زوجى وحبه لمشاهدة التلفاز .. ما هو الحل ؟
بسم الله الرحمن الرحيم
ابشكي عليكم وعساكم تحلون مشكلتي لأن صدري بينفجر من الكتمان
والتستر على الموضوع لكن ماعندي إلا الله ثم أنتم
معاناتي مع زوجي من أول زواجي تكررت 3مرات مع العلم أننا لنا عشر سنوات
أولاً زوجي رجال متدين وحافظ للقرآن ومحافظ على أمور دينه
ولكن الخلوة مع النفس البشرية وماأدراك مالنفس البشرية الأمارة بالسؤ
أبدأ قصتي
#في السنة الثانية من الزواج تنبهت ليلا وإذا بالزوج ليس بالفراش قمت وبحثت عنه وإذا به في غرفة ومقفل الباب عليه طرقت الباب عليه وبعد فترة فتح لي الباب ( عن مين مقفل والبيت ما فيه إلا أنا وإياه )وإذا بالمصحف في يديه وش تسوي قال أقرأ قرآن جواي مادخلت الهرجه راسي راح ينام جلست أفتش الغرفه لقيت فوق الدولاب رسيفر وبعدين سألته وش القصه؟؟؟ صار يشغل الدش من غير علمي ويري بالسلك مع الشبك وعلى هالحاله (تعذيب) ضاق صدري إعتذر وكسر الدش والرسيفر وسلينا بهالدنيا
# في السنه الرابعة دايم يقول لي روحي لأحد وسعي صدرك لاتجلسين بالبيت
وأقول ياعمري راحمني وغريبه فيه رجال يبغى زوحته تطلع وتخليه جالس بالبيت على نياتي ويوم من الأيام أدور بسطح البيت وأشوف لي شي فوق عند الخزانات واطلع على السلم وإذا بالدش أمامي أصعق للمرة الثانية وأكلمه بالموضوع صار كل ماأطلع يروح ويشبك الأسلاك وحالته حاله وإذا كلمته يجين راح يفصل الأسلاك (تعذيب )
وكسر الدش والرسيفر وعاهدني مايرجع وسلينا بهالدنيا
# وفي السنه السابعة شاوني انه يركب دش بس يحط قنوات الكورة وبس والباقي تشفير وافقت عليه لأنه صار إذا فيه كوره يستاجر بفندق قلت خليه عندي وعلى عيني وصار 24 ساعة عند الكورة وكل المباريات مهمة عنده قلنا معليش أضغط على نفسي وأتحمل كل واحد له اهتمامات مافيه كامل...صار أحياناً يسهر لحد الساعة2 يدوخني وما أحب أجلس معاه عند الكورة ممله جيت ونزلت ليله من الليالي والا اولرجال يناظر فيلم مصري زعلت عليه قال خلاص حطي الرقم السري أنتي عشان ما أقدر أفتح القنوات وافقت وجبت التلفزيون بالغرفة من الحرص ومشاني وبعد فتره حسيت اني أحط الرقم السري وألاقيه مفتوح ومصفر أصفار ياربيه وش هالحال قلت ماراح أقوله شي إن شاء الله ثقه والشيطان يبغى يفسد بيننا وأجاهد نفسي بس اني أروح وأعيد الرقم كل يوم أقفل وهو كل يوم يفك الرقم السري ماادري كيف
وأنا كنت أسهر وهوينام يوم صرت أنام بدري صار يسهر و صار يغير إتجاه التلفزيون وإذا تنبهت حط الكورة وعلى هالحال ليلة من الليالي نسى يغير اتجاه التلفزيون وانا نايمه تنبهت بطفلتي الصغيرة تبكي ظن إني رجعت ونمت لكن أنا كنت أبغى أشوف وش يناظر جلست تقريباً نصف ساعة أشوفه حاط قناة mbc يوم جلست على السرير ويغير القناة علطول ويحط كورة وينكر انه كان يشوف mbc وأنا عاد بلغ السيل الزبى جلست وهزئت فيه وتشرهت عليه أنت المطوع أنت الحافظ أنت قصير الثوب طويل اللحية أنت الشيخ وذليته وهو ساكت ما رد ولا كلمه
ثمن في نفس الليلة فك الدش والرسيفر ورماهم للمرة الثالثة
والحين لنا اسبوع مانكلم بعض ولا نجلس مع بعض ولاننام مع بعض
وانا عندي كبرياء ما ابي أعتذر لأنه هو الي يخطي بحقي ويناظر من وراي وحنا لنا الظاهر وبالخفايا يعلم الله مع اني ماتزوجته إلا لأنه متدين وآخرته أعاني منه مع اني وقت رضاي معيشته بدلال ودلع وصايرة له على كيفه متى مابغى
وأنا ما أحب الإستغفال لأني كل مره أكتشفه ويعيد الكرة استغفر الله
وش الحل معاه صرت ما أثق فيه
الاشراف / عفو ا تم تعديل عنوان الموضوع ليوافق مضمون المشكله
التعديل الأخير تم بواسطة رقة ; 20-02-2008 الساعة 03:17 PM
15-02-2008, 06:33 PM
ضوابط المشاركة
العرض الشجري