حياك الله أختي الغالية ..
الله يخليلك بناتك ويحفظهم ..

شوفي ياحبيبة خلك حازمة معهم ولينة بنفس الوقت، وبعطيك نقاط طبقيها عليهم وان شاء الله تنفعك:

أولا: جيبي لهم جبسات وحلويات واقعدي معهم، وإذا أكلتوا وانبسطتوا قولي لهم بناتي حبيباتي لما بابا شرى لنا البيت سوا غرفة لي أنا وياه وغرفة لكم، ومو مشكلة نزوركم بغرفتكم وتزورونا بغرفتنا بس وقت النوم كل واحد له سرير، واللي ينام بسريره ولايزعجني أعطيه هديه إذا صحي ..
طبعا لأنهم بيكونون رايقين بيوافقون بسرعة ..

ثانيا: زيني لهم غرفتهم واشتري لهم مفارش حلوة للسرير خليهم هم اللي يختارونها وحطي لهم تحف وألعاب وأبجورات، يعني باختصار خليهم يحبون غرفتهم ..

ثالثا: صحيهم بدري الصباح وأهلكيهم باللعب والساعة 9روشيهم ثم عشيهم إذا صارت الساعة10 طالعي الساعة ثم ناظري زوجك وقولي يالله يافلان وقت النوم احنا نروح سريرنا و.... و.... "بناتك" بيروحون سريرهم، وامسكي يدينهم قولي يالله بوسوا بابا قبل النوم، يمكن يعارضون شوي بس خلك حازمة معهم وامسكي يدينهم لما السرير، ولاتلتفتين أبدا لصياحهم، ثم روحي لغرفتك واقفليها ومهما صاحوا عند الباب لاتطلعين لهم، وإذا حسيتي إنهم طولوها اطلعي وامسكي يدهم بدون لاتتكلمين ورجعيهم للسرير وذكريهم بالهدية ..

يمكن تتعبين أول الأيام، وأتذكر أمي لما استخدمت هالأسلوب مع أخوي الصغير كان يصيح وينام عند الباب ويصير شكله يكسر الخاطر بس ماكانت تلفتله، بس تشيله وترجعه للسرير وكل يوم على هالحالة لين تعدل ..

لازم تخلين زوجك يتعاون معك، مثلا إذا رجع من الدوام يجيب لهم حلويات ويقولهم، هذا لأنكم أمس نمتوا بسريركم ..

هدديهم إنك بتعطين أسرتهم للجيران إذا ماناموا فيها !! لأن الطفل بهالعمر يحب التملك فبيخافون على أشيائهم وبيتمسكون فيها ..

امدحيهم عند أهلك ولاأهلهم وقولي بناتي عندهم غرفة حلوة وينامون فيها كل يوم ويسمعون كلام ماما وبابا، ترى الطفل يموووووت بالمدح عند الناس ...

اقفلي غرفتك بس بأول الليل وإذا ناموا افتحيها، ولو جت وحدة منهم باليل عندكم، لاتقولين شي بس امسكي يدها لين سريرها، وماعليك من صياحها ..

لو طبقتِ معهم هالخطوات بيعرفون إن الصياح ماراح يجيب نتيجة وإنهم بيستفيدون من الحلويات والهدايا لو ناموا بغرفتهم، ومع الأيام بيتعلقون بغرفتهم وبيريحونكم ان شاء الله ..

وبالنسبة لبنتك الكبيرة، إذا سوت كذا خلي زوجك يروح يحضنها ويبوسها ويقول أنا أحضنكم كلكم وأبوسكم لأنكم أسرتي وأنا أحبكم ...
ولو مابطلت هالحركات أنصحكم لاتسوون شي قدامها عشان ماتكبر وتبدأ تتخيل وماراح يصير هالشي بصالحها ...
والصغيرة يحليلها تغااااااار
بس عادي كلها فترة وتعدي، وأنا مريت بهالفترة وأنا صغيرة وبابا وماما ماحاولوا يعدلون هالمشكلة فيني لأنهم كانوا يتسلون علي بس فترة وعدت وماضرتني شي الحمدلله ..


ان شاء الله أكون أفدتك، والله يخلي لك بناتك وأبوهم ويحفظهم لك ..

تحياتي ....