[ أجــامــل ]
شعر : بدر القبيان
أجامل وابتسم وأضحك وأنا في داخلي مقهور
أحاول أكتم أحزاني ورى صدري وأخبيها
أحاول أكتم همومي وأخبيها وأنا مجبور
و أحاول قد ما أقـدر أبعد عـن حراويها
لو إني كنت بانطقها مع إنها واقفة بالزور
و لكـن لازم أكتمها ولا أبيّـن معـانيها
ولو بعض البشر تدري وتكشف خافي المستور
أببلش في شمـاتتها وابتعب من حكاويها
طبيعة ماتفارقهم طبيعة من قديم عصور
ورا حكي القفى تطرد وتنبش في خوافيها
وإذا طاح الرجل مرة وصار من الزمن مكسور
تجيله طعنة بظهـره تفاجـأ ما درى فيها
تفاجئ ما درى باللي بيصير ومن وراه يدور
وخابت هقوتـه فيهم بعد ما كـان هاقيها
لجل هذا كتمت الهم في صدري وأنا معذور
همـومي في وسط قلبي أخبيها و أخليها
وإذا زاد الحزن فيني كأني بعالم مهجور
كأني بدنيتي وحدي و كل الناس جافيها
مصير الهم يترحل وأعيش بدنيتي مسرور
مصير الهم ينساني ونفسي مـا يعنيها
مصير القلب لو يظلم يجي يوم ويشوف النور
مصير الناس تتبـدل و تتغير مـماشيها
و لكن باكتم همومي وأخبيها وأنا مجبور
وطبع الهم ما يهنا بغيـر ضلوع راعيها
[ يا صـلاتي ]
شعر: خالد العتيبي
انتِ أغلى من عرفتـه في حيـاتي
و انتِ أسمى من حضني واحتويته
وانـتِ يلي كـل ما يَبْسَت لَهـاتي
في زمـاني وابتـلاني و ابتليتـه
و انقفل باب الرجـا و المقبـلاتي
ما بقى إلا انتِ على الدنيا وجيـته
يا صـلاتي ريحيـني يـا صلاتي
هـني اللي في ضلوعي ما قويته
و أغسلي مع دمعة العينُ و سُكات
و ما عرفت و ما تركت وما كنيته
آدمي و الخطـايـا بعـض ذاتي
ذنب أدري به و ذنبٍ ما دريتـه
وإن ذكرت الي حداني عن مِباتي
عَز ملكـه و العظيم اللي خشيته
كنّ تحتي جمـر وتكِظ عبـرَاتي
من حيا و اليا دريت إني عصيته
لين أكبر و استغيثه عـن ثِباتي
بين باسم الله وراسي لا حنيتـه
يا صلاتي كـل حـي لَلمِــات
والكِفَـن ما يستره و القبر بيته
ليتك آخر مـن عرفته في وفاتي
لا ارتخـت سبـابتي مما لقيته
والحياة أمست رسـوم الذاريات
وانهدم فَي الفانية صـرح بنيته
يا صلاتي و اذكريني يا صلاتي
لا نساني بالبِكـى من لا نسيته
-
__________________
اليوم حماهـ تذبح مره اخرى .. اللهم عليك بالطاغية واعوانه .. اللهم اهلكهم و سلط عليهم .. اللهم ارنا عجائب قدرتك فيهم
في هالزمن تقدر تقول أن المثلث مستقيم وشي طبيعي لو تقيس الدائرهـ بالمسطرهـ !!
التعديل الأخير تم بواسطة Reemona ; 22-07-2010 الساعة 01:58 PM