السلام عليكم

جائتني خادمة قبل مدة 6 شهور تقريبا .. الخادمة هذي ما تمسك عيالي ابدأ .. جايبتها فقط للغسيل والتنظيف بحكم اني امرأة عاملة + حامل

المهم .. احيانا بنتي تروح تلعب معاها .. بنتي صغيره عمرها 3 سنوات .. وهي تروح الروضة

في مرة من المرات وانا امشط شعر بنتي صعقت لوجود القمل في رأسها ..خصوصا ان بنتي تتحمم يوميا .. وبديت اهوجس انها نقلت لي انا بعد

المهم جبت الشامبو الخاص بالقمل .. استخدمته لمدة اسبوع كامل .. طاح جزء كبير من شعرها مسكينة من قوة الشامبو .. استخدمت الخل الاسود كمان و زيت الزيتون لي لاني ما اقدر استخدم الشامبو

طبعا انا كان لازم اعرف مصدر القمل .. شكيت انها جابته من المدرسة .. او من الشغالة .. لانه عمرنا ما قد جانا قمل قبل كذا

كلمت الشغالة .. ومراعاة لمشاعرها قلت انه احنا اشترينا شامبو للكل لازم نستخدمه لانه اكتشفنا في شعر بنتي القمل .. ما حبيت اوجه لها اتهام خصوصا انني مو متأكدة

المهم هي اعترفت بعدين انه في شعرها قمل .. طبعا هنا بغيت اصفقها بس تمالكت اعصابي .. عطيتها الشامبو .. والزمتها بغطاء الراس .. هي كانت اول رافضة تلبس لانها تشوف شغالات اهلي ما يلبسون وتبي تسوي مثلهم

بدينا العلاج في بنتي .. اختفى القمل من شعرها الحمدلله في غضون اسبوع .. الشغالة ما فتشتها برضه احتراما لها بس عطيتها الشامبو ووريتها وشلون تستخدمه

مع انه اللي شفته في بنتي كان بس قملة واحدة لكن اخذ شعرها اسبوع لين تنظف .. واشوى اني اكشتفته بدري

الاخت الشغالة جاية من ثاني يوم من استخدام الشامبو تقولي خلاص راح من شعري .. قلت لها مستحيل كملي اسبوع على العلاج .. بس الظاهر انها كانت خايفة على شعرها وما كملت .

الحين بنتي مأجزة من المدرسة وانا على وشك ولادة .. وادعوا لي بالفرج .. رحت لبيت اهلي .. طبعا الشغالة رجعت شالت غطا الراس حقها .. وكل ما اقولها غطي شعرك تسوي نفسها ما تسمع

انا من هذاك اليوم وانا افتش شعر بنتي بشكل دوري .. المهم الان اكتشفت اني في شعرها صيبان على الرغم من انه تنظف في العلاج السابق 100 %

معناته مصدر العدوى مازال موجود .. وهنا ما يحتاج التخمين .. الشغالة


يعلم الله بحالتي والله اني في الام نفسية وجسدية بسبب الولادة .. وقاعدة انظف شعر بنتي من جديد

الحين بعد السالفة الطويله اللي فوق

1. وشلون اتعامل مع الشغالة .. كيف اتأكد انه شعرها نظيف ؟؟ انا كان ممكن من البداية اني فتشت شعرها من نفسي لكن دايم اقول احتراما لكرامتها لا يمكن اسوي كذا

هل مثلا ارسلها طبيب الجلدية يتأكد ..هل ممكن يقبل حالات زي كذا ؟؟

2. وش اسوي في بنتي .. والله اني تعبانة الطلق يروح ويجي وما عدت اقدر انظفها .. هل في علاجات معينة ممكن استخدمها .. انا ما شفت في شعرها هالمرة قمل بس صيبان .. هل معناته انه في قمل بشعرها ؟؟ والله انها تنرحم صاير جزء كبير من شعرها مصلع بسبب الشامبو

ادري طولت بس ما استغنى عن ارائكم

شكرا

__________________
احفظ الله يحفظك