رد: وَ كان السقُوط مدوياً ..
لو الدنيا توقف بعد رحيل شخص ..
كانت وقفت بعد موت الأب أو الأم أو الضنا أو الأخ أو الأخت ..
محد يموت من الفراق . لكن يصير كسره في النفس ماتنجبر الا بعد وقت طويل أو يمكن ماتنجبر ..
لكن الأكيد ماحتموت أو تنتهي دُنيتك ..
ابكوا أيام أو حتى شهور ..
لكن مو معقوله تتقفل قلوبكم مرا وحدا ...
وتصير حياتكم لوحه سودا كُلها مغيمه وسُحب صيف ..
الغيم يجي بعدو مطر ..
والسُحب لازم تنقشع لأنو السما في الصيف دايما صافيه ..
ليه الإسلام نعمه ؟
لأنو أصغر حاجه كويسه تعملها أجرها يمسح على قلبك ..
ولأنك مو محتاج تشكي كثير ..
يكفيك الليل مع سجاده واشتكي قد ماتبغى ..
وابكي إن حبيت ..
ماراح تقلق انو بعد الفضفضه أحد راح يعايرك ..
ولا راح تخاف من الدموع اللي على وجهك وانو احد يناديك يَ الضعيف كسرتك ..
..
مرا قرأت تغريده لشخص كاتب فيما معنى الكلام ..
لو أحد جا يواسيك بفراق أحد وانو هالفراق خيره لك , ادعي هالخيره تجيه وشوف كيف يتقلب وجهو ..
هل انتا كبشري حتكون أرحم بنفسك من اللي خلقك ؟
ربي يقول ( وعسى أن تكرهوا شيئاً وهوَ خير لكم ) ..
يعني مايروحلك شي الا لخيره ليك ..
نظرتنا قاصره دائما في الأمور الغيبيه ..
لذا عيشوا الحزن لحظتها لكن ظلم للنفس لمن يمتد هالحزن بإرادتنا أوقات كان ممكن تكون جميله وحلوه لو بغينا ..
العمر جداً قصير لذا خلوه مزحوم بالذكريات الحلوه واللحظات السعيده ..
وافتكروا وقت الشده والحزن والغيوم وسحب الصيف ( هذا الوقت سيمضي ) ..
__________________
اِهدنِيْ فِيْمن هَدَيْت ..
