الاحلام " Canada "

14-10-2010, 07:45 AM

#39

In Canada

عضو جديد

تاريخ التسجيل: Sep 2010

المشاركات: 20

بسم الله الرحمن الرحيم

السلام عليكم ورحمة الله وبركاته

----------------------------------------------------------------

ينتابني في أول الخريف

إحساس غريب بالأمان و الخطر..

أخاف أن تقتربي..

أخاف أن تبتعدي..

أخشى على حضارة الرخام من أظافري..

أخشى على منمنمات الصدف الشامي من مشاعري..

أخاف أن يجرفني موج القضاء و القدر..

***

هل شهر أيلول الذي يكتبني؟

أم أن من يكتبني هو المطر؟؟

***

أنت جنون شتوي نادر..

يا ليتني أعرف يا سيدتي

علاقة الجنون بالمطر!!

***

سيدتي

التي تمر كالدهشة في أرض البشر..

حاملة في يدها قصيدة..

و في اليد الأخرى قمر..

***

يا امرأة أحبها..

تفجر الشعر إذا داست على أي حجر..

يا امرأة تحمل في شحوبها

جميع أحزان الشجر..

ما أجمل المنفى إذا كنا معاً..

يا امرأة توجز تاريخي..

و تاريخ المطر!!.

نيزار قباني )

[ امي ‘ امرأة اختصرت جميع النساء ]

------------------------------------------------------

كالعاده الساعه 7:08 ليلاً , تحت نوري المعتاد وفي قفصي الصغير اعيش داخل روتين طبيعي اليوم كالغد والغد كالأمس
اليوم يوم جميل مشمس صحو دون غيوم , اشعر بالدفئ قليلاً مع تجمد اطراف اصابعي .

سكون مخيف " نعم مخيف " , اكثر يوم تأخرت على العشاء .

------------------------------------------------------

نكمل حيث توقفنا في الجزء القديم

استيقظت يوم الاثنين ذهبت للمعهد كالعاده فلا احداث اتذكرها رجعت للبيت , لقيت اليزابيث وبيفيرلي جالسين برى بالحوش

زي ماطلبتوا صوره لي مع العجووز وشايلوه " معلومه يوم اقول لكم اسمه شارلوت تراي كنت غلطان < باللهي ! " :

طبعاً لقيتهم مجمعين حطب وبيشبون نار وبنشوي اليوم , ^_^ صكيتها ابتسامه ذاك اليوم 4×6 وناسه من زمان عن الشبه " النار " والشوي طبعاً الشوي هوت دوق :2

1- صوره لمكان الجلسه مع الشبه

2- صوره للعشاء قبل لا يجهز ^_^

طبعاً شوينا - هوت دوق - وذره - وخدود بنات - < ياقدمه هالحلاو , بعد العشاء جابت لنا العجوز خدود البنات ونحطهن باسياخ ونسويهن ويصيرون لايناات ونحطها بين طبقتين بسكوت مثل بسكوت الشاهي ونحط عليها قطعة شوكلاته ونرعصها شوي

ويطلع الطعم خيااااالي ^_^ < يعني حلا بعد العشاء < احلف !

----------------------------------------------------------

يوم من الايام دخلت عالعجووز واليزابيث بغرفة الطعام ولاهم يسوون بطاقات لعيد الشكر - شكر الله على النعمة - جلست اسولف معهم واسألهم طبعاً البطاقه فيها مكان تكتب فيه الاسم فقالت عجوز قريح عندي فكره وش رايكم نكتب الاسم من هالجهه واحمد يكتب الاسم بالعربي من الجهة الثانيه ضحكت الصراحه ووافقت :

1- اعذروني على دقة الصوره السيئة , مدري وش جاها كامرتي

طبعاً بعض اسبوع لسوء الحظ ما اذكر فيه شيء , طبعاً جاء الويك آند وكان لونق ويك آند لان الويك اند عندنا سبت واحد والاثنين عيد فكان اجازه - اخر يوم دوامات يوم الجمعه قبل الصلاة بساعه واول يوم دوام يوم الثلاثاء - قررت اروح فانكوفر منها اقابل اخوياي ومنها اراجع اوراق الجامعه , توكلت على الله ورحت عالفيري الساعه يمكن 6 المغرب :

1- صوره من الفيري

2- صوره توضح كثر الجزر بكندا

---------------------------------------------------------

مافيه احداث تذكر بـ فانكوفر غير اننا برمنا الداون تاون كله رحنا لكل مكان , اييييييييييييييييه ذكرت اللي نفسي فيه من زمان كلته بـ فانكوفر اندوومي

, باقي الكبسه والشعيريه - هذولي اللي مشتهيهم الوقت هذا -

....

طبعاً فـ الرجعه لـ فكتوريا تأخرت شوي لانه يوم عيد ويوم العيد يتغير جدول الباصات ويتأخرون , دخلت البيت على الساعه 8 الليل ولقيت بالبيت 8 اشخاص مسوين عزيمه عشان العيد وهو العيد اللي يطبخون ديك رومي لقيتهم جالسين بغرفة الطعام رحت تعشيت بالمطبخ لانهم خلصوا متعشين وكلت الحلى ودخلت عليهم وسلمت وجلسنا نسولف عن العربي والكتابات وانت اللغة العربيه حلوه - لازم التسليك ^_^ - وبعد الجلسه على طاولة الطعام رحنا الصاله فيه مسابقه - ع الورق - واكتفيت بالمشاهده

-------------------------------------------------------

حبيت اعرض لكم اطلالة نافذتي :

1- من اليمين

2- من اليساار

---------------------------------------------------------

بالامس قررت اول ما ارجع من المعهد اطلع البحر , بالفعل رجعت وطلعت البحر اللي جمب بييتنا نزلت اغراضي وغيرت ملابسي وخذت الكامرا ورحت البحر وكان وقت غروب , والجوو حلوو بارد

1- وانا بالطريق للبحر قابلت هذا

, يا انا احبه حب راعي هالسياره " درايفر <3<3 " ودي اركب السياره وارعص دائره

2- فالطريق للبحر ....

3- Death life

4- .................................

طبعاً الصور اللي بالبحر بخليها بكره او اذا فضيت اليوم لانها حلووه ويبغالها قعده ^_^

---------------------------------------------------------

اليوم طلعت من المعهد ورحت ركبت باص وقعدت احل واجب لي ثم نزلت محطة باص ثانيه عشان اركب الباص اللي يوديني حينا المهم جلست انتظر الباص بالمكان المحدد واحل واجبي واترجم بالجوال الكلمات اللي مافهمتها << يعني ! باللهي بتترجم اللي فاهمه

المهم جاء الباص وركبت فيه يوم جيت انزل المس ادور الجوال مالقيته طبعاً انا يوم ركبت الباص كملت حل الواجب , وادوره ولا لقيته وراعي الباص واقف ينتظرني انزل نزلت قلت يمكنه بالشنطه والله احوس عليه عجزت القى شيء , رحت البيت وضاااااااااااااايق صدري ماهمني الجوال كثر ماهمتني المعلومات اللي فيه بعدين لو يضيع بالسعوديه سهل شوي ارجع بعض المعلومات لكن بكندا !!
وفيه ارقام مدري كيف ابجيبها ومعلومات الزبده انه ضاقت الدنيا بوجهي " تذكرت كلمه لامي ووالله اررررررررررتحت - الحلال مايضيع يا احمد <3 - ..

يوم دخلت البيت لقيت الشايب وقلت له السالفه طبعاً انا اول مانزلت من الباص ناظرت رقم الباص وحفظته عشان لو مالقيته بالشنطه نتصل على الشركة ,, قلت للشايب وعطيته رقم الباص ومتى ركبت الباص واتصل على الشركه وقالوا له ان الباص بعد 5 دقايق بيمر من عند المحطه اللي عند بيتكم ركب السياره بوول وراح للمحطه ووقف الباص وسأله قال له راعي الباص انا شفته يوم جاء ينزل يدوور شيء - يقصدني - ويقول وقفت بعده ورحت اشوف وش يدور ولا لقيت شيء طبعاً قعد يدور الشايب ولا لقاه , رجع لي والله قالي مالقيته قلت له بنلقاه بس اصبر ناظرني وقال لي انساه وانا داخلي اقول ماتدري وش قايله لي ام طارق فديتها
" طبعاً تقولون ليه مارحت معه للباص ؟ عشان سيارة بول فورد غماره وحده ومليان اغراض قدام فقال لي انا ادبرك لاتشيل هم "

اتصلنا على جوالي ولا رد احد بعده اتصلنا ثانيه رد واحد لكنته اسباني ويتكلم شوي انجليزي وقال اني لقيته طايح بمحطة الباص وعطانا راعي تكسي هندي وتفاهمنا معه ثم سأله الشايب تتكلم عربي قال شوي
كلمته وقالي :
- كيف الحال حبيبي ؟
- رديت بالانجليزي من اللحسة , ونص كلامي عربي والنص الثاني انجليش وشكرته لين قلت امين

عاد تواعد هو وبوول بمكان عمل الهندي وراح بوول له وجاب الجوال - الحمد لله - وجاب ورقه مكتوب اسم الهندي ورقمه " طبعاً الهندي مسلم "

طبعاً اشكر الله اولاً ثم الاسباني والهندي على الامانه وبوول ووقفته معي .

--------------------------------------------------------

وبول رايح يجيب الجوال جاتني عجوز قريح - احبها هالعجوز وماشفت منها الا كل خير بس مسكت معي عجوز قريح - تقول لي بروح انا وشايلوه للشاطئ - بالسياره 10 او 15 دقيقه - تجي معنا قلت ايه متى بتمشين قالت لي 10 دقايق جهزت عمري ونزلت بالكامره , رحنا البحر وتمشينا وانبسطنا مع الكلب - وانتم بكرامه - وضحكنا عليه يراكض ويطب بالبحر ومستااااانس , طبعاً كان هادي جداً وهذا اليوم يعتبر يوم غريب باكتوبر لانه شمس وادفى من غيره

طبعاً فيه صور بس مالي خلق اللحين يمكن وقت ثاني مع صور البحر حقت امس

-------------------------------------------------------

والله ما اصدق ان لي شهر بس مسافر والله احس 6 شهور شوي , اتذكر اطلع من البيت اودع امي واهلي قدييييمه مره هالحظات , احس انها بتتم سنه مو شهر والله ما ابالغ جداً جداً قديمه

-------------------------------------------------------

ملاحظة :
1-" احب يكون الموضوع ببساطه وكأني اسولف معكم واشرح لكم , واتمنى اللي عنده نقد للموضوع لايبخل علي ! "

----------------------------------------------------------------------------

1- For you <3

<<< لجميع زوآآآر زاويتي المتواضعه ()

احبكم جميعاً