السلام عليكم

بأعطيكم نبذة بسيطة بالبداية، عمري 27 متزوجة وعندي طفلين وموظفة
وزوجي عمره 31 يحبني ويعاملني باحترام وانا احبه وسعيدة معه

السلبية الوحيدة بزوجي انه مايحب يجلس بالبيت، وعذره انه مدخن ومايقدر يدخن عند الأولاد بالإضافة إلى انه عنده فكرة الرجل لازم يطلع مع أصحابه وقعدة البيت للحريم!
بالبداية كان الموضوع مشكلة عندي لدرجة سويت تتبع له وهو مايدري عشان اشوف وين يروح، وصار يروح غالبا مع شلة اعرفها ويجتمعون بملحق بيت اهل واحد منهم لكن له مدخل خاص من الشارع

معليش طولت بالتفاصيل بس عشان تفهمون معي مشكلتي

قبل عدة ايام كان زوجي مسافر، وبعد ما عاد من السفر فتحت جواله ووجدت صديقه ارسل له مقطع صوت بالواتس آب لأغاني وضحك بنت، وصورة لمشروب خمر.
وكان رد زوجي عليه استنكار مع ضحك، ما فهمت رده انه يستنكر كيف تفعلها بدوني ولا كيف تفعلها اصلا !

وقتها جن جنوني وكلمته وقلت قدامك خيارين:
1- تحلف بالطلاق انك ماقد جلست معه بسهرة فيها بنات وشراب
2- تطلقني ولك علي ما اقول لاحد بسبب الطلاق مو عشانك عشان عيالي محد يعايرهم بأبوهم

رده ماكان فيه مكابرة على طول قال معك حق تزعلين، وانا بنفسي انصدمت لانه ماقد في عمره كلمني بموضوع مشابه، لكن ماقبل يحلف بالطلاق مباشرة الا لما شافني ملزمة وإلا اطلع لبيت اهلي ، طلق انه ماقد قابل بنت ولا لمس بنت ولا شرب !

رضيت بعدها ولكن بدأنا بالنقطة الثانية، كيف يتصرف بعدها؟ يترك الشلة اللي يطلع معها كل يوم؟ وفجأة يقاطعهم ؟ اعرف شخصيته مستحيل يقبل انه قدامهم يبان مفروض عليه شي
وانا ما ابغى احط نفسي بموقف اجبره يصير بموقف محرج معهم

ويقول لإنه مدخن فاي شلة شباب يجتمعون وعندهم تدخين فأكيد فيهم ناس حدهم تدخين وناس يكملون السهرة إلى الفجر ويجيبون باستراحتهم بنات وشراب!
وحتى لو غير هالشلة اللي بعدهم بيصيرون مثلهم

يبغاني اقتنع انه مافيه الا هذا الحل، يجلس مع ناس منحطين لكنه مايشاركهم انحطاطهم، بداية الليل يجتمعون كلهم وحدهم بلوت وبنص الليل العاقلين يطلعون واللي بيكملون يكملون مع خرابيطهم

انا صدق مو عارفة أتصرف ، مقتنع تماما انه عادي يجلس معه لإنه ضامن نفسه مايغلط، وإذا صار بجلستها خرابيط بيطلع، وانا ما اقدر اجيب له اصحاب كويسين هذا مب شغلتي!

آخر حل طلعت فيه بما اني عندي لوكيشن ملحق صاحبه اخلي احد يراقب وإذا جاهم بنات ابلغ وينمسكون كلهم سواءا زوجي معهم او لا، وأخليها قرصة يتوب بعدها طول عمره من مصاحبة الشلل الفاسدة

انا صدق احس حياتي على محك ومو عارفة أتصرف ، مستحيل ارضى اشوف زوجي على وشك يخون واتفرج ساكتة، وما ابغى اتطلق بدون ما استنفذ كل الفرص واتأكد انه فعلا خاين مو يصاحبهم ومايشاركهم بكل شي

طولت مرة وعذرا قاعدة اكتب بشكل مرتجل، بس احتاج نصيحة وما اقدر أستشير احد قريب مني لإن الموضوع حساس