السلام عليكم

بدخل على طول في الموضوع

للأسف ريلي يوم كان صغير تعرض للعنف الأسري
يعني ابوه الله يصلحه ويهديه كان وايد يضربه

ف دايماً كنت اشوف ريلي ينكسر ويحزن لما يتذكر مواقف الضرب اللي تعرض لها

المهم اني مافكرت بيوم نهائياً انه هذه العقده راح يفرغها زوجي في بنتنا

بنتي الله يحفظها عمرها سنتين

ريلي يحبها ويهتم فيها

لكن احياناً اذا شلها وهي مب حابه تروح عنده وصاحت حابه اتيي عندي
مايخلي الموضوع يطوف على خير

يعاند ويمسكها حيل بكل قوته لدرجة انه يعور جسمها
يعني مايمسكها بشكل عادي
اذا صرخت اشوف يرص ايده على بطنها وهي تتألم
يعني ضربه غير واضح بس على شكل ضغط بالجسم لانه يدري اني اعصب وما ارضى نهائياً انه يمد ايده عليها لانه قبل سواها وياما عصب وصار نقاش وزعل

وانا اعرف انها تتألم من ويهها ودموعها
وفي بعض الحالات لما اغير ملابسها اشوف احمرار على بطنها او ايدها يعني المكان اللي ابوها مسكها فيها

والمشكله لما انصحه واكلمه اقوله لا تضغط بايدك عالبنت ترى ايدك ثقيله وهي جسمها صغير مايتحمل
يقول ما اسوي لها شي شوفي بس ماسكها وابغيها اتم عندي
بس الاحظ انه يضغظ حيل وبقوه وهي تتألم
واذا هي صاحت اكثر يزيد عليها

والله تعبت نفسياً

اما بخصوص انه يمد ايده
ف من فتره هي كانت تصيح وتعاند
حابه اتيي عندي وهو مايخليها
لانه كان يبغي يشيلها مشتاق لها
وهي كانت دايخه تبغي اتيي بحضني وتنام

وتم يحاول يخليها غصب عنده
لين ماعصب عليها وعطاها كف بويها حتى صارت علامه خفيفه بويها

هني صرخت
وبكيت وشلتها من عنده

بعدها تأسف ،، حس انه سوى شي كبير وتم يبوس بنته وهي نايمه

وهذا حالنا الحمدلله على كل حال

احيانا لما يرجع البيت
هي بنفسها تروح عنده ويبوسها ويحضنها وتحبه وماتخاف منه والامور طيبه بينهم

ومرات تصير العلاقه بينهم متوتره
ترفض تروح عنده ومرات يعدي الموضوع على خير ومرات لاء

والله تعبت نفسياً
صرت اخاف جداً لما يقول لي باخذ البنت شوي وياي

يعني مرات يروح اييب شغله من سيارته وياخذها وياه

وهو لما يلاحظ الخوف على ويهي يتضايق ويقول انا ابوها مب ياهل

ولما شوي يتأخرون اتصل وهو يتعمد مرات مايرد ،، صار فيني خوف عليها منه

كله اتخيل انه يضربها
او انه ماينتبه عليها

لانها مرات يسوي حركات تخوفني
مادري يتعمد يحرق اعصابي ولا

يعني يحطها على دريشة السياره ويطلع كل جسمها
تكون سيارته واقفه بس بالشارع وفيه سيايير تمشي يمنا
وانا اموت من الخوف ويقول لاتخافين ماسكها عدل
وانا اتم على اعصابي واحترق واحسه يعاند يسوي حركات تخوف زياده

انا اسفه موضوعي متخربط
بس والله ماعندي حد اشكي له من بعد رب العالمين الا انتو

حاسه بكئابه اليوم لانه تكرر الموقف

صرت اخاف على بنتي من زوجي
عشان الضرب الغير مباشر ومن الحركات الخطيره مثل سالفة دريشة السياره ومره كان يسوق وهي بحضنه


لا تقولون كلمي اهلج واهله
لو عرف اني خبرتهم بهذه الامور ما اضمن انه يتقبل نصحهم وماعرف شو بتكون ردة فعله اتجاهي واتجاه بنتنا

كيف ممكن اتصرف بهالمواقف
انا نصحته قبل وقلت له الضرب والاذى الجسدي يبقى اثرهم نفسياً ويا الانسان لين مايكبر

سمع هالكلام مره لكن مع الوقت ينسى وتتكرر نفس المواقف