السلام عليكم ورحمة الله وبركاته


أسعد الله أوقاتكم بكل خير

الله يتقبل صالح أعمالكن وأعمالنا


مائدتي الرمضانية ليوم 22



كانت عبارة عن عصير برتقال وعصير عنب طازج
وسلطة الخريف (Salade d'automne)

وفيليه بالصلصة الحلوة الحامضة
وفيليه بصوص الكاري بالكريما والأناناس والهليون
وبيتزا الباذنجان
والحلو عبارة عن مد بقشطة جاهز
وعملت انا جيلو بقطع الاناناس وفواكه



سلطة الخريف (Salade d'automne)



وهون مع الصوص



طريقة التحضير :
نحتاج لخس النعجة وسبانخ وروكا
واذا حببنا اي شي متوفر من انواع الخس الاجنبي الاحمر
تين احمر وعنب وجوز وفينا نضيف تفاح او اناناس حسب الذوق

الصوص كمان اختياري بنقدر نكتفي بالصوص التقليدية اي حامض وزيت زيتون وملح او نضفلها للصوص خردل وخل البلسميك وانا هيك عملت واضفت عصير عنب كمان وفلفل اسود
وفينا نستخدم اي صوص مفضل النا



فيليه بالصلصة الحلوة الحامضة




طريقة التحضير :
هيدا الطبق اكلة صينية فينا نستخدم فيه الدجاج او القريدس او فيليه السمك والكل نفس الطريقة
انا استخدمت فيليه السمك
المقادير :
نصف كيلو فيليه وفينا اكثر
رشة ملح
برش زنجبيل
نشا
طحين
ملعقة صغيرة ثوم بودرة


بصلة مقطعة وسط
فليفة خضراء مقطعة وسط
علبة أناناس مقطعة

للصوص
كوب عصير أناناس (انا عصرت خمس شرائح اناناس مع قليل من الماء )
عصير برتقالة
نصف كوب سكر
ربع كوب صويا صوص
اقل من نصف كوب خل
ملعقة طعام نشا
ملعقة طعام معجون بندورة (معجون طماطم)




اول شي بنقطع الفيليه لمربعات وبنملحهن وبنبرش زنحبيل ورشة ثوم بودرة واستعملت حامض كرمال السمك وأضفت نشاء وخلطهن وتركتهن شي ساعة
ووقت القلي بلتهن بالطحين وبقليهن وبتركهن على جنب

بمقلاة بقلي البصل المقطع مع كمية قليلة من زيت الزيتون وبس يذبل بضيف الفليفلة المقطعة وبحركهن شي خمس دقائق وبطفي
كرمال ما بدنا نخلي الفليفلة كتير تستوي ما بحسها بتصير طيبة

وبنوضع البصل والفليفلة بجانب الفيليه المقلي

وبنفس المقلاة بنضيف نصف كوب سكر
ربع كوب صويا صوص
اقل من نصف كوب بقليل من الخل
ملعقة نشا
ملعقة معجون طماطم
عصير برتقالة
وكوب عصير اناناس
وبنحركهن على النار ليغلي الخليط ويصير متماسك متل العسل او الكراميل او اقل شوي

وعندها بنطفي النار وبنضيف الاناناس والبصل والفليفلة والفيليه وبنخلطهن وبنقدمهن مع الرز






فيليه مع صوص الكاري بالكريما والأناناس والهليون



طريقة التحضير :

كمان هيدا الطبق بنقدر نقدمه مع فيليه سمك او دجاج او ستيك لحم
انا استعملت فيليه السمك
بقطع شريحة الفيليه لنصفين
وتقريبا لكل كيلو فيليه بعصر شي خمس او ست حامضات
وبنقعهن شي ساعة
وهون مش بحاجة لاي بهارات لانو بدنا نحس بطعمة السمك والحامض ما رح يضهر الطعم واضح فيه بس رح يعطيه قرمشة وطعمة كتير طيبة
من بعد ساعة نقع بنصفيه من الحامض وبنملحه وبنلته بالطحين وبنقليه بزيت نظيف ليصير لونه ذهبي

صوص الكاري
المقادير
كوب كريما للطبخ او طازجة
كوب حليب جوز الهند واذا ما استخدمنا حليب جوز الهند
بنستعمل كوبين من الكريمة
ملعقتين طعام كاري حلو
ملعقة طعام سكر
رشة ملح
رشة فلفل اسود
ملعقة طعام نشا
قطعة صغيرة زبدة

اناناس وهليون

بندوب النشاء بالكريما او بحليب جوز الهند وبنضيف الزبدة والكاري والسكر وبنحركهن ليغلوا
وبنرجع بنضيف الملح والفلفل الاسود وبنحرك لنحصل على الكثافة المطلوبة وبنضيف الاناناس والهليون وبنطفئ النار

وبنقدمها بجانب الفيليه والرز


بيتزا الباذنجان




طريقة التحضير :


بنحتاج الى باذنجان عدد واحد مقطع دوائر مع قشره

بنقلي حص ثوم مفروم ناعم مع بصلة مفرومة ناعمة بقليل من زيت الزيتون
من بعد ان يذبلوا بنضيف حبتان بندورة مفرومة وسط
وبنحرك بين فترة وفترة لتزبل البندورة بنضيف ملعقة معجون بندورة وملعقة وسط سكر وملعقة صغيرة ملح واوريغانو وريحان وزعتر
وبنضيف فليفلة خضراء مقطعة وبنطفئ النار لانو ما بدنا تستوي الفليفلة


بنشوي الباذنجان بالفرن من بعد ما نملحه وندهنه بكمية قليلة من الزيت

ومن بعد ما يستوي بنوضع فوقه الصلصة وجبنة موزاريلا مع قليل من جبنة البارميزان وبنوضعهن بالفرن لتذوب الجبنة



الحلو معمول مد بقشطة وجيلو بقطع الاناناس



هالمرة ما عملت حلو لانو كان عنا معمول مد بقشطة جبلنا ياهن صديق زوجي من لبنان
فاكتفيت بالفواكه وعملت جيلو نباتي واضفت له قطع الاناناس
واجمالا بزين الوجه بكريما بس ما كان عندي كافي فاكتفيت اني بوضع شريحة اناناس عالوجه


ملاحظة اجمالا الشوربة والفتوش من الاساسيات بالمائدة الرمضانية عنا
بس بآخر عش ايام زوجي عم يفطر اكثر الايام بالمصلى فصر ت استغني عنهن ببعض الايام

وان شاءالله يكون كل شي واضح وتكون وعجبتكن مائدتي المتواضعة

رمضان كريم عالجميع

__________________





اللهم إني أستودعك ديني و نفسي وأهلي وزوجي
وأولادي وأحبتي فاحفظهم يا من لا تضيع ودائعه