المشاركة الأصلية كتبت بواسطة mimomea

وعليكم السلام ورحمة الله وبركاته
شكرا كتير أخي الكريم نيت مان على الطرح المميز والمفيد وشكرا لصاحب الفيديو على الكلام الحكيم
بالفعل صدق بكل كلمة
تعليقا على الفيديو وحالة التقشف والتحمل والصبر والقناعة
بابا الله يطول بعمره وعمر أبائكم اتزوج بغرفة واحدة وكانوا سعداء لأنهم متفاهمين وحتى بتربايتنا كانوا على رأي واحد ونحسهن كأنو متفقين علينا مع انو بابا ما شفت احن منو وماما اللي كانت حازمة بس قرارهم واحد
وبعد كم سنة من الزواج وانجاب ثلاث اطفال بلش بابا يبني بيت ضل 8 سنوات يبني لصار صالح للسكن بس ما كان منتهي وبحاجة لاشياء كتير
ولمن سبع سنوات كمله وبنى لاخي وساهم في زواجه
واشترى لاخي الثاني ارض وساعده بالبناء ورجع اشترى اراض ( حكيت هالشي لبين انو ما في شي بيبقى على حاله وبالتخطيط والتصميم من بعد الاتكال على الله بيوصل الانسان لكل شي ولو بعد تعب كبير المهم يكون عن رضا وقناعة )
يعني خلال 40 سنة زواج بس من ست سنوات ارتاح مع انو اتزوج وعمره 17 سنة
وحاليا اختي الصغيرة رح تكتب كتابها الاسبوع الجاي من زميلها بالدراسة وبعده لحد الآن عم يدرس طب واهله عم يصرفوا عليه واختي السنة الماضية اتخرجت من الجامعة مختبر وصرلها اقل من سنة بتشتغل بمستشفى
فوقت خبرت بابا انو بدها تخطب جلس معها وقلها لازم تعرفي على شو مقدمة لانو زميلك بعد ما بيشتغل وعم ياخد مصروف من اهله والحياة بالبداية ما رح تكون سهلة عليكم ورح تواجهوا صعوبات ولازم تكوني قد قرارك وتعرفي كيف الحياة
فجاوبته انو هيي حاطة كل شي ببالها ومتفقة معو على كل شي
وانو رح تكون فترة كتب الكتاب لسنتين بيكون زميلها اللي رح يصير خطيبها خلص دراسته ومطرح ما عم يدرس رح يعطوه بيت لخمس سنوات وشغل بالمستشفى وهيي رح تشتغل معو
يعني عاملين مخطط سوا اذا الله اراد
مع انو اختي بمكان شغلها شافوها اشخاص جاهزين من كل شي وعند اهلي ما ناقصها شي اول ما بلشت شغل اشترولها سيارة وهلئ جابولها ذهب بقيمة الذهب اللي جبلها ياهن زميلها ومع هيك نظرتها انو الحياة مشاركة بين الطرفين عالحلوة والمرة ومش متل ما عايشة عند اهلي لازم شريكي يأمنلي كل شي بأول بداية حياته وخاصة ان كان من اختيارها وقناعتها

وهيي عارفة شو بدها وعارفة بشو رح تمر وانا شفت فيها نضج اكبر من عمرها من ست سنوات وقت كان عمرها 16 سنة وخبرت أهلي عن زميلها وبقيت على نفس مبادئها






من وجهة نظري ما بينجح العلاقة الزوجية غير التوافق الفكري مع الاعجاب والحب
وبدون التوافق الفكري رح ينشئ جيل متزعزع ومشتت بين افكار والده وافكار والدته
والاهم يكون في نقاط اساسية متفقين عليها من ناحية تربية الاطفال وزرع فيهن قيم ومبادئ ثابتة صحيحة عند الكل وفهم شخصية الشريك وتقبله متل ما هو
واي مخطط للمستقبل او بيخص العائلة بيتم دراسته من قبل الطرفين
لانو من الاساس اذا شاف اي طرف انو في فرق شاسع بيناتهن واختلاف كبير فمن اكبر الاخطاء والكوارث يقول عجبني وانجذبتلو وحبيتو وبعدين بغيرو ليصير قريب لافكاري ومبادئي فحتما النتيجة رح تكون الفشل
احترامي