يسعدلي مساكن ومسا احبابكن
ربي يخليلك الوالد حبيبتي وفا وصحة و هنا عالبسبوسة
والله يبارك لكم بالادغال شي بيرد الروح سبحان الله
تسلم أخي الكريم نيت مان عالدعاء والدعم
والله يعطيك الصحة والعافية طول العمر
صحيح كنت امشي قبل من ساعة لساعة ونص وشي تلات مرات بالاسبوع وبعتبرها الرياضة المحببة الي
بس من شهر او اقل شوي صرت امشي يوميا وتقريبا اربع ساعات باليوم
مقسمين الصبح ساعتين والعصر ساعتين او بالليل
وبيتخللهن بعض التمارين الرياضية عالآلات
بإستثناء يوم واحد راحة بالأسبوع ليرجع الجسم يشتغل من أول وجديد
وكل ما عم اتعلق اكثر واكثر بالمشي وصار جزء من يومي وحياتي والا في شي غلط بحياتي
والنتائج من دون مبالغة مين ما عم يشوفني ما عم يصدق اني بس 2 كيلو ونص نازلة بيقولوا اكثر من 5 كيلو
اول أسبوعين نزلت 2 كيلو بعدين نصف كيلو وحسيت هالأسبوع ما نزلت هيدا عالميزان
بس مبين عليي اني نازلة اكثر بالنظر وخاصة اني خففت الحلويات بس ما قطعتها
واحتمال كبير الوزن بالعضل مع تمارين الشد
والا اول شهر من المشي ما بيلاحظ الشخص انو نزل من وزنه لانو المشي بأول شهر بيعمل على اعادة هيكلة الجسم
ومن كتر حبي للمشي صرت اقرأ عنو اكثر واكثر
وبالفعل لقيت انو اكثر وسيلة للمحافظة على صحة الانسان من الأمراض واكثر وسيلة لحرق الدهون بحيث يتم عن طريق المشي حرق 60% من الدهون و40% من السكريات
يعني صحيح بينزل الوزن عالبطيئ بس مفعوله للمدى البعيد افضل
بعكس الحمية القاسية اللي بتخلي الجسم ينزل بسرعة بس النزول بيكون من اللحم والعضل كرمال هيك بيرجع الجسم بيزيد من اقل تغيير بالحمية وبنشوف صار في ترهل واضح بالجسم
اما عن طريق المشي فبيحرق الجسم الدهون وبالتالي بيشد الجسم
وانا بخلال ساعتين مشي بطيئ ومرات هرولة عم احرق 450 سعرة حرارية مسافة 8 كيلو متر
فباليوم اربع ساعات من ضمنهن تمارين شد نص ساعة او ربع ساعة عم احرق ال1000 سعرة او اقل شوي
والمشي بيقدر يمارسه النحيف والسمين وبأي وقت وبأي مكان
والخيار مفتوح بالمدة الزمنية للممارسة
المشي ما بعتبره شي اجباري ولازم قوم فيه بل بممارسته بمشي بشكل عشوائي لاستكشف الأمكنة ومرات لاختلط بالناس
وبعض المرات بمشي بنفس المكان ونفس المسافة
يعني بمختصر مفيد متعة بالنسبة الي ووقت خاص بيني وبين نفسي
حتى اولادي اذا بينزلوا يفتحولي الباب بيصيروا يطلعوا عالدرج وهني عم يمارسوا التمارين الرياضية
نقلت العدوة لكل العيلة 😊😊😊
حتى جارتي التركية من كتر ما بتشوفني رايحة جايي صارت تجي تمشي معي اذا كنت عم امشي حد البيت
هيدي الصورة البارحة بعدني مستمرة احرق بين ال800 لفوق الألف سعرة باليوم
وهون متل ما وعدتكن ميامين عم تتدرب معي
وهون الأكل بالأسبوع اللي مر
بنوع بين اكل صحي واكل اقل صحي بس بحبه
مثلا السبانخ مع البطاطا والفاصوليا الحمرا والحامض والكمون وبصل وثوم بودرة وملعقة زيت زيتون قليل السعرات بس مغذي وبيشبع
والفطاير بالسبانخ محمرة بالفرن بدون زيت عالوجه بس ملعقة زيت زيتون بالحشوة لنص كيلو سبانخ طازة والعجينة كتير رقيقة
وبطاطا بالاعشاب والبهارات مع ملعقة زيت زيتون بالفرن
ومثلا ناجيتس الجبنة بالحر فيها سعرات لانها مقلية والجبنة دسمة فما حرمت نفسي اكلت 4 حبات فيهن 200 سعرة
ونفس الشي بالحلو عملت تارت بالاناناس فيه 2000 سعرة قسمته 10 قطع وليومين كل واحد بيطلعله باليوم قطعة ب 200 سعرة بس
ونفس الشي بحلا الكاسترد بالكاكاو والبسكويت
وهون البطاطا عادية بس نوعية منيحة حطيتها بالفرن اربع حبات وسط مع ملعقة زيت زيتون طلعت هشة وطيبة وصحية بنفس الوقت
وكاتليتس التونة اكلة هندية وحبها ابني من عند رفيقو وكتير مفيدة ومغذية وطيبة
فعملتها
مرة اكلتها مقلية ومرة حطيت بالفرن مع رشة خفيفة زيت زيتون
والبيتزا بتعرفوا ئديش فيها سعرات وانا من المدمنين عليها
ومحظوظة اني بحب اكلها كتير رفيعة فأكيد رح قلل كتير من السعرات والجبنة موزاريلا قليلة الدسم
فعملت وحدة كاملة الي فقط بسعرات حرارية 500
وكانت وجبة كاملة ومشبعة
من خلال مطالعتي حسيت انو جريمة اللي بيتبعوا حمية غذائية بحدود الف سعرة لكل اليوم عنجد شي كتير صارم
وصار عذاب وحرمان واحباط
بنقدر ناكل ال1800 لل2000 سعرة للاناث اللي وزنها 60 او اقل حسب نشاطها البدني باليوم
ومع شوي ممارسة رياضة اللي بتحبها باليوم بتقدر بكل سهولة تحرق 500 سعرة بساعة ونص او بساعتين حسب نوعها
واكل صحي كرمالنا لست أيام بالأسبوع او خمس ايام و مع يوم بالاسبوع نتناول فيه اكل غير صحي كالوجبات السريعة المشبعة بالدهون
هون رح نكسب صحتنا وبنفس الوقت ما حرمنا حالنا من اشياء بنحبها ولو كانت مضرة
دايما قاعدة لا اسراف ولا تقتير ولا افراط ولا تفريط هيي الحل لمشاكلنا بكل شي