بالنسبه لسبب الطلاق لا مو من حق اي انسان يسأل ليش طلقت او ليش تطلقتي
انا لما تزوجت الثانيه وهي مطلقه ماسألتها ليش تطلقتي لانه هذي اسرار وانا ماكنت بحياتها وقتها ولا لي اي دخل في اللي حصل بينهم الله يستر على خلقه
والرجال راح ولا المفروض تجيبين سيرته لابخير ولابشر اذا سألك قولي شي وانتهى ولا احب اتكلم عن احد وخلينا بنفسنا بس كذا الرجال راح يخترمك ويعرف انك انسانه مانتي حقت نقل كلام ويدري ان اسرار بيته ماراح تطلع

اما المهر نعم اختي يختلف مهر البكر عن المطلقه ويختلف المطلقه حسب العمر وهل عندها اولاد والا لا
وعاداتنا حنا اننا نقول نتشري رجال ولا نطلب مهر وهالشي صدقيني هو افضل شي من كل النواحي لانه راح يحس انكم شارينه وماراح يقصر
اما موضوع الاولاد اختي على حسب الخاطب اذا كان عنده اولاد وراح يسكنون بنفس البيت هنا يخاف من المشاكل اللي ممكن تصير بينهم ويفضل انه يقفل هذا الباب
اما لو كانت ام عياله عنده وعيالها عندها او ماكان عنده عيال فـ مافيه مشكله لو كان عندها عيال بالعكس هذا باب للاجر طبعا اتكلم عن نفسي ولكن بشرط ان امهم ماتتحسس مني يعني اذا تبيني اعاملهم مثل عيالي معناته راح اشد عليهم اذا اخطوا فـ اذا كانت الام حساسه من هالشي راح يكون فيه مشاكل