قصيدة كتعزية لأحد أصدقائي في وفاة أخيه
اصبر واحتسب
ياخوي تجول بخاطري عدة أبيات
قلت أنثرها لك عساني أرتاح منها
اصبر واحتسب أجرك على كل مافات
ترى الصبر درة مايتقدر يالغالي ثمنها
كل مخلوق له ساعة وله بالتحديد ميقات
وكل روح بساعتها لا بد تفارق بدنها
هذا القدر لا بد تؤمن به وترضاه بسكات
ترى ثواب هالدنيا تجنيه من نوايب محنها
هذي الدنيا تلسع ابن آدم مصايب وأزمات
وفي النهاية دار امتحان ما له غنى عنها
ارضى بالمكتوب وانثر من صادق الدعوات
كم دعوة بإخلاص عند الله ثقيل وزنها
واطلب الرحمة وانشدها لغالين الأموات
يمكن دعوة بالغيب راحة النفس وسكنها
ولا تحرمه يا خوي من دعوة بالخمس الأوقات
واجعل دعوتك عند كل سجدة وطنها
عسى ربي يرحمه ويسكنه فسيح جنات
ويغفر له كل زلة بدنياه ويتجاوز عنها
عسى يكرمه ربي من ريح الفردوس نفحات
ويجعل قبره روضة من خلد الجنان وعدنها
ألا ياالله أنت الكريم الرحيم رب السماوات
اغسل خطاياه وبيضها مثل البياض بكفنها
واجعل اعماله بهالدنيا كلها بالصفا خيرات
واكتبه من ناجحين هالدار يوم امتحنها
واجعل كتابه بيمناه يفيض بالخير صفحات
ما به سوء نظيف من شر دنياه ودرنها