السلام عليكم ورحمة الله وبركاته

اتمنى ألقى عندكم حل لمشكلتي.. زوجي طيب من داخله لكن فيه مشكله متعبتني

حاولت ألجأ لأمي عشان تساعدني لكن تقول ما أقدر لأن زوجي شخصيته مب واضحه وتخاف تدخل بينا وتخسره


مشكلتي ان زوجي يجرحني بتعامله الجاف... انا ماعرف اشرح بالكلام لان دايما اختار الكلمات الخطأ ويساء فهمي

بعطيكم هالمثال "صار معاي اليوم" وقولوا لي كيف المفروض اتصرف

معلومة لازم تعرفونها: زوجي ما يحب أو يتكاسل عن واجباته كزوج مثل لوازم البيت

اليوم بعد الدوام اتصل فيني وقال لي انا بمر الجمعيه بعد الدوام بشتري لحم حق عزيمة يوم الخميس << انا كنت متوقعه اني بسير معاه
لاني احتاج أغراض لولدنا.. بس قلت عادي بقوله اييب احتاجات البيبي... " بامبرز و جاي ميلوبه" فقط

قلت له اني احتاج اشياء للبيبي وشرحت له كيف شكل الشاي قال لي طرشيه مسج
كتبت له اسم الشاي والبامبرز ورقمه

اتصل فيني معصب شوي قال : "انا رايح الجمعيه اييب لحم وطلعتي عشرين ألف غرض تبينه من الجمعيه"

صكر

يوم وصل البيت كنت انا يايه ابدل ملابسي من ريحة الطبيخ دخل قبل ما ابدل قلت له هلا والله هلا بالزين كله شافني بذيك النظره وبدل ملابسه
قلت له شوفيك ؟؟؟ قال اسألي نفسج بس قلت لج بروح اجمعيه طلعتي لي بأغراض الدنيا كلها.. سكت ومابدلت ملابسي وطلعت عالمطبخ
اجهز الغدا.. كان باقي عالرز شوي .. بعده ما خلص.. وقف عند باب المطبخ وقال ابا غداي قلت له باقي شوي قال بعصبيه شوي كان المفروض يكون جاهز الساعه ٣ وألحين الساعه ٤ شو كنتي تسوين !!! <<< يعني شو اسوي بالله عليكم !!!

هذا كله جدام الخادمه

نوعية العيش يباله طبيخ زياده شو اسوي يعني

انا لين الحين ماكلمته عالغدا كان مكشر في ويهي ومايكلمني يوم خلص الغدا كان يكلمني عادي

انا اللي مضايقني:
١. شوفيها لو ياب لي اغراض البيبي بدون هالكلام اللي يضايقني !!!
٢. ليش يعصب علي جدام الخادمه ؟؟؟؟
٣. ليش يزعل من الأساس >> عشان طلبت منه اغراض لولده اللي هو مسؤول عنه ؟؟؟؟؟؟

أريد افهم انا في شو غلطت ... وكيف اتصرف مع هالموقف ؟؟؟