السلام عليكم
انا خاطب جديد و اريد استشيركم في مشكلتي

خطيبتي من الاساس كانت ما تبغى تتزوج الآن و تبغى تكمل دراستها و عندها احساس انها غير جاهزة للزواج لكن انا اصريت و قلت انه ما عندي مانع لدراستها و انا شاري البنت و رغبان فيها و حاولنا مع الاهل الى ان وافقو على الشوفة و تمت الشوفة و اعجبتني البنت و سوينا الملكة

هي انسانة مؤدبة و محترمة و مدلعة شوية في بيت اهلها يعني كل طلباتها تقريبا مجابة، لكنها ترى ان البنات في المجتمع مكبوتين و مضطهدين و هذا الشي خلاها تحب تعمل الي تبغاه سواء في اللبس او الخروج و العمل و ما تترك شيء في نفسها احيانا لدرجة التهور و لكن للأمانة في حدود الأدب و الشرع

شخصيتها مترددة في اتخاذ القرارات و تحب تكون مثالية في تصرفاتها و احيانا احس انها لديها عدم ثقة انها تكون زوجة مناسبة لي (انا موظف بوظيفة مرموقة و الحمدلله متدين باعتدال و لي مكانتي عند الكل) و مرة قالت لي انها تشوف اني انسان جدا طيب و استحق وحدة اطيب منها

انا شخصيتي رزينة و هادئة و اتناقش معها بالعقل بدون عصبية ابدا و احب ادلعها و اهتم بها و حنون معها و امدحها دائما و اجيب لها هدايا و ارسل لها رسايل جوال و اتصل بها اتطمن عليها لدرجة انها مرة قالت لي ان المشاعر و الحب هذه كثير عليها و ان انا لازم اخفف الحماس شوية معاها و هي ما ترسل رسايل و مرة وحدة بس قدمت لي هدية و ما تعرف تقول لي كلام حلو و انا قلت لها لو استمريتي بالشكل هذا انا راح يروح الحماس الي عندي و اعاملك ببرود

انا احبها و واضح علي من كلامي معها و تصرفاتي و قلت لها احبك لكن هي قالت لي انها مو قادرة تحبني الى الآن رغم انه شكلي يناسبها لكنها تشوف انه شخصياتنا مختلفة و ممكن نكون اصدقاء بشكل ممتاز لكن تعتقد انه مافي توافق بيننا كأزواج، و هو فعلا في اختلافات بيننا مثلا في الهوايات و الاذواق، هي تعتقد انه لو كان فيه توافق بيننا كان حبتني تلقائيا بدون ما نتكلم في الموضوع، فهل اعتقادها صحيح؟

احيانا احس انها معقدة من الزواج و الرجال و هذا هو السبب لتصرفاتها معايا لكن انا اخاف يكون فعلا مافي توافق بيننا و تستمر علاقتنا بالشكل هذا يعني انا اعطيها حب و وقت و رسايل و هدايا و كلام حلو و هي في المقابل ما تقول كلام حلو كثير و ماترسل مسجات او هدايا و انا اخاف تكون علاقتنا على المدى البعيد بالشكل هذا و بالتالي انا احس بالملل و عدم التقدير و اشعر بالنقص في حياتي الزوجية و العاطفية، انا ابغى اعيش حياة زوجية سعيدة فيها حب و عطاء متبادل و ما ابغى اني اظلمها او تظلمني

اتمنى تعطوني رأيكم من النساء و الرجال
و هل تعتقدو انه مع الوقت ممكن تتغير خطيبتي؟
و كيف ممكن افسر تصرفاتها و اتعامل معاها بطريقة صحيحة؟