يهجرني تسع شهور... مالحل ؟؟
السلام عليكم ورحمة الله وبركاته
ان شاء الله الكل بخيييير
انا قصتي طويييييله لكن تكفون ركزوا معي
انا متزوجه من 8 سنوات وعن حب وعشق وعندي بنتين (الله يحفظهم)
طبعا شعاري انا وزوجي ( اختلفنا مين يحب الثاني أكثر ) لأني احبه اكثر من نفسي وهو نفس الشئ
لكن حصلت مشكله بيننا قبل 9 شهور وهي اني لقيت على جهازه بلوتوثات تستحي العين ان تراها وطبعا مو اول مره القى هالحقاره
قلت خلني اشوف شعوره وكأني جلست عليها رحت اضغط كذا ملف وطبعا تركت المحفوظات ومامسحت شئ وصكيت الجهاز
ولما فتحه راح للمحفوظات ولقى الملفات اللي انا فاتحتها وهنا جن جنونه
وفاتحني بالموضوع وقعدت اتبسم عشان اقهره مثل مايسوي فيني دائم
وواضح انه انقهر وصار بيننا جدااااااال الى ان قلتله ايوا ابغى انبسط مثل ماتنبسط
وسألته قلت انت تناظرني نظرة احتقار ودناءه صح ؟ ترى انا ابادلك نفس الشعور اذا قعدت تطالع الحرام
وزعل علي وحقد حقد والله تقول بعير!!!
لكن ماأتحمل زعله وحلفتله اني ماجلست على هالملفات بس كنت ابغاه يحس بغيرتي عليه اذا شاف هالبلوتوثات
ورااااااضيته عدة مرات وبجميع الطرق لكن لاحياة لمن تنادي ومع ذلك والله انه ذلني واهاني
وانا ساكته عشان ماتزيد المشاكل ومره لاحظوا مره بس ناقضته بشئ تافه
قالي انتي مانتي زوجه سنعه شكلي بتزوج عليك بصراحه انرفزت الى ابعد الحدود
عاد له 3 شهور هاجرني وقلتله لاصرت رجال تزوج والله وقتها كنت في حالة غضب ولا انا ماأتحمل زعله وجرحه وادري انها قويه
وبعدها سكت وصار يحترمني ولايجرحني لكن باقي زعلان
وعلى هالحال من شهر 6 هجري الى اخر رمضان كشفته مسجل بموقع زواج
طبعا خلاااااص ضاقت فيني الدنيا وزعلت عليه ووقتها كنت عند اهلي وقلتله لاتجي تاخذني انت ماتبيني وتبي تتزوج علي خلااااص روح الله يسهل دربك وماراح تلقى وحده حبتك كثر ماحبيتك
وحاول يتصل علي لكن طنشته وبعد اسبوعين من المشكله في رمضان ردني بس رده غبيه
وكان الوضع عاااااادي لكن ظل هاجرني الى يومكم هذا
مع ان والله اني اهتم بنفسي وشكلي ونظافتي وهيأت الجو له واكثر من مره
وشكيت ان فيه عجز جنسي لكنه سليم لان اتضح لي فيما بعد انه يمارس العاده السريه
ولا له علاقات نسائيه ولا يطلع خارج البيت الا قليييييييييل واراقب اتصالاته خوفا عليه
ومالاحظت شئ الا قبل شهر تقريبا لقيته مكلم على رقم مره وصوتها كبير لاني دقيت من جوال اختي اتأكد من انها مره
وكان قاعد معها ربع ساعه مشيت الامر وحاولت انسى
لكن قبل يومين جتني بنتي الصغيره وزعلانه وتقول :
{ياماما بابا داعد يتلم حلمه ( المسكينه تحسبها جدتها وتبي تكلمها )وهو يدحك علي ويقول هذي بنت صعيله}
طبعا هذا لسانها ماتعرف تحكي : ) الله يخليها ياااارب
وهنا كانت الصاعقه الكبرى لي لاني كنت اثق فيه وطبعا كنت اراقب مكالماته ومافيه شئ الا هالمكالمتين الغريييييييببه
خصوصا انه داااااااااائم في البيت ولا يطلع حتى شحن الجوال مايشحن الا بالشهر والشهرين 10 ريال
ولاتقولون عنده جوال ثاني لاااااا لاني مسويه رقابه وتفتيش دوري للسياره من غير مايدري او يشك
ادري اني مريضه بحبي له وغيرتي عليه بس عقب مكالمته اللي قبل يومين خلااااااااص احس اني اكرهه ولو الله كان دعيت عليه وماني طااااايقه اشوفه
وسألته قلتله من هي المرأه اللي تكلمها أنكر وقالي ماكنت اكلم ولاشئ وقلتله الا وكنت قاعد معها نص ساعه انصدم وقالي وشلون عرفتي ؟؟
عاد هو يجهل الجوالات وسالته ليش ماسح الرقم وطنش مارد علي وانا مازعلت لاااااا بالعكس كان الوضع عاااادي
لكن دائما يجي من الدوام الساعه 12 وانا اقوم من عز النوم الساعه 11 عشان اصلح الغدا
لكن لي يومين (كاااارشته) يعني مطنشته ماأصلح الغدا الا المغرب يجي من الدوام وانا نااايمه
واعلمله الصبح اقوله ترى اليوم مافيه غدا الا بعد ماأشبع نوم وهو يستغرب يقول ليييه اقول كذا مزاجي
وساكت ومبسوووط لاني ماسويتله مشكله وانا بداخلي الف سؤال وسؤال وماتمر ساعه الا وأبكي فيها
مليييييت من هالوضع وطبعا الى الالان وهو يهجرني ولاأعرف السبب الى درجة اني البس لبس كاااان يعجبه ومايتحمل يشوفني من اعجابه اما الان البسه ولااااااااااحياة لمن تنادي
وحاولت ابادره بالجماع لكن مااااااااااقدرت ومستحييييل خصوصا عقب مكالمته الاخيره
ومع ذلك متحمله وضعه المادي السييييئ اللبس ماأشريه لي انا وبناتي الا من عيد لعيد
واحسه تعود وصار يبخل علينا...وعلى نفسه لا مايبخل بالله عليكم مو شئ يقهر
عني انا ائيست ومالقيت الا الاستغفار وصلاة الليل الحل الوحيد
تكفووووووون تكفوووووون ساعدوووووني
على كثر ماحبيته كثر ماني كارهته هالحين
وحبيت اوضح نقطه هو مو زعلااااان لكنه مثل اخوي .........
بعد 3 شهور يكمل لهجره سنه كاااامله والمشكله كل اللي حولنا يستغربون اني ماحملت لان بنتي الصغيره عمرها 5 سنوات
ادري طولت عليكم وخبصت بالحكي بس ماعليه لاتلوموني لأن تفكيري مشتت وصدري ضايق الى ابعد حد
انا بانتظار الرد اللي كل يوم اقرأها
وسلامتكم
__________________
استغفرالله
استغفرالله
استغفرالله
التعديل الأخير تم بواسطة رقة ; 20-02-2008 الساعة 04:24 PM
20-02-2008, 09:35 AM
ضوابط المشاركة
العرض الشجري