الله يسهل ولادتك ان شاء الله و ما تحتاجي لهذه الأبره
انا بصراحه اخذت أبره الظهر بدون معلومات كافيه عنها مسبقا, لأني انا اخاااااااف من الأبر بشكل مو طبيعي 
و عشان كده قررت ما اخذ هذه الأبره ايش ما يصير و لا حتى استفسرت عنها 
بس لما صار الجد و صار وقت الولاده كان الطلق جدا بطيئ و الممرضه من اول ما شافتني و هي تنصحني بهذه الأبره و تقول لي ما راح تحسي بشي و هي بنفسها ولدت 3 مرات و استخدمت الأبره في كل ولاداتها
و انا مصممه و رافضه بشده لين مرت 12 ساعه و الرحم بس مفتوح 4 سم و خلاص تعبت و استسلمت و انا حالتي حاله و وافقت على الأبره في النهايه
و اول ما اعطوني الأبره في الظهر صرت انسانه ثانيه اسولف و اضحك و حتى نعست و كنت بنام بس الممرضه كان تصحيني و كده و في خلال نصف ساعه اتوسع الرحم و بدأ الطلق الحقيقي الين ولدت بنتي و الحمدلله
المشكله اني ما استفسرت عنها و لا عن مضارها و منفعتها بس اخذتها و السلام
الحمدلله انه ما صار شي معي بسببها بس ندمت اني حطيت كل ثقتي في الدكاتره و جازفت بحياتي و حياة بنتي مع انه كان عندي 9 شهور كافيه اني استفسر و اجمع معلومات.
تصدقين اني ما كنت حتى اعرف شكل الأبره و حجمها 
و الحين ماني قادره اصدق انه ابره بهذا الحجم دخلت جوا ظهري و م احسيت بشئ.. سبحان الله
الى الآن و انا اعاني من الم الظهر وقت الدوره و لما امشي كثير او اكون جالسه لساعات طويله
و الحين زاد الألم لما صرت حامل هذا و انا بأول الطريق اجل ايش بيصير لما اكون في نهاية الحمل و ثقل الجنين الحمدلله على كل حال غيري اسوأ مني
الي ابغى اقوله انه بالرغم من علم الدكاتره و خبرتهم الا انه هذا قرار يخصك و لازم تستفسري عن كل شي و يكون لك خلفيه عن الموضوع و بعدين توكلي على الله,
ولن يصيبنا الا ما كتبه الله لنا