الأخ الكريم أبو جوري بارك الله فيك على إهتمامك في مثل هالمواضيع ولاننسى إسهاماتك الطيبه في حلول مشاكل إخوانك وأخواتك الأعضاء ونسأل الله أن يكتب ذلك لك في ميزان حسناتك .
بالنسبه لموضوع ضرب الأطفال فأنا هنا لا اؤيد ولا أمانع وهناك لكل شئ حدود وطبعا مو كل ما إبنك إرتكب خطأ تضربه لاكن هناك أخطاء قاتله ومميته وإذا ماواجهتها من بدري بشكل حازم تطور وتزيد
أنا عن نفسي عندي خمسه عيال ولله الحمد الكبير عمره 13سنة والثاني 12سنه والثالث 9سنوات والرابعه بنت عمرها أربع والخامسه بنت ماشيه في عامها الثالث طبعا الولد أبو 9 سنوات والبنات ما أعاني من مشاكلهم كثير وإذا غلطوا أ كتفي
بتوجيه نظرات زعل وأقاطعهم ماعاد أ كلمهم وأحرمهم بعض
الألعاب إللي يحبونها وأحيانا أحتاج لتهديدهم فقط بالضرب بإستثناء الصغيره طبعا هاذي باقي مرفوع عنهاالقلم والحمدالله لحد الآن الأمور مستقره وماعندي مشكله من ناحيتهم لاكن إللي فاقعين مرارتي الإثنين الكبار ذولي ماعرفت من أي ناحيه أ تفاهم معاهم مره أحس إنهم أصدقاء وأحباب ويحبون بعض ومره ينقلبون 180درجه طقاق وهوشه والمشكله سجلتهم في نادي كارتيه يروحون النادي بعد مايرجعون البيت يبدؤن في تطبيق ماتعلموه في النادي على بعضهم وما أسمع إلا هوشتهم وصياحهم والله أنا عندي لو الطفل يكسر البيت كامل ماراح أنقهر وأحاسبه مثل ما أحاسبه وقت يأذي إخوانه الشئ لو إنكسر أو خرب يتعوض لاكن إذا فقع عين أخوه أو ضربه ضربه تسببت لأخوه في عاهه مستديمه هاذا شئ ما أصبر ولا أتحمله أول شئ إذا كانت الإصابه خفيفه أكتفي بالنصح والتحذير مع مقاطعته أمنعه مايكلمني وأحقره وإذا أنا بغيت منه شئ أرسل له واحد من إخوانه حتى لوكان هو بنفسه واقف جنبي ما أعطيه وجه مره أوجه كلامي لواحد من إخوانه وهو يوصله له
مثلا تقول لك أمي ذاكر دروسك أو أي عمل خاص فيه المفروض يقوم فيه ولازم إني أذكره به أرسل واحد من إخوانه وأطنشه مره حتى لو حاول يعتذر أو يرسل واحد من إخوانه يقول له رو ح قول لأمي تسامحني أنا أوعدها ماعادأ كرر
غلطي بس خلها تكلمني وترضى عني طبعا أنا في البداية أرفض أصالحه حتى يكرر وأشوفه يبكي من الحزن بعدين خلاص أسامحه وفي الحقيقه هو ماعاد يكرر غلطته نفسها إلا يسوي غيرها بس بطريقه و أسلوب يختلف عن الخطأ الأول ونستعمل معاه نفس الطريقه في العقاب خصوصا إن فترات أخطائه متباعده فنضطر لتجديد العقاب إذا كان الخطاء بسيط وخفيف أما إذا كان غلطته كبيره أنا هنا ما أقدر أتحمل وأصبر أذكر قبل فتره كانوا عيالي الكبار يلعبون مع بعض ولدي الكبير شات برجله أخوه إللي أصغر منه على خشمه وأخوه تعور ونزف دم من خشمه بغزاره وماتوقف وإضطرينا نوديه المستشفى يوقفون النزيف وحينها أنا جن جنوني وماقدرت أتحمل بالذات إني منبهه عليهم إثنيناتهم من قبل ولعدات مرات سابقه بأن يتركون اللعب والمزح العنيف مع بعضهم لاكن ما أستمعوا لكلامي هنا أنا عندي بلغ السيل الزبى والخيزرانه إللي شاريتها لتهديد بها حان وقت دورها ومسكت الولد وضربته ضرب أتوقع إنه راح يحكيه لعيال عياله أنا أول مره أضرب إبني بقسوه في حياتي وبشده هاذاك اليوم صح ما أنكر إني تندمت في داخلي نفسيا بعدها بس ما حنيت عليه ولا أظهرت ندمي على ضربي له وبلعكس حسيت إن الضرب ذاك الوقت جاب فايده معاه عقبها جاني باليل وباس راسي ويدي و يبغى يبوس رجولي بس أنا رفضت وأعتذر ودمعته في عينه وقال لي يا أمي أنا آسف وعارف إني غلطت وأستاهل الضرب إللي ضربتيني إياه وأستحق الموت على إللي أنا سويته بس والله يا أمي ماكنت قاصد إني أأذي أخوي وأوعدك ما أ كررها أبد أنا تماسكت قدامه شوي وقبلت إعتذاره وسامحته وأنتظرت حتى طلع من عندي راح غرفته ينام وأنا إنهرت وبكيت بشده وألم وحرقه كل ما أتذكر إني قسيت عليه وضربته بشده وبعدها الحمدالله خفت مشاكلهم شويه وأشوف إن لسن الطفل دور في تحديد عقابه على أخطائه أحيانا تعاقب طفل يدرك خطئه ولما أنت تعاقبه بالضرب هو في قرارة نفسه عارف إنه أخطأ وكان يستحق أن يعاقب حتى لايتكرر الخطأ ولاكن من الصعب تضرب طفل في عمر لايميز الصح من الخطأ والضرب بعنف لهاذا الطفل في هاذا السن يزيده إصرار وعناد على إرتكاب الأخطاء وحتى الضرب على كل غلطه أشوفه غير مجدي سوى لطفل يفهم ويعي أو لايفهم لأنه خلاص صار عنده إدمان على الضرب وتعود على هاذا الوضع وبكذا تزيد عقده النفسيه ويتحول من طفل هادئ ومسالم إلى طفل مؤذي وعنيف وعصبي فيجب إن نتغاضى عن بعض الأخطاء ونحاول علاجها وحلها بطرق غير الضرب ولنجعل الضرب آخر شئ إذا إستنفذت كل الحلول مثل النصح واللوم والتأنيب والترغيب والحرمان والهجر بعدها إستخدم الضرب كوسيله إذا كان خطأ الطفل يستحق الضرب ولوضربت إضرب على حسب تحديد العقوبه بدون عنف مثلا أنت غلطت خلاص عليك ثلاث ضربات أو أربع على حسب ماتحدده أنت يالمعاقب ومثل ماذكرت سابقاإن هناك فيه أخطأ تستحق العقاب بالضرب
إذا كان الطفل يعي بخطئه وغلطته أنا شخصيا ما أستخدم الضرب إلا إذا أستنفذت كل الحلول عندي وشفت إنه لازم يعاقب بالضرب حتى يحس بغلطته وخطئه الذي عمله طبعا
في مرة حصل العكس بين عيالي الكبار يعني أبو12 سنه غلط هاذي المره راحوا يصلون المغرب بالمسجد والمسجد يبعد عنا بشارعين وبعد ماصلوا طلعوا مع الناس وأبوهم كان باقي بالمسجد متأخر وهما ماشين بيقطعون الخط حق السيارات وقفوا على الرصيف وجت سياره مسرعه وإبني الثاني قام دف أخوه الكبير قدام السياره على أساس
يمز ح معاه ولولا ربنا ستر عليه والسائق تصرف كان السياره طحنت أخوه تحت كفراتها وصلني الخبر وجارنا قال لزوجي بالسالفه لأنه شافهم طبعا أنا هنا عندي خط أحمر ما أحب المزح بهاذي الطرق الهمجيه و القاتله طبعا حصل مني علقه مرتبه وصار له درس ماينساه وماعاد تكرر الخطأ هذا قبل سنتين تقريبا أنا ذكرت هنا بعض المواقف إللي أنا في نظري أشوفها تستحق العقاب بالضرب بالنسبه لزوجي أتوقع لو عياله يتذابحون قدامه
مستحيل يمد إيده على أحد فيهم
وكل إللي عنده يناديني تعالي شوفي لعيالك حل تضاربوا يعني الشرهه بوجهي بالرغم من شدتي معاهم والله إن عيالي بالذات الأولاد لوعندهم مشاكل
يقولونها لي أنا وإذا عندهم أسرار يحكونها لي وإذا بغوا شئ يطلبونه مني أناو يثقون برأي في كل أمورهم .
أخي الكريم أبو جوري أناحبيت أذكر بعض المواقف إللي مريت فيها وحسيت إنها تستحق العقاب بالضرب والعذر والسموحه إني أطلت عليك بمشاركتي وماحبيت أشارك بشئ إلا من واقعي إللي اناعايشته .
وأخيرا أسأل الله أن يحفظ لك أم جوري وجوري وإللي جايك بالطريق وتقر عينك بهم وتفر ح
بهم يارب .

__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق




اشهد ان لا إله إلا الله وأن محمد رسول الله