صباح الخير
حبيت اعلمكم وش صار معي امس لاني ماستغني عن نصايحكم
الساعه 2ونص الظهر امس اتصل علي ماخفي عليكم خفت مره لما شفت رقمه قلت يمكن ماصدقني وبيقول جهزي عفشك
سلم وسال عن حالي صراحه لما سال خفت اكثر مدري ليه
قالي عندي دوره بعد اسبوعين في دبي مدتها ثلاث اسابيع تبين تجين معي علشان اكتب بالعايله او بتقولين لا علشان اكتب عزابي
قلت انت وش تبي قال انا لو مابيك كان كتبت لحالي بدون ماستشيرك صراحه ماقدر اوصف شعوري ساعتها قلت
واخير بدت تنحل مشكلتي طبعا وافقت وقبل اقفل سالته متى بتجي قال ليش تسالين قلى هاه تخربطت معاد عرفت شقول
فقلت له علشان اطبخ الغداء قال بس عاد انا مدري غباء فيني او من الفرحه ماعرفت اتكلم قلت ايه
ضحك ضحكه غريبه حسيت بغصه من هالضحكه مدري ماعجبتني قال لاتطبخين بجي بعد نص ساعه ونطلع نتغدى برى
وقفلت منه خايفه وفرحانه مدري شسالفتي مخربطه جا اخذني وطلعني لما كنى بسياره قالي اسمعي يابنت الناس لما سمعت هالكلمه جاني مغص من الخوف اول مره بحياته يقول هالكلمه قلت اكيد بيقول مالنا نصيب مع بعض
قال الي صار كله ابي امحيه من حياتي ولا ابي يوم من الايام تنعاد سالفة حتى لو بالحلم وابي نرجع مثل اول واحسن
لاكن بشرط قلت وش شرطك
قال امك ماتدخل بيتي لما قال هالكلمه حسيت اني رجعت من اول الطريق
لاتلومني هذي امي مهما سوت احبها امي واكيد انتو عارفين احساسي زين
قال وش قلتي
قلت له انت على عيني وراسي بس لو يكون اخر يوم بحياتي ماقدر اطرد امي من بيتي الي هو بيتك هذي امي
وسكتت وبعدها انهرت وقعدت ابكي وهو سكت معاد قال شي
ولما هديت ونزلنا المطعم وهو ساكت وانا ساكته
وجلسنا وعطاني كيس احمر صغير قالي هذي هديت الحمل ورجعت بكيت مره ثانيه لاني مابي اخسره وشرطه صعب مره
وهذي المره هداني وقالي خلاص تجي بيتك بس المهم ماكون انا موجود بالبيت لاتقولين هذي صعبه
ووافقت على شرطه الاخير
ولما رجعنا البيت حلف ان احضر اختبار بكره الي هو اليوم والوقت متاخر قربنا على العشاء مايمدي اذاكر لاكن هو حلف
ومن امس وانا اذكر ومواصله ولا نمت لان الماده طويله
والحين اكتب لكم قبل اروح الجامعه اختباري الساعه 8ادعولي
مشكلت زوجي وانحلت الحمد لله طبعا صار فيها كلام كثير وتفاهمنا على اشياء كثيره
وكان اهمها مالنا علاقه بمشاكل اهلينا بس باقي مشكلت امي الله يهديها