انا تكلمت وانبحّ صوتي بهالموضوع
كان يصلي بالمسجد والان اقسم بالله مايدل طريقه ، يصلي بالبيت فقط .
كان وكان والان شخص اخر تماما.

لما راح للحفل تكلمت معاه وشديت النبرة واقسم بالله مو عشان الغيرة
لان اصلا كانوا البنات معدومين
لكن كمبدأ ،
قلت له صلاح اسرتك قائم على صلاحك انت
شلون جتك الجرأة قدام ربي تعصيه بعد ماكنت تبكي وتدعيه يشفي ولدنا قبل اسبوع
شلون تجرأت !!
شلون تتوقع بنتنا بعدين
وولدنا
شلون اقوله صلّ واعبد ربي وانت قدوته بعيد عن ربي .
وتكلمت وخوّفته وقلتله عن الحديث عفّوا تعف نساءكم ، بروا آباءكم تبركم ابناءكم ..
هذا وعد رباني من ربي لا تتوقع لما تروح للمعاصي ان اهل بيتك معصومين حتى لو حطيتهم بحصن منيع !
ولا تتوقع اني مرة مبسوطة اقسم بالله وضعي كاني ماسكة بيدّي جمرة
انا الوحيدة من خواتي اللي لازلت بعبايتي وحجابي وشكلي بينهم غريب .
لكني اضغط ع نفسي!!
صديقاتي كل يوم والثاني حاجزين لهم حفلة .. ليه ما اصير دربي دربهم ؟ رصيدي مليان وسيارتي معاي
مافي اي سبب يمنعني من الوناسة الا مسؤوليتي الدينية والاسرية !! ارمي عيالي بالبيت واهيت من حفل لحفل
هذا اللي تبي نوصل له ؟هذا وضع اسرتنا المستقبلي اللي تطمح له ؟
صديقتي كل فترة تقول لي بدبر لك مقابلة بشركتنا وانا مابي اداوم كتفي بكتف رجال 8 ساعات باليوم ، مابي افتح ع نفسي باب فتنة!
يعني مو من زين وظيفتي وارهاقها وتعبها وضعف مرتبها واحيانا اضعف وافكر اتركها واروح لوظيفة صديقتي .
بس بين عيوني اسرتنا
عيالنا
تعبنا وشقانا !!
انا وانت بمركب واحد ولا يمشي المركب بجهد شخص واحد .. انت مسؤول امام الله بصلاحك وصلاح اهل بيتك
كلكم راع وكلكم مسؤول عن رعيته !!


هذا الحوار بالضبط اللي صار
وكنت منهارة وابكي
كان الكلام يطلع من قلبي
من كثر حزني مريته بسيارتي ورحنا مكان صادّ
ما ابغى حتى اطفالي يستشفون الحزن والعصبية بنقاشنا.

وهو تاثر .. ما اعرف اذا يمثل او صادق
لكني كنت مرتاحة نفسيًا اني طلعت هالشيء ..
ووافقني هو بارائي بخصوص تربية عيالنا والحدود اللي نحددها لهم.


واوافق مبتعثة، التخبط الديني هذا مسبب لي تشتت .
لا انا اللي مرتاحة وواثقة فيه ،
ولا انا اللي بعتها واشتريت راحتي .

__________________
سبحان الله وبحمده ، سبحان الله العظيم