قبل شوي صارت انتكاسة فظيعة لي ..
غير فخورة بنفسي ابدًا

زوجي الفترة الاخيرة صار متفتح ، يحضر حفلات غنائية وحضر حفلة غنائية بالرياض اسمها ميدل بيست
وتكلمت معاه وشديت معاه بهالخصوص اني ما اسمح ابدًا بهالطريقة بالحياة لشريك حياتي
وتكلمت عن دوره كأب وكمربي وبلا بلا بلا
صار فيه فجوة دينية بيننا انا متمسكة برضو اهله متمسكين اكثر مني
وهو لا انصاع للتوجه الجديد والانفتاح.
وهالشيء مو معجبني


قبل شوي صور فيديوهات في جواله واعطاني اشوفهم ،
وبالخطأ لفيت ع الصور القديمة بدل من الجديدة

وطلع لي مقاطع كأنه مرقص رايح له بسفره اثناء العمل.
سكرت الجوال وسكتّ .. وبديت اكل بنفسي مستحيل اسكت .. مستحيل ومستحيل اكون طبيعي معليش يروح لمراقص ويجيني انا يالعفيفة الطاهرة النظيفة !!
قلت اكيد مافي انتداب من الاساس رايح للدشرة
وممكن رايح ياخذ مسيار ابو اسبوع ..
والافكار تاخذني وتوديني
قلت مافي زي الصراحة .. مارح اسكت انا

رحت له وقلت ابغى جوالك بشوف شيء
وش تبغين وش بتشوفين قلت بتاكد من شيء !
فتح لي الجوال ووقف ع راسي

رحت ع طول للاستديو وفتحت الفيديوهات .. طلعت فيديوهات مطعم مشهور بمطربته وزوجي يحب يروحله .
لكن طريقة اضاءته تعطي ايحاء انو مكان مو كويس 😁
اعطيته الجوال قلت خلاص تطمنت
قال وش توقعتي يعني .. قلت توقعت رايح لمرقص ورقاصات ..

بس اجواء المدينة اللي رايح لها غالبًا المطاعم يكون فيها مطربة واحيانا راقصة
وانا بصراحة ماعندي مانع بكيفه ذنبه ع جمبه !

قال طيب فيه راقصة بهالمطعم!! قلت الوضع مختلف انك تروح لسهرة عشاء ومطربة وفقرة من الفقرات راقصة هذي ثقافتهم وفنهم وانت مو صغير ولا جاهل تعرف الحلال من الحرام وانت حر !

لكن تروح لمرقص عشان اجواء الرقص وتتفرج وتهز مع الراقصات لا طبعا وما الى ذلك من محرمات
قال شدعوا وش توقعتيني وبلا بلا بلا


انا اقسم بالله كنت اوبن مايندد ، وحتى غيرة ما اغار
لكن الفترة الاخيرة صاير وضعي لا يطاق.
صايرة شكاكة واتمادى بالتفكير 😭 لازم اتعالج
وافكر جديا اروح لاستشارة نفسية .

__________________
سبحان الله وبحمده ، سبحان الله العظيم