منتدى عالم الأسرة والمجتمع - عرض مشاركة واحدة - ساعدوني بالنصيحه فاولادي يطلبون مني الطلاق من والدهم
عرض مشاركة واحدة
قديم 29-05-2006, 08:13 PM
  #10
يقولون متزوجه !
عضو جديد
تاريخ التسجيل: Jul 2005
المشاركات: 14
يقولون متزوجه ! غير متصل  
أختي الكريمه ريم المدينة

سأجيبكِ على هذا السؤال
اقتباس:
ولكن السؤال هنا مالذي يدعوك للبقاء وماهي حسنات بقائك معه سواء لك او لاولادك ؟!
الذي يدعوني للبقاء معه عدة أمور :
1- معذرة عند ربي ...... بأنني حاولت اصلاحه ونصحه والصبر على إيذائه وأنني لم استعجل هذا القرار بل تمهلت فيه كثيراً وصبرت عليه ليس سنه ولا سنتين بل سنواااااااااااات عديدة حتى تعدى الضرر إلى أولادي وأصبح أتخاذ الأمر ضروري لأن الضرر عم عدة افراد وليس فرد واحد
2-كلما زاد صبري وتأجيل الامر أعطيت نفسي فرصه للمحاوله بامل اصلاحه بدون عجل وكل مره يعود لي بعد حرمان شهور ويحسن من اسلوبه مع اولاده كنت اقول الحمدالله العوض ولا الحريمه لو تطلقت لانحرمت من هذه الليله وانحرم اولادي من اب طيب ولو كم يوم واقول يالله اصبر عليه واتحمله بس هو مايرضى يعيش سعيد لازم ينكد علي وعلى عيالي ويرد مثل قبل ويتكرر الحرمان والقسوة على اولاده وهذه المره طالت المسألة معند زيادة وحاله يسوء جداً وظلمه تعدى الحدود فصار عندي عادي قمت اختبر وأسال نفسي في فرق بيني وبين المطلقه اللحين انا غير عنها في وشو؟؟ و ايش اللي بخسره لو تطلقت ؟؟ ووشو التعب والاعباء الجديدة اللي بتنضاف لي ؟؟ اصلا انا تعودت منه على الحرمان من متعتي وكاني بلا زوج وتعودت على القيام بكل الامور اللي يقوم فيها الرجال واتعامل معاهم في الشراء وتصليح اللي اخترب في البيت والكراج اللي يصلح سيارتي وكل شي واعرف ارقامهم ويعرفون بيتي يعني خلاص تلفون واقولهم ام فلان ويجون عندي البيت وعيالي محرم لي يقعدون معاهم لين يخلصون شغلهم كنت اسوي هالشي وزوجي مايسال بالعكس كان يطلع والعمال عندي بالبيت ومو كذا بس الغبي يقول للعيال يالله يطلعون معاه بس انا اللي اقولهم ماتطلعون واقولهم (وين العقل!! ) اقولها بعصبيه فأولادي يفهمون ان قصدي ابغي محرم ويرفضون يطلعون يعني هالأب مايطلعهم ولمن يشوفني في هالموقف يبي ياخذ العيال وانا اقعد بروحي مع العمال !!!
وكل هذا نكاية لي ويبغي يناحسني!!! اوكي يناحسني بس مو في كل شي يناحسني ما يصير !!!
ما يفكر في الحلال والحرام !!!وانه مسؤول مني !! والله صرت احس انه يدور لي الفضيحه ومايفتكر تخيلوا احيانا 4 او5عمال يشتغلون في البيت وشغلهم يطول وفي داخل البيت وانا حرمه واللي يشوفني يحسبني بنت اصحاب البيت مو صاحبة البيت يعني انا ماني ضخمة أو متينه حتى وانا متغطيه ومايبين مني شي اظل مبين اني بنت مو ام حتى تحترمني الرجال باني ام كبيره بالعكس والمفروض انه يحس بهالشي ومايخليني عرضه للاحتكاك بالرجال بس ابدا ولا شي اذا زعلان مني خلاص ماعاد يعرف حق من باطل ويسوي يعني مطنشني مايفهم ان مو كل شي تطنيش انا زوجته وعرضه مايفكر لو صار شي!!!!!!!!
يعني انا كأم اذا زعلت من ولدي خلاص ماكلمه ولا ادرسه ولا اشوف اكله ولا اسأل عنه اذا كان في الشوارع والا لا !!!! يعني خلاص زعلانه صار مالي علاقه فيه !!!! اوكي زعلني وزعلت منه تظل فيه اشياء ماتتغير واساسيات لازم اظل اقوم فيها مالها علاقه بالزعل شلون اتخلى عنها !!!! انا مادري شلون هالرجال يتخلى عني ويخليني مع الغرب ومايفكر ولا يعرف حدود الزعل !!!
وبعد ماأسأل نفسي عدة اسئلة وش اللي بخسره من طلاقي منه يكون الجواب ولاشي ماراح تخسرين شي لانك اصلاً خسرانه وبالعكس بتكسبين راحتك النفسيه وراحة ابنائك وبتستطيعين تربينهم تربيه سويه وبدون تناقض وبتقدرين تعلمينهم كل شي ابوهم تخلى فيه عن تعليمهم وتربيتهم وعن مسؤليته في عياله..

3- السبب الثالث يشبه السبب الثاني بس يخص عيالي وهو اني اتعمد اطيل المده واصبر حتى اتاكد انهم فعلا يقولون هالكلام من اقتناع وليس من حالة غضب من والدهم وانا هالكلام اللي اسمعه منهم وطلبهم مني اني اريحهم من ابوهم بالطلاق مو من يوم وإلا يومين اسمعه لاوالله صار لهم اكثر من سنتين وهم يكررون لي هالكلام ويلحون علي فيه في كل مره ينقهرون من ابوهم والشي الجديد اللي انضاف انهم قالوا لي ليش ماتفكينا منه والله لو احتجتي في المحكمه ان احنا نشهد على ابوي بنشهد بس اشترطوا ابوهم مايشوفونه لانهم خايفين منه هذا اخر كلام منهم حسسوني بانهم مقتنعين ومايبون ابوهم وهذا اللي خلاني افكر بالموضوع جد واعرض مشكلتي عليكم واتكلم واشوف شور ناس غيري حسيت انهم متاكدين بطلبهم وبنفس الوقت مابي عيالي في يوم يقولون لي انتي السبب في الطلاق او اني حرمتهم من ابوهم ابيهم يتاكدون ان هم اللي طلبوا هالقرار وكل يوم اسالهم واقولهم تحبون ابوكم وقبل مايردون يسوون لي حركات بانهم بيستفرغون اللي في معدتهم لأني ذكرت ابوهم ويجاوبوني بالنفي ويقولون لي بالله هذا سؤال ؟؟ وارد اسالهم واقول بجد يا عيالي عادي مافيها شي اكيد في حب ولو بسيط ونفس الحركه يسوون واخس يعني انهم بيغمى عليهم لاني قلت يمكن تحبونه يقولون لي يمه هذا ينحب من زينه يفشل والله ياناس مايتكلمون عليه كأب وكل مره اناديهم علشان اسالهم هالسؤال يسوون نفس الحركات والجواب بالنفي ويقولوون لي مناديتنا علشان هالسؤال !!!
وانا اصبر حتى يكون قرارهم اكيد مو في لحظة غضب وممكن اصبر بعد بس وش اخرتها ؟؟

اللحين انا بسألكم انتوا تشوفون صبري على هالزوج فيه فايده لي والا لعيالي ؟؟؟
وهل راح استفيد من هالصبر والالم انا وعيالي ؟؟؟
مو يقولون الصبر مفتاح الفرج بس هل كل صبر تعتبر نهايته فرج ؟؟؟
مو في احياناً كثيراً بعض الشعوب من الظلم يسوون ثوره ومقاومة للعذاب بإطاحة رأس الديكتاتور الظالم وتجيب هالثوره نتيجه !!!
وانا وعيالي اطاحة رأس ديكتاتورنا هو بطلاقي منه وابتعاده عنا !!!
مو اللي يسكت عن الحق شيطان اخرص !! كيف اللي يسكت عن الظلم ؟؟
انا ادري انه ابتلاء بس بعد ادري اني انسانه عاقله وفاهمه وعندي اهل يسندوني وانا بنت ناس واعرف الاصول فليش اسكت على شي مو من الاصول صدقوني ماقدر اتحمل ان عيالي يكون ناقصهم شي واشياء كثيره وتعتبر اساسيه لازم يقوم فيها الاب ويروى أن عمر بن الخطاب رضي الله عنه يقول ( علموا اولادكم الرماية والسباحه وركوب الخيل ) وعيالي كلهم مايعرفون شي محد علمهم مو انا محاسبه اعلمهم انا حاليا ماقدر غير ادرب الكبير شوي بسيارتي على السواقه وتعلم الكثير بس لازم مدرسه سواقه تعلمه لمن يكبر ولازم هوشه مع ابوه علشان يوافق ويدفع يعني بالنسبه للسواقه ماراح اخليهم وبعلمهم
اما السباحه !!!! قهر عيالي مايعرفون يسبحون !!!!
وصعب انا كأمرأه اعلمهم ووين اعلمهم واصلا انا امهم بحاجه اتعلم
وكل عيال خواتي واخواني علموهم ابائهم وانا عيالي كانهم ايتام وبالعكس لو ايتام كان خوالهم اتخذوا فيهم اجر وعلموهم ولو ايتام كنت علمتهم بفلوس ابوهم وماخليت شي ناقصهم
وودي ادخلهم تحفيظ قرآن وادخلهم كراتيه يتعلمون يدافعون عن انفسهم مساكين ماعندهم اب يدافع عنهم ويسندهم ماهو فاضي لهم !!
ودي وودي كل شي فيهم لانهم محرومين ودي اسوي فيهم كل شي وصدقوني اللي اطالب فيها اشياء اغلب الاباء يسوونها لعيالهم خاصه وزوجي قادر جداً يعني انا ماطالب باشياء مستحيله والا فوق طاقته بس هو متى يربي عياله وهو متفرق للاغاني والتدخين وخواته والحش في الناس !! مو خايف من المسؤليه وان الله بيحاسبه على تقصيره !!


اللحين جاوبوني انتوا هل في فايده ونتيجه مثمره من هالصبر رغم ان المتضررين من الصبر هذا زاد عددهم وكل طفل عندي صغير من يكبر شوي ويفهم يبتدي يحس بالحرمان والقسوه من والده وقلة احترامه له !!! وبيصير مثل اخوانه الكبار ويزيد العدد ويزيد الضغط علي اكثر !!

انتظر رايكم واللي ان شاء الله بسوي فيه ولكن بعد مده طويله من صلاة الاستخاره ودعاء
وجزاكم الله كل خير

التعديل الأخير تم بواسطة أبو فيصل ; 29-05-2006 الساعة 08:40 PM