منتدى عالم الأسرة والمجتمع - عرض مشاركة واحدة

12-06-2017, 08:42 PM

mimomea

كبير المراقبين [ وسام العطاء الذهبي 2016 ]

تاريخ التسجيل: Jun 2012

المشاركات: 10,291

مائدتي الرمضانية 2017

السلام عليكم ورحمة الله وبركاته
أسعد الله أوقاتكم بكل خير

شهر رمضان شهر الرحمة والغفران
الله يبلغنا وإياكم صيامه وقيامه

والحمدلله على نعمه كلها
هيدي يا صبايا مائدتي الرمضانية2017 المتواضعة

وكان الفطور عبارة عن
شوربة العدس- سلطة - كريسبي سمك - متبل الافودكا- بيتزا -فطائر سبانخ
والمشروب عصير عنب عضوي وعصير جريب فروت عضوي
والحلوة عبارة عن
حلو الداعوقية -موز بصوص الشوكولا

طبعا لاحظتوا انو ما في صحون ولا ملاعق أو شوك 😄😄😄
لأنو بشهر رمضان أغلب الأيام بستعمل صحون الكرتون وكبايات وملاعق بلاستيك
بلا ما نوقف ساعة عالمجلى هيك أريح وخاصة اذا ما كان الأكل سخن لانو البلاستيك مضر مع الأكل السخن

بنبدأ بأول طبق وهو الشوربة

شوربة العدس هيي أكتر نوع شوربة بنساويه بشهر رمضان تقريبا بنلاقيها على مائدة كل بيت لبناني بشكل يومي
بس انا مش كل يوم عم ساويها ممكن تلات مرات بالأسبوع
وسهلة كتير عبارة عن عدس أحمر مقشور أو بالأصح لونه برتقالي
بنغسله منيح وبنضيف عليه لكل كوب شي 5 أكواب ماء
وبس تغلي الماي بيصير يعمل كثافة عالوج لونها أبيض فبنشيلها بكل مرة
وبنرجع بنخفف النار وبنغطي الشوربة لتستوي واذا شفنا انها بحاجة لماي فبنزيد كل مرة حسب حاجتنا
لانو كل نوع عدس بيختلف عن التاني إن كان بكمية الماي أو الوقت اللي بيحتاجه ليستوي
قبل ما نطفي النار بربع ساعة بنضيف ملح وزبدة أو زيت زيتون ورشة كمون ورشة ثوم بودرة ورشة بصل بودرة وبقدونس مجفف وجزر مبروش وعصرة صغيرة حامض والحامض إختياري
ممكن نعصر الحامض على وجه الشوربة بس نسكبها بالكاسة او ممكن نستغني عنها حسب الذوق

الطبق التاني سلطة

عبارة عن كذا نوع موجود عنا بالبيت أو بنفضله
والصوص حبيت تكون بس من الحامض وزيت الزيتون والملح الآروما وهيدا الملح المنكه بالتوابل والاعشاب بيعطي نكهة كتير طيبة

متبل أو صوص الأفودكا

سهل كتير وطيب ممكن ناكله بالخبز العادي أو المحمص أو مع الفطاير أو الكريسبي أو البطاطا يعني بنقدر نغمس فيه أي شي بنحب ناكله معه
لهيدا الصحن هرست أربع حبات أفودكا مع عصرة ليمونة حامض ورشة توم بودرة وملح

فطائر بالسبانخ

هيدول من المفرزنات لهيدي السنة
وسبق ونزلت الطريقة من سنتين تقريبا
وهيدي هيي على هيدا الرابط
http://www.66n.com/forums/showthread.php?t=261256

كريسبي السمك

بنحتاج فيليه سمك بنغسلها وبنقطعها بالطول
وبنعصر عليها حامض شي عشر دقايق
بنرجع بنصفيهن وبنرش رشة ملح وبهار الكريسبي ( أنا جبت معي البهارات من لبنان)
بنرجع بنلتهن بالطحين من بعدها بالبيض وآخر شي بالخلطة وهيي أساس لذة الكريسبي
والخلطة عبارة عن طحين نص كوب وملعقة نشا وكورن فليكس مهروس وبهار الكريسبي حسب ما بنحب النكهة تكون ظاهرة (أنا بكتر البهار الكريسبي)
وبنقليهن بزيت حامي ويكون نظيف

بيتزا الايطالية المارغريتا

وسر العجينة بالسميد الناعم
العجينة عبارة عن أربع أكواب ونص طحين وربع كوب سميد ناعم
ومكعب خميرة طازة ورشة ملح وملعقة طعام سكر وربع كوب زيت زيتون وماء حسب الحاجة

ومن بعد ما تخمر العجينة بنرقها بالسميد الناعم

والصوص عبارة عن بندورة مخفوقة بالخلاط مع رب البندورة حسب الحاجة والكمية ممكن نحط ملعقة وممكن أكثر او أقل
وتوم بودرة وزيت زيتون وريحان طازج او بودرة
وبخبز البيتزا مع الصوص نص إستواء

وبعدين بحط الجبنة وبكمل خبزها

بيتزا بالخضرة

عملت شوي بقي عندي عجين وصوص من البيتزا اللي عملتها من يومين
وبطريقة تانية متل ما بنعملها بلبنان عند أهلي
العجينة كيلو طحين -خميرة مكعب او ملعقة طعام جافة - ملعقة طعام سكر -ملعقة طعام باكينج باودر -ربع كوب حليب -ربع كوب زيت زيتون -رشة ملح -ماء حسب الحاجة
اما بالنسبة للصوص
بنقلي بزيت زيتون تلات حصوص ثوم مفروم ناعم مع بصلتين مفرومين ناعم بس يذبلوا بنضيف خمس حبات بندورة مفرومة ناعمة وفليفلة حمرا مفرومة ناعمة وبنقلبهن وبنخفف النار وبنغطيهن بعد عشر دقايق بنضيف ملح و أوريغانو وريحان ومردقوش وزعتر وملعقة رب البندورة وممكن نستغني عنها اذا البندورة كانت الكمية كافية
وبس نحصل على صوص بنطفي

وهيدي الصورة للبيتزا من كم يومين عملتها
وبنحشي البيتزا متل ما بنحب ان كان ذرة -فطر فليفلة خضرا -زيتون
واذا بنحب مارتديلا بنحطها فوق الخضار قبل الجبنة

حلو الداعوقية

بنحتاج كوب فرك كنافة ناعمة
كوب سكر بودرة (ممكن نزيد او نقلل حسب ما بنحب طعمة الحلو)
ملعقة زبدة
نصف كوب ماء ورد
ملعقة ماء زهر
تلات اكواب أو أربع أكواب فستق حلبي لونه أخضر( وممكن نستعمل كوبين فستق حلبي مع نقطتين ملون غذائي أخضر )
أنا إستعملت أربع أكواب فستق حلبي
بنحط الفرك بالمقلاية عالنار شي خمس دقايق لتاخد لون خفيف جدا
وبنتركها تبرد وبنضيف باقي المكونات وبنعجنها لنحصل على عجينة متجانسة

اذا مش متواجد فرك كنافة ناعمة بنحمص الفرك الخشنة بالفرن من دون ما تاخد لون وبنطحنها بالمكنة وبنفركها بملعقة زبدة
والنص كيلو فرك خشنة بس نطحنه بيعمل كوبين فرك ناعمة

والقشطة عبارة عن ليتر حليب على النار بس يقرب عالغليان بنضيف تلات ملاعق خل وبنحركهن وبنطفي النار وبنتركهن شي خمس دقايق قبل ما نصفيها
من بعد ما نصفيها وتبرد بنضفلها 250غرام ماسكربونة او قشطة قيمر وبنهرسها بالشوكة لتصير متجانسة

وبنرق عجينة الفستق عالنايلون وبنحطها بكاسات صغيرة او أي قالب موجود عنا لنعمل الشكل اللي بدنا ياه وبنحشي قلبها بالقشطة

موز بصوص الشوكولا

هيدي عملتها للاولاد كتير بحبوها

بحط مئة غرام شوكولا سودا مخصصة للطبخ مع ملعقة زبدة ونص كوب حليب وبخفقهن عالنار لادأحصل على صوص الشوكولا
وممكن إحتاج حليب أكثر من نص كوب حسب ما بحب سماكة الصوص

ان شاءالله يكون الشرح واضح والإفطار عجبكن

رمضان كريم عالجميع

__________________

اللهم إني أستودعك ديني و نفسي وأهلي وزوجي
وأولادي وأحبتي فاحفظهم يا من لا تضيع ودائعه