إذا كان الزعل الي تحسينه الحين عشانه خدعك وتركك في بيت اهلك بدون مبرر حسب تصورك
فأقولك هو صحيح تصرف تصرف غير ناضج كرغبة في الانتقام لكرامته الي اهدرتيها قدام الناس
و لكن انتي بعد الله يهداكي ما قصرتي فيه فضحتي قدام الله وخلقه ..
وتصرفك بصراحه وما تزعلين مني كان غير ناضج ..
صحيح أنا معك لما زعلتي .. لما صرختي .. لما تفاجأتي .. لما انفجعتي من صدمتك فيه في البداية
بس الانسان بعدين المفروض لما يرجع لهدوءه يفكر بعقله .. صح والا لا
يعني بالله عليك فضيحته قدام اهله واهلك والكبير والصغير درا انه يسوي هالفعايل .. هل بتصورك سهل ؟
هذا سواد وجه .. ادري انه اهو السبب وهو الي ارتكب هالذنوب .. بس انتي زوجته ستره وغطاه
ورب العالمين قال ﴿هُنَّ لِبَاسٌ لَّكُمْ وَأَنتُمْ لِبَاسٌ لَّهُنَّ﴾.
طبعاً انتي عارفه شنو لباس ..
اللباس اهو الي يستر العيوب .. هو الي يحمي من الأضرار .. اهو الي نتزين فيه قدام الناس
و رب العالمين قال الزوج و الزوجه لباس لبعضهم .. ما قال الأم لباس لولدها .. ما قال الأب .. ما قال الأبن ولا البنت
ليش خص علاقة الزواج .. لأن اي انسان ما ينكشف بشكل كامل الا امام زوجته .. والزوجة بعد
فمن المروءة أنك تسترين عليه .. وضيحته أكبر غلط غلطتيه ..
وبعدين يا بنت الحلال ترى كل انسان معرض انه يطيح في بلوه من بلاوي هالدنيا
لا تقولين لا .. كلنا معرضين للأمراض والأسواء .. ماحد ضامن نفسه إلا بمشيئة الله
حطي نفسك مكانه لو كنتي انتي مبتلية بهالبلوة .. شلون كنتي تبين يعاملك
هل كنتي تبينه يصبر عليكِ ويعالجك بهدوء .. والا يحقرك ويلعب بأعصابك ويهينك
هل كنتي تبينه يفضحك قدام اهلك واهله إلي طول عمرهم شايفنك ملاك .. والا يستر عليكِ
وتبقى السالفه بينك وبينه ..
انا متأكده أن لو زوجك مرض اي مرض جسدي كان وقفتي جنبه و اهتميتي فيه ..
فليش لما روحه تمرض ما توقفين معاه ..
في حاجات في حياتكم تعينكم على هذا الشي
اولا : سنكم متقارب .. ما بينكم إلا سنتين بس .. يعني تقدرون تتحاورون وتفهمون بعض بسرعه ..لأنكم من جيل واحد
هذا شي روعه .. عشان الزوج إذا سقط الزوجته تعينه وإذا الزوجة سقطت الزوج يعينها
لكن تخيلي لو بينكم سنين طويله .. شلونبتتفاهمون .. اصلاً مراح تعرفين كيف تتصرفين ولا تتواصلين معه
ثانياً : الحب الي بينكم اكبر معين ومحفز لكم .. لأن الي يحب يطاوع حبيبه ويتحمل عشانه ويتقبل منه إذا جاه
باسلوب حلو .. لكن تخيلي لو زواكجم عادي .. وهو انتي وغيرك كل واحد .. وانتي نفس الشي
ايش بيصير صعب تتأقلمون مع بعض وصعب تتقبلون من بعض وصعب تضحون عشان بعض
ثالثاً : زوجك عارف خطأه ويبي يترك الي هو فيه .. يعني مو معاند ولا قالك كيفي اسوي الي ابي
لكنه في فترات الضعف البشري يرتكب حماقة وكأنه ينتقم منك يرجع للي كان يعمله
فإذا كنتي تعتبرين تصرفه هدر لكرامتك وخديعه لك .. فهذا مقابل اهدارك لكرامته
ولاحظي انتي للحين وجهك ابيض وناصع قدام اهلك واهله .. لكن هو الي وجهه مسود وكاره نفسه
اهو يحبك ويدري انك تحبينه بس يبيك تحترمينه وتثبتين انك شاريته وتحبينه .. ولا زم تتعلمين هالفضايح
الي تطيح الشخص مع العين تسترينها ..
وغيري اسلوب تعاملك معاه .. غيري كلامك .. غيري نظرتك لا تنظرين له انه انسان مذنب وسئ
طالعيه ان حبيبك بيغرق وانتي تبين تنقذينه ..
ادري صعب ويبي له جهد بس ليش قالوا الصبر مر .. لأنه فعلاً مر وعلقم
زبعدين يا بعد قلبي ما تدرين عن الدنيا .. والله الدنيا تخوف والانسان ما يرتاح من بلاويها إلا لما يموت
ويا ليت يرتاح بعد إلا وراه حساب وعقاب
يا ما ناس عاشوا شبابهم مستقيمين ولما وصلو للخمسين انحرفوا وسودو وجيههم ..
فلا تعاندين .. أنا ما اقولك اتصلي عليه بس ردي على اهله وقولي لهم
انك مستعدة للصلح ومستعدة ترجعين
بس يجي اهو ياخذك .. مادام قدموا خطوة .. قدمي انتي خطوة
بارك الله فيكِ .. خليه يحس انك للحين شايته ومحترمته وانك حابته ..
معليش عدي .. واعتبري تصرفه الخاطئ جزاء على تصرفك الخاطئ
__________________
..كالاطفال نحلم إننا ننام على سحاابة بيضاء يعطرناا المطر ..