عزيزتي ريتاج حاسين فيكي وخاصة الغيرة مش بالايد
بس دايما المرأة لازم تكون اذكى من عواطفها وتحسب حساب لقدام
يعني بهيك فرجيتي زوجك نقطة ضعفك وبعتبر هالشي غلط
لانو بس بدو يستفزك صار يعرف كيف
و هيك اذا الفتاة ما بتعنيله شي بتصيري تحطيله افكار براسه ويصدق اللي عم تظنيه
لانو مهما قالك المفروض تعرفي قيمتك عند زوجك ولا تحسي بالنقص او انك اقل اهمية
واحساسك بيوصل لزوجك وبيصير يشوفك بالمنظور اللي بتشوفي فيه نفسك
وبما انه شغلك مع رجال وبحدود ضمن عملك ممكن هو بيكون شايف انو ما دام بيناديلها اختي ما اتخطى حدوده وكمان من غيرته ما لقى الا هالطريقة ليستفزك وشاف نفسه انو نجح

ولو في شي مستحيل اي رجال يقول لزوجته تعي شوفي شو عم قول وشو عم احكي الا ليغيظها
واللي بيحكي ما تخافي منو
لو في شي مستحيل يفتحلك عيونك على هيك اشيا

وانا بشوف مهما كبرت المشاكل ما لازم تطلع الزوجة من البيت الا وقت يكون في اذى كبير كالضرب وخيانات جسدية وتكون حاطة براسها انو ممكن توصل للطلاق
فيكي كان تزعلي وتاخدي موقف ويعتذر منك انت وببيتك ويوصلك حقك واكتر كمان
بس نصيحة عم تقولي شاكة وما عم تلاقي شي وهون المشكلة انو عم تسمحي للشيطان يدخل بيناتكن وتخلي الافكار تاخدك وتجيبك
فإنتبهي من هالشي لانو بيدمرك الك اول شي والغيرة مش سهلة حرق اعصاب ودمار للنفسية وسبب للمشاكل
خدي حقك بذكاء وما تخلي زوجك يقهرك بأنثى ولو ما بتعنيله بشي

دايما اشتغلي على العقل الباطني عنده ان قلك بعملك بلوك وما بعملها الها ردي وقوليلو بعرف مكانتي عندك حبيبتي وانا جوهرة انت اللي كسبتها
اي شي بيصدر منه وبيحطملك من ثقتك احكي العكس وما تظهري اللي حاسستيه
وهالشي بيقويكي وبيعلق زوجك فيك اكثر

والله 15 سنة زواج وبيصير بيناتنا مشاكل ومرات بنتخطى حدودنا بالحكي وبتقولي هيدول مستحيل يجتمعوا سوا وبسمع اكتر من كلمة البلوك اللي قالك ياها زوجك بكتير ولو اجت عالوتر الحساس مستحيل بين هالشي
وبقول عم يستفزني متل ما انا بستفزو
الاغلب الرجل بيعمل عكس ما بتطلبي منو
يعني رح تقوليلو اعمل بلوك ما رح يقلك اطلبي وانا بنفذ رح يرفض بس عنادا ولو عارف انو الحق معك
فأنا وقت اسمع كلام مستفز بظهر العكس وبظهر ثقتي بنفسي اكثر واقوى وهالشي بيعكس ايجابا
وقت بدنا ناخد موقف ناخده بذكاء ليعرف الطرف التاني حجم غلطه
والا بيصير في عناد وبيضيع حق المظلوم
مرات بنعصب وبنختلف بس خلينا نعصب ونزعل ببيتنا ونفش خلقنا وبعد شوي ما كأنو صار شي
ومن تجربتي لتقوى العلاقة الزوجية مع مرور السنين ما لازم نخلي الخلاف يمتد لليوم التاني
لانو بالاول بتكون صعبة مع الوقت بتصير عادة وما عاد يأثر وبيصير في فجوة
من دون مبالغة والله شاهد على كلامي البارحة صارت مشكلة بيني وبين زوجي حسيت حالي مش طايقته وحكيت حكي شمال ويمين وكبير وكان دمي عم يغلي ومش قادرة اتصوره
بعد ربع ساعة مر من حدي طلع فيي وطلعت فيه لا شعوريا ابتسمت ما بقدر ضل زعلانة وماخدة موقف مش متعودة وما بقدر الا لاضحك بس شوفه من بعد ما روق
ودغري اجا اعتذر مني وخلص وانتهت المشكلة بأبسط ما نتصور
بانو بإيدنا بنكبرها وبإيدنا بنصغرها
لو متعودة ازعل كان هلئ بيناتنا في فجوة كبيرة
بس حياتنا مهما مرت بمشاكل بعد شوي ما كأنوا في شي وبنرجع احسن من قبل
ما في شي مثالي بالحياة في الحلو وفي المر
فبرأيي ما تخيري زوجك يا أنا او هيي بالعكس قوليله بوثق فيك وبعرف مكانتي عندك
وبطريقتك واعرفي الوقت المناسب واشتغلي على نقاط ضعف زوجك وبشكل غير مباشر بتخليه ما يحكيها كلام يزعجك او حتى يبطل يحكي معها من دون ما يكون طلب مباشر منك

وخاصة اذا ما كان في كلام بيناتهم خارج الطريق متل ما سبق وقلتي انو بيقلها اختي وهيي بتقلو اخي
اسأل الله ان يسخرك لك زوجك كما تحبين

احترامي

__________________





اللهم إني أستودعك ديني و نفسي وأهلي وزوجي
وأولادي وأحبتي فاحفظهم يا من لا تضيع ودائعه