منتدى عالم الأسرة والمجتمع - عرض مشاركة واحدة - هناك شعور لايحكى ولا يبكى ولا يكتب..هو يؤلم فقط!
عرض مشاركة واحدة
قديم 29-01-2013, 12:31 AM
  #1
مليت!
عضو مثالي
تاريخ التسجيل: Jul 2011
المشاركات: 228
مليت! غير متصل  
هناك شعور لايحكى ولا يبكى ولا يكتب..هو يؤلم فقط!

سبق وطرحت مشكلتي..
ورجعت طرحت..
وأرجع في كل مره أطرحها..
أبد ملقيت حل..
بس لمن أتعب وأحس إني بلا شعور..وبضياع..وبتشتت..أرجع أكتب..
أبي أحد يسمعني....

أنا وصلت لمرحلة في حياتي أبد ماكنت أتخيل أمر فيها..
كنت من طولي شبر..أسمع مشاكل فلانه وعلانه...
وأوقف مع المقربين بالنصح وكانوا يرتاحون لكلامي..ويحبون يشتكون لي..يقولون عني حكيمة!
كنت أقول ليش الناس معقدينها..!
الرجال بالذات مو صعب!
بيبي كبير!
سهل إمالته ..شوية دلع وتغنج وتدليع وكلمتين حلوة وشوية إهتمام تجيب رأسه...

لين صارت حياتي بذاتها معقده..
ودريت إن الرجال يمكن وش ماسويت صعب أجيب رأسه لو عطيته اللي أصلاَ اللي يتمناه..


أنا مدري وش مشكلتي!
ولا سببها!
ولا ليش!
هو مني!
أو منه!
صرت ماأعرف والله!

عالجتها بكل حيله..
بكل طريقة,,
بكل شي أتوقعه..

ماأفلحت!

ماأفلحت!

ماتتخيلون وش بصدري وكيف بس أوصله لكم!

أنا خلاص قربت الأربعين!

حياتي كلها اوكي

أنحسد عليها..

لكن...

في هالعمر وعيال صاروا طولي..

وش أبي؟؟

وش طموحي!

أبي بس زوج حنون هادي طيب متسامح كريم أخلاق!

هل أمنيتي صعبة بالله!

سنة وكم شهر...

مالمسني

ماأشتاق حضنه لي

مالمسني بيده بحنيه!

ولا حتى قال نامي بحضني!
نامي على كتفي!

كلمة حبيبتي وعيوني ماعاد يقولها لي..

ننام ع الفراش كأننا أغراب!

عايشين في البيت مثل الأخوان!

غربة روح بكل معانيها!

كل مارقعتها من جهة أنشقت مع جهة ثانية!

فوق الحرمان العاطفي..

اللي ممكن أتغاضى عنه...

مو محصله حتى أستقرار نفسي وهدوء

عاصفة غضب بإستمرار في البيت

على كل شي ومن كل شي

وسوء نية لكل تصرف من تصرفاتي

العيال ملوا

وأنا مليت

الحوار أبد مايسمع مني ولا حرف أقدر أنطق كان يذبحني

أي تبرير لأي تصرف أساء فهمه ياويلي

أي عتب غير مقبول

أنا تعبت حقيقة من المشاكل أكثر من تعبي من حرماني حقي الشرعي في الفراش!


ليش كمية الغضب!

ليش كثرة النقد!

حياتي معه توجيه ونقد أنا خلاص ماعاد أتقبل منه!
عافته نفسي...

صرت كتلة هدوء لأي ردة فعل قاسية منه...
ومع ذلك مستمررر


أقسم بربي إني مبليه وإني أبد ماأتصرف تصرف يستحق الغضب
وإن المشاكل تخلق لي بلا سبب وبلا ذنب

تعبت نفسيتي

أقسم بربي تعبت

لولا ديني وخوفي من الله كان ممكن أرتكبت جريمة فيه أو فيني

أقسم بربي عالجت حياتي برقية وبهدوء وبصمت وبطولة بال وبلا نتيجة ولا واحد في المية

أوقات يهدأ ويعطي وحريص يعاملني برقي

وبلحظات يقلب علي

أقسم بربي شكيت معه إنفصام بالشخصية!

حسيته مزاجي!

فجأة يرضى بعد عاصفة سب وذم

وفجأة يقلب علي!

لي فوق عشرين سنة متزوجة بس ماعرفت وش يبي ولا وش السالفة!

عشت لنفسي وأولادي وقمت بحقوقة اللازمة وقلت بكيفه ومع نفسه

بس يتبلاني

أقسم بربي يتبلاني ويخلق مشاكل

أنهارت أعصابي

حتى صلاتي يذمني فيها أني العب على ربي

حتى ممارستي لرياضة المشي اليومية ينتقدني فيها

دايم ينتقد أي توجه ديني لي من صلاة أو إستغفار أو قراءة قرآن

لو رفعت صوتي شي بسيط لبنتي وحنا بالسوق على طول نقد لاذع يشبهنا بقليلات الأدب بذكر مسميات قوية على مسمعنا!

أسلوبه جداً غير مقبول في النصح والتوجيه

غير كذا معقولة بس هذا اللي نسمع منه!

من اللي نفسه تتحمل!

ماأشعر بمعنى الحياة الزوجية معه!

حتى أنا صرت مثله

فترت عاطفتي

ماقدرت أتقرب منه وأتودد له بالذات الفراش
خاصة لمن كان مايقدر يخلص شي معي

كنت أتحطم وأحس بموت وكأني أهوى من جبل

والحين

من كثر مايردد إنه ماله خاطر فيني
وبالفعل مافيه أي مؤشر يناقض كلامه

صرت ماأقدر أتقدم خطوة معه

لأني مهما تقدمت وحاولت أدحدررر

ظنيت فيه كل الظنون من سوء عشرته
عاشق لغيري,مريض نفسي..مريض روحي..ملل..طفش..تقلبات العمر الحرجة..ضعفه الجنسي..

وتعاملت مع كل مشكلة بصبر..

بس ماحصلت إلا تراب بوجهي ..
وكأنه معلق على جبهته..عذرا الطريق مسدود!

العصبية أعتبرها مرض قاتل للشخص والمحيطين فيه

رغم إني بعد عصبية بس أخذ وأعطي وأحس بالذنب واشتاق ويحن قلبي وينكسر

بس للأسف عصبية زوجي مخليته بنظره إنه صح وحنا مخطين
رغم إن مشاكلة تكررت مع غيري في العمل ومحيطه بس عصبيته معي ممكن بلحظة تنهي كل شي!
رد مع اقتباس