السلام عليكم ورحمه الله وبركاته 00
وبعد

بعد رحله دامت 15 يوم في ارض العجائب رجعت وكلى شوق لديرتي الغاليه ومن ثم لهذا المنتدى الشامخ

فبعد التحيه والسلام 000 ابدأ في شرح الكلام

بسم الله نبدا

_____________

قبل البدء في اي حديث بذكر لكم السبب اللي يخليني انزل التقرير بدون صور 00 واللي هو الإ الآن

قاهرني ومخليني اشتاط غيظا 00 بكل بساطه تعرضت للسرقه في وضح النهار

والمشكله اني انسرقت في اكبر وافخم مول في بانكوك :14: اسمه((بنجابي مول))

ذاك اليوم التاريخي اللي ماينسى ابد صرت مثل المجنونه ادور على شنطتي

اللي تحتوي على (( جوال n70 وجوالn95 وكاميرا ديجتال)) اضافه الى الاغراض الشخصيه

بدايه القصه 000 كنت انا وزوجي وبنتي في هذا السوق ((الله لايرده)) وبالتحديد في الدور الرابع

قاعدين نلعب بنتي بالالعاب بعدها جلست آكل آيسكريم 00 وخليت عربانه بنتي جنبي وعلقت

الشنطه عليها وفوقها اكياس ----ركزوا معي زين ----- يعني اللي يبي يسرق مايمديه لازم يوخر الاكياس

ثم ياخذ الشنطه -----طيب يعني انا كرسي ما احس الا ابحس وكفشه لأنها جنبي

لكن الشغله اكبر من كذا 000 الشغله اشبه بالتنويم المغناطيسي لي ولزوجي --- كلنا ما انتبهانا

الا عقب عشر دقائق من جلوسنا ------ والله عجزت افسر وشلون سرقها 00

بلغنا الامن اللي بدوره فقع مرارتي كل واحد قاعد يدربي راسه ما يدري وش الهرجه ---

اللهم اخذوا رقم جوال زوجي على اساس اذا لقوا شئ يدقون علينا0000 والله ياجماعه الخير

اني ماهمني الجوالين بدالهم اربع 000 اللي مضيق صدري ومطير النوم من عيني ان الكاميرا

تحتوي على 300 صوره من بينها صور شخصيه لي ولبنتي وزوجي ----

لكن قلعتي احد يروح لسفر معاه احدث موبايلن ولا بعد انقل الكاميرا معي بكل مكان---- ماقول الا الحمد لله والشكر

ماعلينا غثيتكم بسالفتي 000 الحين نجي للمضمون00

_____________

اولا السفره مقسمه الى خمس ايام بوكيت وتسعه ايام في بانكوك 00

تاريخ السفره 13/6/2007

خط السفر ديرتي ثم البحرين ومن ثم قطر ((طبعا على الخطوط القطريه )) ومن ثم الى بانكوك

1- مطار بانكوك :
من اكبر الطارات اللي زرتها اضافه الى التعقيدات اللي واجهتنا من تفتيش واستخراج فيزا والزحمه
اللي ملهاش آخر00

توجهنا الى مكتب استخراج الفيزا وبعد تعبئه الكوبونات ودفع 3000 بات يعني (300 ريال) رسوم الفيزا

اي 100 ريال للشخص الواحد00 ويوم خلصنا طحنا بسالفه ثانيه اللي هي (( ماتدخل تايلند عموما الا

معك اقل شي مصروف جيب 600دولار 00 ولازم توريهم 00 واللي ماحلتوش يقعد به مثلنا

قال زوجي للموظفه اللي معاي دفعتهم على استخراج الفيزا 00 خليني اروح اصرف بالصراف
واجيبلك الفلوس 000 قالت معصي ماتتقدم خطوه الا لما تخلص اجرائاتك 000طيب وش الحل!!!

قالت دبر نفسك --- قالتها بالانجليزي الصرافات داخل المطار والدخول ممنوع الا لما اشوف جميع الشروط استوفن ---

المهم بعد شيل وحط قالت عطني بطاقه الصراف انا اصرفلك :14: قالها زوجي هذه برقم سري

قالت بسيطه علمني ايام 00 ياناس ياهوه لهدرجه تعقيد ماشفت 00 طيب وش فيها لودخل

وانا موجوده عندهم وصرف 000 لكن العقل نعمه 00 وبالاخير عطاها البطاقه والرقم السري علشان صرف
600 دولار

والحمد لله مرت على خير وعطونا الفيزا وتوجهنا للداخل لنواجه طابور طويل عند المسؤل عن اجراءات الهجره

ويوم وصل دورنا طالبونا برقم الرحله مع الجوازات وتفتيش مكثف اضافه الى اخذ صوره لكل فرد

بكاميرا الكامبيوتر 0-----حشا تقل جايين نسرق

ثم توجهنا الى استلام الامتعه اللي لقيناه فاضي مافيه ولاشنطه تدور ---- تدرون ليش لأن بإجراءاتهم

المعقده اخرونا عن استلام امتعنتنا000 وبدأت مأساه اخرى

قعدنا ساعتين ندور على عفشنا كل واحد نسأله يدربي راسه يقول روحوا للمكتب الفلاني والمكتب العلتاني

بالاخير طحنا بواحد فاهم ودلنا على العفش00

ثم توجهنا الى الطابق الثاني لتبدأ رحله جديده على طيران تاي ايرواز الى بوكيت

اه تعبت ابكمل بعدين 00 تراني لي ساعتين واصله من المطار نعمه اللى كتبت

القاكم بالجزء الثاني

__________________




يقول اديب الفقه الشيخ علي الطنطاوي (إن اصحاب الهمم العاليه اذا هبطوا الجبل من جانب قاموا يحاولون صعوده من الجانب الآخر ، لأنهم لا يطيقون البقاء في الحضيض بل يبتغون المعالي ابدا)
0
ليس في الحياة شيء مضمون إلا ما يتعلق بتقوى الله ؛ فإذا أوى الإنسان إلى ركن شديد من الإيمان بالله اكتسب قوة غير عادية في مواجهة صعوبات الحياة.(د.سلمان العودة)