كيف اغير اطباعي السيئه مع زوجي ؟
السلام عليكم ورحمة الله وبركاته
بدايه احب اهنيكم على حبكم للخير لجميع الأعضاء ومحاولتكم المساعده قدر الإمكان
اغلب ردود الأعضاء احسها تطلع من قلوب صادقه ومحبه للصلح بين أي زوجين
في كذا عضو / هـ ماشاء الله ردودهم بلسم جروح لأغلب مشاكل الأعضاء
يارب يكون لي نصيب من حكمتهم وفهمهم للحياة الزوجيه
اعذروني ع طرح مشكلتي بهالشكل لكني سهرانه من 12 الليل ع المنتدى وتحمست اسجل واكتب فكتبت الحين بدون ترتيب واعتذر على الإطاله
ببدأ وبحاول اخليكم ترسمون صوره عني وعن زوجي بدايه
اول شي عمري 23 سنه وزوجي 27 سنه
تزوجنا عن قصة حب دامت 3 سنوات ونص مرت مثل العسل بدون ولامشكله
صار لنا سنه وشهر متزوجين .. وخلال هالسنه وشهر حصلت مشاكل كثيره على اسباب اتفه من التفاهه
زوجي : حنون .. مخلص .. وفي .. طيب قلب .. بيتوتي .. قليل كلام .. بس فيه شي ماحبه "بارد يعني كل شي لازم بطلب "
انا : دلوعه"احيان دلع ماصخ" .. قياديه "او مثل مايسميني دكتاتوريه" .. طيبة قلب .. كريمه .. وابي كل شي كامل
المشكله انه ابحث عن مشكله من لاشي يعني احس اني انسانه نكديه .. ساعات احز بداخلي اني مو راضيه عن شخصية زوجي وتراكم بداخلي اشياء بسيطه لكن كبرت مع الايام وادور أي شي عشان انفجر
يعني مثلا ودني لأهلي الحين قال تعبان بريتاح وبعد شوي بوديك اقول لا الحين يعني الحين انت بارد وانت بس تبي تجلس وتتابع كوره وتقلب بالنت وانت وانت واقلبها لمشكله كبيره تنتهي بتجريح وصراخ وتكسير .. انقلب لإنسانه عدوانيه لاعصبت
واجلس ابكي الحالي واقول ليه اسوي كل هالأشياء وماألقى سبب بس يمكن تحطمت اني تخيلت حياتي كلها حب بحب ومو قادره اقتنع ان الزواج فيه روتين ممل دوام ونوم وجلسة تلفزيون
للأمانه دايم يطلعني ونتمشى يعني يمكن 3 ايام من اصل خمسه تمشيات ويومين عند اهلي لكن مع هذا فيه شي ماعرفه يخليني دوم مستاءه من الوضع وادور أي شي .. للأسف تحمل مني اشياء واجد محد يتحملها وقت الزعل من سب وشتم وتجريح وتمنن بمساعدتي الماديه له .. لكن وقت الرضى يقول مالقى منك ثنتين ويذكر محاسني وابكي احس ماستاهل هالكلام
وقت الزعل صار يقولي انتي دكتاتوريه وكل شي بحياتنا من تزوجنا يمشي على امرك .. كل كلامك يتنفذ قلتله انت اللي تشاورني وتاخذ كلامي
انت اللي مالك راي وعديم شخصيه وتحطها فيني .. وانا لاطلبت من نفسي لاني اعرف مكانتي عندك ودامك تنفذ لي من غير طيب نفس وتكبت وتجي تقولي دكتاتوريه عمرررك مانفذت لي شي مابي شي
ادري الغلط راكبني من راسي لساسي .. واللي قاهرني ولا مره زعلني انا ابحث عن اشياء مستحيه حتى اذكرها من تفاهتها واكبرها بشكل ماتتصورونه لين اخليه ينفجر فيني ويدفعني بقوه اقرب مالها صارت مدة يد مو بس دفع مثل مايقول بس استاهل اوقف بوجهه وانرفزه حييل
انا مابي اخسره لانه يسوى روحي .. صحيح ابيكم تقسوون علي بدون تجريح وترشدوني لكن للأمانه انا فيني ايجابيات
اولها الماديه عند اهلي الحمد لله مرتاحه مادياً وعنده اصرف على حالي وعلى بيتي من اهلي لان حالتنا الماديه مش ولابد يعين الله ويامى سعادته بشهاده منه + عند اهلي ماحرك شعره وببيتي احاول ارضيه قدر مقدر ماعرف اركب شاهي اول والحين اطبخ له اللي يبي +استقبله عند الباب من تزوجنا لليوم لازم اوقف عند الباب اول مايفتحه اكون قباله + لاجا ينام لازم اسوي له مساج + اجلس دايم عنده اتابع كوره مع اني اكرهها بس لاني احب اكون حوله واعتزلت مجلس الحريم وتلفزيوننا الثاني بس عشان اكون بقربه + اسولف عليه دايم وهو من النوع الهادي بس وقفت قولة سولف لي سولف لي ورضيت بالامر الواقع + قدمت على جامعه بكمل بكالوريوس بما ان مامعي الا دبلوم شجعني بالبدايه بعدين اكتشفت انه مو قادر يوفر لي المبلغ فسحبت ملفي وقلتله ماعليه + لما اطلبه شي بسيط للبيت وبما اني ابي كل شي كامل اللي يقهرني كل شي بعدين ان شاء الله زين ولااشوف شي الا بعد ماقلبها حزن + بدخل نادي بشوف العالم من تزوجت ماشوف الا هو واهلي ويقول ماله داعي حنا بنمشي بالممشى !! مدري وشو .. لانه يكره الالتزام مثل مايقول وشي ثاني دوامه شفتات فمابيقدر يوفي بين النادي ودوامه
ياناس صرت اخاف من كم جمله رسخو بذهني " انا تغيرت يافلانه .. انا مليت عنادك وعصبيتك .. اذا قلتلك يمين يمين يسار يسار .. انا الرجال والقوامه لي ." طبعاً للامانه قالها بعظمة لسانه يافلانه تدرين ان كل شي تبينه بسويه لك وبيمشي اللي تبينه بس عطيني جوي وقولي ابشر وسم وتدرين ان اللي تبينه بيمشي
بس مدري ليه مو راضيه اهجد وابطل اسلوب الأمر .. كل شي ابيه كامل .. بس وراه وراه سددت السياره ؟ هات فلوس الشقه بجمعها عندي .. دفعت القرض ؟؟ >> من فتره وضح لي انه مايحب هالاسلوب وانه يعرف اللي عليه "حز بخاطري لاني ماخذه همـنا وهو شايف اني معتبرته انسان مايعتمد عليه"
ارشدوني كيف اعدل عيوبي المشكله اعرف عيوبي بس كيف اغيرها ؟ وعلى فكره انا كنت انسانه مرحه مره بس من اول شهر تحطمت من شخصيته انه قليل كلام وكنت متخيله حياة كلها كلام حب في حب ادري مو واقعيه بس شسوي وبعدها تأقلمت بس يظهر اني من داخلي للحين مو مقتنعه بهالحياة مهما قدم لي
انتظر نصائحكم ورجاء بدون تجريح
التعديل الأخير تم بواسطة دكتاتوريه ; 02-10-2009 الساعة 07:52 AM