أهلا فيك أختي الغالية نور الإيمان ومبروك على التثبيت بصراحة موضوع رائع ويستحق التثبيت والتميز بعد بكل جدارة لما فيه من فوائد عظيمة وأنا والله إن لساني يعجز عن شكرك على مابذلتيه من أجلي من مجهود والله يحفظك ويبارك في عمرك وجزاك الله كل خير أنتي كفيتي ووفيتي وتأكدي إن كل ماخطته يدك هنا إني لن أنساه ولن أتجاهله وسأعمل به وأمضي عليه بإذن الله تعالى وأشكرك الشكر الجزيل يا أختي الفاضلة على إهتمامك بمشكلة أولادي وتقديم يد العون والمساعدة لي وأنا في أمس الحاجة لها رفع الله قدرك دنيا وآخرة وأثقل الله ميزانك بالحسنات يا أختي الغالية بالنسبه للجدول إللي تحدثتي عنه أنا كنت قبل فترة ملتزمة فيه بس ما كنت أحط لهم نقاط كنت أحط درجات وعلامات صح واكس
وكنت أكلف كل واحد فيهم بشغلة واذا أ تقنها أحط له درجة وإذا كان سلوكة ممتاز أعطية كمان درجه وإذا أخطأ أحسم عليه من الدرجات هاذي
وفيه عندنا جوائز والقاب مثل فارس الأسبوع للي ماعليه ملاحظات أو أخطاء مسجلة بحقه وطبعا مع العطلة الصيفيه
وبعدها جاء رمضان والمدارس فأنشغلت عن الجدول وماعاد أهتميت فيه بس الحين بأرجع له إن شاء الله تعالى بالنسبه إن سلطان أو أي أحد يقول لمنصور أنت مريض أو يعلق على جسمه أو مرضه أبشرك الحمدالله هاذا الطبع مو موجود نهائيا عند كافة أولادي ومستحيل أي واحد من أولادي يقول لمنصور أنت مريض أو يجيب له طاري مرضه أنا علمت أولادي كلهم على كذا بمن فيهم منصور بنفسه إنهم ما يقولوا لأي شخص أنت مريض وفيك كذا وكذا وسلطان أو إخوانه ماعمرهم قد جابوا طاري مرض منصور أو قالوا لأخوهم أنت فيك مرض كذا صح يهتموا بأوقات علاجه وأ كله وكلنا نهتم بهاذا الجانب بالنسبه لسلطان الحمدالله أظافره صار ماعاد يقضمها وأنا سألته ليش تقضم أظافرك وش السبب قال ولاشئ يا أمي بس لما أجلس أفكر في الدراسه أو أي شئ أنسى واجلس أقضم أظافري بدون سبب بالنسبه لإسناد بعض المهمات له هو طبعا الحين أبوه يعلمه قيادة السيارة
وبعض الأوقات أبوه يخليه يسوق وأبوه يرافقه بالمقعد الأمامي يوديه بعض الأحيان البقاله أو عند الحلاق أو محل الدواجن ويعطيه الفلوس وسلطان يشتري الأغراض ويحاسب البائع و بعض الأوقات أبوه يعطيه بطاقة الصراف يسحب من الماكينه فلوس إذا بغينا مبلغ من المال إذا راح هو وإخوانه أي مكان لحالهم أبوه يوصيه على إخوانه ينتبه لهم
بالنسبه للمشورة بعض الأوقات ناخذ رأي الأولاد كلهم وبعض الأوقات لا مانسألهم عن رأيهم لأنه أشوفه غير مهم آخذ رأيهم في مكان طلعتنا أسألهم وين تبغونا اليوم نطلع للحديقه أو البر أو البحر أو المزارع هما يختاروا وإذا ما أتفقوا أسوي تصويت والأغلبية القرار لها بعدين لو رحنا حديقة العاب أخذ لهم تذاكر بالتساوي وكل واحد يلعب في اللعبه إللي يختارها بنفسه حسب رغبته أنا إذا شفت في اللعبه خطوره على أحد فيهم أمنعه من ركوبها بعد ما أبين له ضررها عليه
بالنسبه للمدح والثناء على أفعال سلطان الطيبه أنا والله من هاذي الناحية الله العالم إني ما أقصر معاه وحتى أبوه مايقصر دائما نمدحه ونشجعه إذا فعل شئ جميل مثلا بالأمس كان رايح المسجد يصلي المغرب هو وإخوانه وصلى وبعد ماطلعوا من المسجد
صدف جار لنا شايب طالع من المسجد وسلطان سلم عليه وطلب منه يمر معاه للمجلس يشرب القهوة الشايب قال له الله يرضى عليك ويصلحك ويوفقك يارب و يحفظك لأمك وأبوك ومشكور ماقصرت خلها وقت ثاني إن شاء الله وجاء سلطان وقال لي يا أمي قابلنا جارنا أبو فلان في المسجد وسلمنا عليه وعزمته على القهوة عندنا وأعتذر مني قال لي أشربها عندك في وقت ثاني طبعا أنا قلت له والنعم فيك يانشمي وهاذي علوم الرجال بارك الله فيك و قتها كان أخوه إللي أصغر منه معاه قال لسلطان ساخرا ياسلطان عازم الرجل على القهوة عزالله إنه ردك تستاهل قال له سلطان كفاية إني نلت منه دعوة صالحة وأنت سمعت دعواته لي بالتوفيق والصلاح وأنا بدوري شجعته وقلت له أنت الحين صرت رجال بإمكانك تعزم أصحابك ومن أردت من الجيران عندك بالمجلس وأنا أضبط لك الشاي والقهوة والحلا وقال بالله يا أمي من جد وأنبسط وحسيته فرحان من كلامي .

وسلطان هو فعلا كان متعلق في أبوه ويحبه وهو صغير ومرة من المرات سافرت عند أهلي وتركنا أبوسلطان عندهم نقضي الإجازة لأن هو ما أعطاه عمله إجازه رجع لدوامه في نفس منطقتنا الحالية تبعد عن منطقة أهلي تقريبا 2000 كيلو سفر بالسيارة وقتها كان سلطان عمرة ثلاث سنوات وكان متعلق في أبوه بشدة ولما سافر أبوه من عندنا سلطان أفتقده وجلس ثلاثة أيام يدور في غرف البيت ورى أبوه وينادي بإسمه وكل ماسمع صوت سيارة واحد من أخواله كان يقول هاذا بابا وصل برو ح أشوفه وجلس ثلاثة أيام على هاذا الوضع ورابع يوم مرض مرض شديد وصار معاه إسهال فضيع لدرجة كان يطلع بين الإسهال أكرمك الله صديد ودم ولفيت فيه كثير مستشفيات بين خصوصي وعمومي وصحته تدهورت وصار رافض للأكل والشرب ومايقدر يحرك جسمه ولايدينه ولارجوله وتم تنويمه وأنخفض وزنه بشكل مفاجئ برغم إن صحته كانت حلوة من قبل صار لماتشوفيه كأنه عمره 8 شهور مو 3سنوات وصار مايتكلم ولايضحك حتى البكاء صار ماعاد يقدر يبكي بعدين أتصلت على أبوه وكنت موقنة بأن سلطان هالك لامحاله بالذات إن مرضه ماظهر له سبب
ولاكن رحمة ربنا وسعة كل شئ وأتصلت على زوجي أنا وأمه وقالت أم زوجي لولدها إذا بغيت تلحق على ولدك وهو باقي حي لازم ترو ح الحين وزوجي جن جنونه ماعاد قدر يستحمل طلب رخصه من مقر عمله ورفضوا ولاكن عصى الأوامر وقال لهم أنا بسافر وبعدها حاكموني لو إن شاء الله إعدام أنا ولدي بيموت بروح أشوفه وحجز طيارة وجاء على طول للمستشفى إللي حنا فيه ولما دخل علينا وسلطان شاف أبوه أبتدى يصيح بابا ويتبسم في وجه أبوه والله إن سلطان أول ماشاف أبوه حسيت إن روحه ردت عليه وكان فرحان مرة والحمدالله توقفت كل الأعراض عنده وفي اليوم الثاني كتبوا لنا خروج وسلطان في أحسن حال حتى الدكتورة سألتني وقالت الولد شكله متعلق في أبوه بشده وهاذي طريقه خاطئه يمكن أبوه يغيب عنه أو يحصل له شئ لاسمح الله وإبنك تحصل له إنتكاسه ويروح فيهالاقدر الله .

وبعدها سافرنا وحلف أبو سلطان إنه ماعاد يخلينا لوحدنا ويسافر ومن يومك لهاذا اليوم وحنا نسافر مع بعض ونجلس مع بعض .
المهم حبيبتي أنا طولت عليك ومشكوره يا الغالية والله لايحرمني منك ومن كلامك الدرر الله يحفظك وينور بصيرتك ويرزقك الحكمة والصلاح يارب .

__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق




اشهد ان لا إله إلا الله وأن محمد رسول الله