ماذا تفعلين لو كنتي مكاني بهذا الموقف ؟؟؟؟
السلام عليكم
لن اطيل عليكم وسأدخل بالموضوع مباشره ...... زوجي لديه صديق وبصراحه غير ملتزم زوجي يزوره دائما فهو غير متزوج او مطلق تعرف على وحده اوروبيه (انا مغتربه ) وعاش معاها فتره شهرين تقريبا بدون زواج.... زوجي قرر انو يرشده للصح فحكالوا انو هاي الحياه الي عايشها حرام بهاي الطريقه فالمهم بعد محاولات من زوجي اقتنع صديقه بانو يخلي صديقته الاوروبيه تأسلم ويتزوجوا ......
القصه مو هون القصه في يوم من الايام انا كنت عند امي لمده 3 ايام في يوم من هاي الايام الي كنت غايبه فيها.. زوجي و 2 من اصدقائه الاخرين قرروا يعملوا مفاجئه لصديقه الي قرر يتزوج انو يعملولو حفله صغيره .... احزروا انا من وين عرفت قصة هاي الحفله...... شفت مقطع فيديو بالكمبيوتر لهاي الحفله الي صورها زوجي بكمرة الفيديو بالصدفه ...بتعرفوا شو شكل هاي الحفله ؟ ... انا من اول ما شفت هادا المقطع لاخره وانا عم ابكي من كل قلبي .....
طبعا اغاني واصدقاء زوجي ووحده صديقه واحد من هاي الشله وصديقه الي عاملين الحفله عشاته وطبعا العروس ألي لابسه ( طرحتي) طرحه العرس تبعي زوجي اخدها من البيت بدون اذني و من عدا هيك الرقص وزوجي طبعا يصور ويقرب ويبعد بالكميرا على الهز والرقص (انا اسفه على هالتعبير ) ...
وطرحتي من أيد لأيد وهم عم يرقصوا .... الطرحه الي انحطت على رأس طاهر اتنجست بأيدين هيك ناس وبأذن زوجي ................
حكيت لزوجي وبكيت وحاول يدافع عن نفسه واتأسف بس حسيت انو الموضوع كان كتير كبير ..... وانا متأكده لو وحده تانيه كانت ساوت أكتر من هيك بكتير ...
بصراحه انا مجروحه كتير ...مين بس بحس فيني...
ليش ؟؟؟؟ ليش ؟؟؟؟
شو رأيكن وشو كنتي عملتي لو كنتي بموقفي ؟؟؟
انا ألي رجعه بمواضيع تانيه حابه احكيلكون بعص معاناتي من زوجي يمكن تعطوني حل او على الأقل تفهموني....
انتم بصراحه منتدى رائع
وشكرا الكم كتير
29-11-2008, 04:20 AM
ضوابط المشاركة
العرض الشجري