السلام عليكم،،
انا متزوجه من 15 سنه عندي اولاد وبنات الحمد لله مشكلتي من يوم تزوجت زوجي هو فتره الزعل في الغالب يكون الغلط من زوجي انا مو ملاك اغلط بس اتكلم عن مشاكلنا الاساسيه هو يغلط مثلاً تنرفز من مديره من اهله يدخل البيت يناضرني من فوق لتحت كني طفل صغير يجلس يقط كلام يحتقرني بكل الوسائل طبعاً عادي تمتد الفتره لشهرين وانا كنت بهذي الفتره احاول قد مااقدر اتغاضى لانه حرام هو مظلوم من احد وانا من السذاجه اللي لازم يطلع كل الحره فيها المهم صار كذا العام الماضي تهاوش مع مديره وشهرين وهو متجاهلني تماماً وماخلا كلمه ماسم بدني فيها وانا ساااااااكته المهم قررب لي يبغاني طبعاً كل اسبوع يقرب بس خلاص بعد شهرين حسيت تعبانه وواصله حدي فلما قرب مثلت عليه اني نايمه بس كنت ابغاه يتعاطف معاي المهم مادريت الا وبعدني ويغمض عيونه يعني بينام قمت هنا قلت له مو معقوله يعني لهالدرجه ماهميتك المهم قعد يقولي كلام قاسي جداً انا ولا كلمه ومن بكرى قالي لااشوفك بالسرير نامي بالارض انا عمري ماطلعت من الغرفه وهو نايم متصالحين متزاعلين بكل الحالات المهم فرشت لي بالارض وصرت انام طبعاً بدت مرحلة الزعل من ناحيته وانا قايمه بواجباتي كامله بس مااكلمه ولاكلممممه انبسط مع عيالي عايشه حياتي انا احب المشاكل لإنها الشيء الوحيد اللي يخليه يتأدب المهم بعد عشر ايام كلمته بالموضوع وتناقشنا طبعاً لاانا اعتذرت ولاهو بس انتهت ورجع للبيت ساعتها مشتاقي لي بس انا ولاول مره خلاص حاقده عليه فلما قرب حاولت اتجاوب معاه وباين عليه وجلست تقريباً شهرين واضح علي اني مو طايقته بس محترمه جداً معاه طبعاً خلال هالشهرين مره راح وجاب لي مجموعة دهن عود وبخو بألف ريال كهديه وبعدها عجانه بألفين وغير لي فرش الصاله جاب اغلى وحده وجو اهلي وحاول قد مايقدر يدلعهم المهم من بعدها هو تغير وتأدب معي وصار يداريني بس صارت مشكله كبيره عند اهله فلما دخل منهم قام يحتقرني وبدأ بحركاته فاللي صار مني يدخل المطبخ انحاش بشكل واضح قام مسكني قال شفيك قلت له اتحاشاك علشان ماتغلط علي وقلت له بحياتي مافكرت اتطلق منه الا بعد المشكله الاخيره انا ادور راحتي المهم ارسل لي انا اسف وانتي غاليه ولاول مره بحياته يعتذر المهم وطلعنا ومشانا ودلعنا وانا انا من جد راح كل اللي بقلبي عليه اصلاً انا مااحب احقد على احد لإني بالاول والاخير اسيء لنفسي المهم قبل كم يوم كل شوي يخرب معي شيء بالمطبخ وكل مااقوله يسوي نفسه مو سامع حاولت اصلح اللي اقدر عليه فذاك اليوم اجتمعت كل اجهزة المطبخ تقريباً خربانه وكل شيء بحاله فوضى فانا دخلت المطبخ وجلست اصيح دخل علي قال وش فيك قلت له كل شيء خربان بالبيت قام صلح لي اهم جهازين وباس ع رأسي قال رأسك سالم قلت له يعطيك العافيه وشكراً وطلع واخذ العيال وكملت اشغالي لما جاء بالليل دخل الغرفه ويناضرني من فوق لتحت انا مسويه نفسي ماانتبهت وقام يهزئني الفلوس ليش مرميه كذا طبعاً ولدي الله يسامحه ع كثر ماقلت له خلهم ترى بيضيعون المهم ويروح يعني الزعلان للمكتب رحت جمعت كل الفلوس وحطيتهم بكيس ودخلت قلت له انا وحده فوضويه خل المصروف عليك المهم قالي انقلعي طلعت من الغرفه بدون ماارد بكلمه جاء ودخل للغرفه قال مستخفخ فيني تراك منب سهل انا ولاكلمه وطبعاً بدأ مسلسل الزعل وعادي عايشه حياتي بس هالمره منكسر مره قال للعيال امشو نتمشى وقولوا لامكم اذا تبغى تظلع معانا فقلت لاعندي شغل طلع هو وياهم المهم انه نزل ينام بالخيمه ومخليته انا ع راحته بس مااكلمه ولاكلمه المهم لما حسيته ندمان امس بالليل ارسلت له مساء الخير ماحبيت اتناقش معاك الابعد ماروق وكتبت له انك استفزيتني باسلوبك الاسلوب ركزت عليه المهم قال انا ادخل عليك وتقولي كل شيء خربان بالبيت ؟؟؟؟ مارديت بس بأخر شيء قلت له بطانيتك ومخداتك مشتاقين لك قال وانا مشتااااق لصلاة الفجر ترى مافاتتني تكبيرة الاحرام من يوم صارت المشكله كتبت له الحمد لله الله يتمم عليه وانتهى خليته لين طلع من الواتس اب وطلعت بعده وخلاص نمت رجعت اتكلم معاه عادي بالاساسيات هو مايبغى ينهي الخلاف الا لما اعتذر وانا بصراحه مقهوره مو معقوله يغلط واعتذر هل ممكن تنتهي المشكله بدون مااعتذر ؟؟