المشاركة الأصلية كتبت بواسطة sa33

حبيبتى والله انى اشعر بكى جدا وحالتك الآن لكن اللى انتى بتفكرى فيه ده صعب ومش عايزه اعقدك واقولك انه مستحيل. انتى عارفه يعنى ايه واحده تخلع جوزها فى عالمنا العربى . عارفه ده عمل فيه ايه من جوا. انتى خلاص اخذتى قرار وبنيتى بينك وبينه سور طويل لا يمكن انه يقدر يعديه ويرجع لك . صعب قوى.
ده كان رأيي
لكن لو عايزه افكار يمكن يتحقق الأمل اللى هو بسبة 1% فممكن انك تبعتى له رسائل على الجوال على انها من عيالك وبعدين الورقة الرابحة الوحيدة فى ايدك دلوقتى هى عيالك وخصوصا بنتك الكبيره عارفة انك هتقولى لى دى طفله عمرها عشر سنوات .صدقينى يا حبيبتى دى اكتر واحده ممكن تحنن قلبه عليكى . انا ابنى الوحيد ربنا يخليه لى عنده تسع سنوات وفى اى خلاف بينى وبين زوجى بأخليه يروح يكلم باباه وبلاقيه جايبه فى ايده وجاى يصالحنى صدقينى هم مش صغار زى ما احنا متخيلين بس المهم الطريقة اللى تفهميها بيها والمعلومه اللى انتى عايزاها توصلها له
شوفى انتى الأول اقعدى اتكلمى معاها عن والدها وقولى لها انك لسه بتحبيه ونفسك يرجعك بس يمكن هو مكسوف يرجعك وانك بتدعى انه ينسى اللى حصل ويردك علشان تعيشوا فى بيت واحد سوا. ومره تانيه تحكى لها قصة البنت اللى عايشه م امها وابوها واخواتها سعيدين ومبسوطين وتطلبى منها ترسم رسمة يكون انتوا كلكم فيها قاعدين على السفرة وبتاكلوا سوا او خارجين نزهه فى الحديقة وبتلعبوا سوا وخليها ترسمك دايما قاعده جنب ابوهم ولما تروح لوالدها خليها تاخد الصورة وتوريها له وتشرح له مين اللى فى الصورة وكمان تحكى له الحدوته اللى انتى حكيتيها لها (انتى فكريها تعمل كده قبل ما تمشى من عندك) ولما ترجع اسأليها هل الحدوته عجبت والدها علشان تتأكدى هى حكتها له ولا لأ.
وبعد الصلاه خليها تسمع دعائك وانتى بتتمنى رجوعك له وهى هتنقل له كل الكلام ده. وبعدها اقعدى معاها وكلميها بهدوء انك عايزه ترجعى لوالدها وعيزاها تقترح عليه الاقتراح ده من غير ما تقوله انك انتى اللى قلتى لها أو ممكن لو لكى اخت او صديقة هى اللى تكلمها يعنى تقولها ايه رأيك لو نعمل خطه ونرجع ماما وبابا لبعض وتعيشوا كلكم فى بيت واحد. طبعا البنت لأنها صغيره هتحب الخطط والكلام ده وتبدأ زميلتك تعرفها تعمل ايه.
يارب أكون عرفت افيدك.