أختي حتى يرد البليغ ورجل الرجال جزاهم الله خير ونفع بهم
بقولك شي
واستهدي بالله وتعوذي من الشيطان الرجيم..
انت في وادي .. والزواج في وادي ثاني
وإن جلستي بهالتفكير ليكرهك زوجك ولتجيبين العيد بنفسك..
عندنا مثل يقول ( أعطي الخبز لخبازه لو أكل نصه)
وزوجك مثل العجينة بين ايدينك ولكن للأسف انت لست بالخباز
ما تعرفين كيف تتعاملين مع هالعجينة.. متى تزودين إضافات أخرى ومتى تحسين انه لا كذا تمام..
كيف تشكلينها .. و....... و...... ومتى تخبزينها وكم تكون درجة الحرارة !!!!!
طريقة تفكيره ... وش يشده ويعجبه... وش يزعجه .. وش يخليه يفقد أعصابه.. وش اللي يخلي رصيدك ينزل في قلبه وش اللي يرفعه...
الرجال أول الزواج يولهون على زوجاتهم وشوي شوي يسحبون انفسهم.. وبعد فترة يرجع أشد من قبل في علاقته بزوجته
وهكذا طول فترة الزواج... مثل المد والجزر بالضبط..
ولمن يبعد مو كره أو انك ناقصه في عينه أو اهمال لك ... هو يحتاج فترة يجدد نفسه وينشغل بشي ثاني عشان يرجع بشكل أقوى....
وتصرفاته معاك بصراحة تظهر بشكل جلي حبه لك ولكن انت معميه وطريقة تفكيرك مختلفة عنه تماماً لذلك يحدث التصادم.. وبفضلك أنت أصبح عنيف جداً.. وأتعبتي نفسك كثير وطولتي الطريق على نفسك وهو قصير
لماذا العصبية .. لماذا الرد ورفع الصوت " والمرادد" ولا اغلبوهم بالصوت
ما يتعب أحد غيرك .. ولا يتنرفز أحد غيرك... وفي النهاية الأمر اللي تبينه ما يمشي على كيفك..
اقتباس:
|
مره اشتد النقااااش بيننا قال ليش تفسرين الاموور كذا تفكيرك تعبااااان جداا
|
راجعي نفسك .. وانتبهي .. هذا دليل كافي على انك تمشين عكس التيار
وزوجك له مفتاح بعد ما وصلتي له وقاعده تجربين طول الوقت مفتاح واحد وغلط بعد ومو مناسب
ومفتاحك الغلط هو ليه ما تفعل .. ليه ما تعمل ... ليه ما تقعد ... ليه ما تقول ... كله انتقاد في انتقاد لتصرفاته وحتى كلامه معاك..... يا أختي لو فيه مجال وده يتحسن ويتغير ماألومه لو يهون ويغير رأيه لأنه متشبع الآن بفكرة انتقادك له
الزوج حقه عظيم.. ومكانته عظيمة .. انتبهي لا تضيعين دنياك وآخرتك سوا
والحل ذكره لك وريحك من التعب لكن الله يصلحك
اقتباس:
|
دايم يقولي احتاج الكلام الحلو والاسلوب وانتي بامكانك تملكيني انا بين ايديك
|
أختي انت عندك كلام حلو بس أسلوب اسمحيلي هذا اللي ينقصك..
***
عجبتيني في قصة الآيفون وطقم الذهب.. حلو من فترة لفترة يجيب لك شي يعجبك
لكن لا تدوخين عمرك .. والله لو مو حريص عليك ويحبك كان استمر وسحب عليييييك وحطي هالمعلومة حلقه في إذنك
مشكلتك تتلخص بالسكن .... وجلوسه معك ...
حطي في بالك صرف الفلوس زيادة معناته راح تطولون وما سكنتوا في بيتكم
يعني راح ترجعين للسكن عند أهله من فترة لأخرى... هل يعجبك هذا الحل؟؟
وبما أنك عند أهله والبيت قائم إنشائه ... إذن الحمد لله قريب تفرج
شطبوا دور أو شقة أو اللي يكون في الدور الأول وانتقلوا واسكنوا .. مو لازم تنتظرون لحد كامل البيت ما يخلص.. وبعدين شوي شوي يخلصه..
أختي زوجك يبني بيت.. عارفه كم يحتاج هالبيت لحد ما يخلص؟؟
عارفه أسعار الإسمنت والبلوك والحديد وأجرة المقاول والأيدي العاملة؟؟
عارفة التشطيب وتبعاته .. من سباكة وكهرباء وغيره وغيره لحد ما يوصل لهذا اللون الجميل اللي يغطي الجدران اللي يسمونها بويات!!!
أختي أسألك بالله كم يدفع زوجك للمقاول؟؟ شفتي العقد اللي بينهم؟؟؟ محتفظه بهالقعد ؟؟
تعرفين اسم هالمؤسسة .... كم يدفع له ع المتر؟؟؟ وعلى كم دفعه متفقين؟؟ وكم المدة الزمنية إن وجد؟؟؟
كم عامل تقريباً يشتغلون في بيتكم؟؟ تعرفين جنسياتهم؟؟
عندك دفتر تسجلين فيه وتساعدين زوجك في تسجيل المصروفات على بيت العمر
أي مبلغ يدفعه تسجلينه وتساعدينه؟؟ عشان ما ينسى مستقبلاً كم حط وكم جاب وكم دفع
الباب اللي تقولين يختاره هو وأهله تعرفين كم سعره لو بالتقريب؟؟
ما أبي منك جواب هنا ... جاوبي في نفسك واعرفي وضعك مع زوجك..
إذا كنتي مهتمه للأمور اللي يهتم لها وتاخذين وتعطين معه في اللي يشغل باله... اعرفي انك زوجة رائعة ويحق لك تطالبين ببعض الوقت لك..
إذا تعرفين كم دخله وكم من هالدخل يروح عشان بيتكم صدقيني بتعذرينه..
وإذا معلوماتك بسيطة وضعيفه ..... أقولك ليه يسألك عن الباب ووش الموديل اللي عاجبك ؟؟.. خلاص أخذ على انك بعيده عن هالسوالف وريح راسه... وياخذ العلم من اللي واقفين معه ومهتمين لوضعه
وانت شوفي وضعك وادرسي نفسك..
بالنسبة للصلاة؟؟
إذا نام تصحينه وتحرصين على الصلاة في وقتها ؟؟ ولا صحيتيه مره ومرتين وبعدين تتركينه خلاص وهو يجمعها؟؟
هنا بعد تحتاج أسلوب..
إذا كان صاحي إلعبي معه و حركيه ونشطيه وذكريه بالصلاة وقوليله بعد الصلاة نتقابل
إذا كان نايم اقعدي جنبه دلعيه لحد ما يضحك ويتبسم وتحسين النوم خلاص طااااار وبعدين عطيه على راسه وقوليله قوم صلي ياباشا أحسلك
أكثري من القراءة واستماع المحاضرات في تأخير الصلاة وغيرها من الذنوب وزودي زوجك بهالمعلومات
وتناقشوا فيها .. وتعاهدوا على انكم ما تقصرون في هذا الجانب أو ذاك...
خير متاع يا عزيزتي الزوجة الصالحة ...
واهتمي في دين زوجك ليرضى الله عنك أولاً وبعدها بتزين حياتك أكثر وأكثر..
****
بالنسبة للبس إذا نظفتي القلب أول وحطيتي في عقلك المعلومات المسانده والصحيحة
وصارت روحك حلوه وابتسامه جميلة على وجهك ...ساعتها إلبسي واكشخي
مو شرط في البداية قصير... فيه بنطلون ... بلايز مكشوفه ....
مره لبس ساتر ومره لبس كذا وكذا .. نوعي نوعي ..
وهذه الفترة اهتمي ببشرتك وترطيبها خذي كريمات تحتوي على كولاجين ..
*****
زوجك وخياناته ؟؟ متأكدة؟؟؟
شفتي بعينك وسمعتي بإذنك؟؟؟؟
ولا تواجهينه بأي شي لأنك ان علمتيه انك عارفه خلاااص ماعاد فيه خوف ولا بيحسب حسابك
ولا توترين نفسك ولا تزعلين عمرك..
لأنك بتشدين عليه وتخلينه يهرب لهالأمور
يعني بدل ما تبعدينه تقربينه من هالأمور وتخسرينه..
إذا تأكدتي ...... وشفتي بعينك ......
ابتسمي إلا اضحكي وقولي أنا لها ما بتجي وحده من الشارع وتسرق زوجي مني
أو بيلقى عندها شي مو بعندي.....
ولمن تتمكنين وتصلحين كل أمورك معاه وتبعدينه عن الخطأ فاعرفي أنك أولاً كسبتي أجره..
وثانياً حميتي اسرتك الصغيرة... وثالثاً أنت عظيمة ورابعاً تقدرين تكشفين نص أوراقك مو كلها
مع تحذير بسيط بأن لا يلعب بذيله مره أخرى لا يشوف شي ما يعجبه والمرة الأولى له لكن أكيد الثانية عليه
أنصحك قوي علاقتك فيه أكثر وأكثر.....
*******
ومانع الحمل اللي تستخدمينه واضح له دور في عصبيتك.. أنصحك تزوري طبيبتك وتسأليها عن لصقات إيفرا EVRA
مانع للحمل جيد إذا استخدمتيه بالطريقة الصحيحة ويخلصك من آثار المانع السابق اللي على رأسها العصبية..
بالتوفيق...
التعديل الأخير تم بواسطة العـ/الفريد/ـقد ; 06-12-2011 الساعة 04:23 PM