مشاكل لاتنتهي تحملوني وخصوصا الاخ الكريم الزعيم خالد
قبل كم يوم رحنا لأهالينا واحنا راجعين في السياره للبيت انفتح موضوع بالصدفه وذكرت لزوجي بان اهله ماعزموا اهلي في يوم ملكة اخوه وفي زواج ولد عم زوجي ماعزموا كمان (بس زوجي دق في عصريوم الزواج وعزم الوالد والاهل) اما ملكة اخوه لاعزموا ولاشي
المهم توقعت الاعتذار من زوجي مادريت الا ويقول الحمد لله اننا أخذنا منكم عشان تعلمونا المذاهب
طبعا استصبت وتفاجئت من الرد وزعلت في خاطري قمت قلت طيب تعلموا أجل يصير ماتعيدوها مره ثانيه
قام يقول راجع مبسوط مستانس ونكدتي علي ياحبك للنكد شوفيني تنكدت الان انبسطي لاحول ولاقوه الا بالله طيب انا وش قلت وش عرفني انه بيزعل كذا لو ادري كان انطميت ومافتحت فمي لكن هو اللي يبغاني اتكلم واسولف بالغصب يبغاني اتكلم ولما اتكلم يزعل اذا الكلام ماجا على هواه ويقوم يرمي علي كلمات تجرح ونزعل من جديد
المهم وصلنا البيت وهو لاوي البوز بعد محاولات كثيره مني لارضائه في السياره لكن دون جدوى وكلها باءت بالفشل ولما دخلنا البيت قبلت جبينه وخدوده وخشمه قلت اسفه اسفه اسفه ماعاد اكرر خلاص افردها وابتسمت استمر على زعله شوي بس رضي بعدها وقال لاتفتحي ذا الموضوع نهائي قلت ابشر
صرنا حبايب يامحلانا
كلها ساعات نمنا وصحينا وطلب مني صرافته عشان يشتري جزمه للعيد وانتم بالكرامه قلت ابروح معك عشان اشتري جزمه للولد قال انتي ماتنتهي طلباتك مع انه يوم واحد فقط رحنا اشترينا اغراض العيد قبل شهر رمضان قال من وين الفلوس قلت من عندي ماعرف وش يقول قام قال لا منتي رايحه طيب ليه منت رايح رايح خلينا نروح مع بعض لا مالها داعي ولا ابغاك تجين قلت ليه لا وش بينقص منك لو رحت قال منتي رايحه وبس
طبعا جلست اطالع فيه بقهر لانه دايما يرفض اني اخرج للسوق من القهر قمت قلتله الصرافه نسيتها عند اهلي وخرجت للمطبخ جلس ينادي وانا مطنشه بس رجعت على طول الا وهو لاحقني للمطبخ ويقول ماتسمعين في النكد ويصارخ بأعلى صوته ويقول الله لايجعلك ترضين وانا ساكته قام قال والله لو ماتعدلتي لاسطرك كف على وجهك ويهز بيده عند وجهي انا لما قال كذا وقفت والتفت عليه طبعا لو انطق بحرف ضربني بس تعوذت من الشيطان ورحت للشنطه وطلعت الصرافه واعطيته أخذها وخرج من البيت يسبسب ويشتم
دخلت المطبخ قفلت الباب وجلست على الارض ابكي
قمت مسحت دموعي وكملت طبخي وجهزت سفرة الفطور رجع للبيت وافطر وانا بس شربت مويه ولافه وجهي عنه عشان مايشوفني ودموعي تنزل
الا ولدي يقول بابا شوف ماما طبعا ماحرك ساكن
جالس يتفرج وياكل بعد مااكل شلت السفره ومن وقتها وانا قافله على نفسي الباب وجالسه لوحدي عشان مااقول كلمه بالغلط ويتنكد ويقلب البيت على راسي
رحت نمت وصحيت شوي عشان ولدي الا يقول لي سوي قهوه سويت له وحطيت معه حلا وحطيتها عنده ورجعت لغرفتي
طبخت السحور ونفس الحكايه ولاكلمه
الرجال ذا طفشني من الحساسيه الزايده والزعل والهواش طول الوقت وعلى اي شي كيف أتصرف معه ؟؟ قلت والله ماعاد اكلمه الين يعرف كيف يحترمني ويتفاهم زي العالم والناس ؟؟ وناويه اخذ ولدي وانام في غرفه لوحدي عشان أريح راسي واريحه من التنكيد اللي يقوله كل مايصير شي او اقول شي قال تحبين التنكيد
او اكلم الوالد يتفاهم معه !! في بالي اروح لاهلي وماعاد ارجع نهائي راح عمري وانا بس اترضى واترجى في هذا المخلوق !! وش رايكم؟؟
أحس نفسي احزن ارسلتله قبلها رساله بمناسبة العيد وشوف كيف صار عيدي بسببه؟؟*

__________________
اللَّهُمَّ إِنَّا نَسْأَلُكَ نُفُوساً مُطْمَئِنَّةً تُؤْمِنُ بِلِقَائِكَ، وَتَقْنَعُ بِعَطَائِكَ، وَتَرْضَى بِقَضَائِكَ.