مساكم الله بالخير
ده تانى موضوع لى اتمنى من الله ان الاداره ما تنقلهوش زى موضوع امبارح .

عاوزه اعرف أيه اللى بيجرى للرجاله لما تعدى سن الخمسين.
دماغهم ومشاعرهم بتتغير ليه؟
اللى هقوله ده الله عليه خير شاهد انى صادقه قسما برب العزه

المحطه الاولى:

راجل محترم جدا . اتجوز بنت اصغر منه ب20 سنه كان وقتها سنه 37 وهى 17 وكان مطلق قبلها وعنده طفلتين.
البنت حبته جدا وعارضت اهلها ،اهلها ماكانوش موافقين لفرق السن وانه مطلق
اتجوزته فى شقه أوضه وصاله ، كملت جامعتها وهى متجوزه وكانت بتساعده فى شغله كمان
طليقته كفرت سيئاتها سنين وبناته احيانا كانوا بيضايقوها
ساعات تشتكى وساعات تعيط وساعات تسكت
الزوجه كانت شايفه جوزها احسن راجل فى الدنيا رغم كل الحاجات الوحشه اللى فى حياتهم ، فضلت تدفعه وتشجعه وتقوله انت احسن انت تستاهل الافضل ، ربنا كرمهم واشتروا شقه اكبر بكتير دفعت هى جزء من تمنها من ورث جزء بسيط بس ده اللى حيلتها وباعوا الاوضه وصاله اللى كانوا مهرها اصلا يعنى ملكها واشتروا شقه ، كتبها بأسمه وخجلا منها ما قدرتش تصر انه يكتبها لها
العربيه البسيطه اتحولت لمرسيدس والشقه الاولانيه بقت دوبلكس وشقه فى المصيف ومكتب تمليك
كرم كبير من ربنا
كان ناقص شىء وحيد ان بناته يبقوا فى حضنه عشان سعادته تكمل.امهم اتجوزت وجاب البنات يعيشوا معاهم نهائى
خلفت الزوجه ولد ،وبنت .الزوج اصلا ماكانش عاوز اولاد رغم انه بيحب الزوجه دى ، كان عاوزها تقريبا له لوحده!!!!
ربت البنات دول كما ينبغى رغم ايام سودا شافتها ،الزوجه قنوعه ما بتطلبش حاجه ولوجاب هديه تقول له ده كتير ، مش استخسار بس هى ست بيت وهو اللى بيخرج هو محتاج يكشخ وينور بين الناس .
لما جاب بناته حب يجيب للزوجه عربيه غاليه قالت له لا انا ما بعرفش اسوق هات لى عربيه على قدى مستعمله انت اللى تركب افخم عربيه وفعلا غير العربيه بعربيه احدث وافخم
واشتروا فيلا بدل الشقه الدوبلكس،
الزوج شكله اتغير بقى احلى واجمل واشيك واغنى ومنصبه بقى عالى جدا، بقى من انسان شايف نفسه قليل لانسان منتهى الثقه فى النفس والعقل
قد ايه الزوجه كانت بتتهبل عليه لما تشوف شكله وهو منور وخارج من البيت.كان حبيبها ودنيتها
بتخدم البيت بحب ،سعادتها لما تعمل طبخه وتستنى تشوف تعبير وشه بعد اول لقمه لو ابتسم تسمى الله وتاكل وتسعد ولو كشر تزعل وما تاكلش.
البيت زى الفل والبنات اتغيروا خالص واولادها ماشاء الله، هدومه مكويه على طول حتى لبس البيت والبيت متبخر وريحته تهبل دايما
الزوجه وزنها زاد ما بقتش غصن لبان.غلطانه طبعا انا عارفه
مش مهمله فى روحها بس ست عاديه نضيفه ومحترمه ومثقفه وست بيت ومتدينه وربنا حابيها بجمال خلقه
كل ليله لو طلع ينام لايمكن تقعد بعده لازم تطلع تنام وراه على طول،تضحك له وتحط ايدها على ضهره وتقول له كلام دعوه للفراش.كتير بتبقى مش قادره اصلا بس بتعمل ده عشان ربنا يكرمهاوهو كمان يتبسط
15 سنه مافيش يوم فراشها ده برد ابدا.
وبعدها تحط جنبها وتقول اللهم انى ارضيتك وارضيته اللهم فأرضنى
الزوجه عندها عيب فظيع ( العصبيه ) الحمل تقيل وشايفه ان هى مسؤله عن بيت و4 عيال شابتين وطفلين والبيت كبير اوى ، وهى مش مخليه الزوج يعمل اى حاجه خالص
مدارس ، دكتور ، دروس ، عنايه ، شرا لوازم او شرا الملابس كله عليها
ضغط انها تنزل معاه الشغل عشان هى كده هتبقى غبيه من كتر قعدتها فى البيت، رغم انها بتجاريه فى مواضيع الحياه والثقافه وكل حاجه ماعدا السياسه ما بتفهمش فيها
الدلع الزياده خلاه يتخلى عن كل مسئولياته كراجل عدا الصرف طبعا...
نزلت الشغل معاه ومسكت الحسابات راح رامى عليها كل الاحمال، قالت له خد تلت لروحك انت اعمل بيه اللى يعجبك والتلتين انا هدفع منهم مصاريف البيت والضرايب والمدارس والاعياد واللبس هنحوش كمان
فعلا بعد سنه شالوا مبلغ محترم والدنيا بقت احسن والدخل زاد والبركه عمت عالكل

المحطه التانيه:

فجأه من غير مقدمات قال لها انا هسافر جانى عقد عمل كويس
عيطت وقالت له هتسيبنا لمين طاب خدنا معاك قال لها ما ينفعش، طاب احنا مش محتاجين فلوس هتسافر ليه؟بلاش تخسرنا بعد كده هتيجى من الغربه مش هنبقى عاوزينك فى البيت لاننا هناخد على العيشه لوحدنا هتتحول لشنطة هدايا ارجوك بلاش
ماسمعش الكلام وسافر وسابها مع 4 عيال ومكتب شغله يقطم الوسط سنها كان وقتها 30 سنه وهو 50
نزل اول اجازه قال لها انا عاوز اعرفك على مدام فلانه ارمله وبيننا شغل ، هنعزمها بالبيت
الزوجه وافقت الزوجه واثقه فى جوزها تماما،الزوج بيقول لمراته انه بيحبها وبيتكلموا يوميا وهو فى غربته عالماسنجر....وحتى انها تحكى له على مشكله بقى ممنوع ومبرره انا بتعب وبطفح الدم ومش ناقص مشاكل
الزوجه احتفظت بالمشاكل لروحها وبقت تحلها لوحدها ، كل يوم يكلمها عن شوقه وحبه وتعبه ووحدته
ضاف عليها عبء مكالمات الماسنجر كل ليله 4 ساعات بالاضافه لاعبائها اللى هو سايبها اصلا.ربطها فى الساقيه تمام عشان ما تشوفش حاجه
عزم الست فى البيت مراته استقبلتها كويس ست كبيره عندها 50 سنه مش حلوه وتعليمها على قده.مافيش مايدعو للشك!!
مره موبايله وقع وفصل خالص الزوجه حبت تصلحه ونجحت واول ما فتحته لقت ماسيج للست دى بيقول لها فيها انا جاى استنونى!!!دمها نشف وكلمته بهدؤ ، قال لها ماكانش قصدى انا بعتتها ليها بالغلط، صدقته وقعدت تكلمه ان دى ست ارمله ما يصحش تبعت لها الكلام ده افترض اهانتك او فهمتك غلط، انت عندك بنات ما ينفعش نقول لعيالنا ابعدوا عن الشبهات ونحط روحنا فيها
وسافر تانى بعد الاجازه.
المهم الست دى كلمتها تحذرها من ان جوزها بيعرف واحده وهيتجوزها. الزوجه كلمت الزوج انكر تماما.الزوجه دعت ربنا وقامت الصبح الزوج كلمها قالت له انت اتجوزت فلانه ( اللى هى الست اللى جت بيتهم وقالت لها جوزك هيتجوز عليكى) قال لها مين قال لك قالت له هى،رد أيوه
اتجوزتها وطلقتها.
الزوجه جالها انهيار عصبى ودخلت المستشفى الزوج نزل لها بعد 10 ايام من بكاها وترجيها ليه انزل انا تعبانه وكان بيرد عليها انتى عاوزانى انزل عشان تعملى لى مشاكل
الزوجه ماعرفتش حد باللى حصل والزوج هو اللى فضح الدنيا جه وقال مبررات هبله مالهاش معنى زادت نار الزوجه ومشى رجع سافر من غير ما نارها تبرد ولا تفهم ليه اتجوز عليها.طاب انا عيبى ايه ؟مايردش ؟ طاب ازاى بتقوللى بحبك وتنام معايا وتنام مع واحده تانيه ؟ مايردش.
ازاى خدعتنى ازاى ضحكت على ازاى انت غشاش كده.طبعا مافيش رد
بقت تتعالج نفسيا واللى حواليها يضغطوا عليها انها ماتتطلقش وهو عامل حمله اعلاميه كل مايجيب لها حاجه هديه وبقى رد فعل اخواتها : الراجل بيجيب لك هدايا مش بترضى عنه ليه.كرهت الهدايا وكل شىء من ناحيته ومع كل ده ماحرمتهوش من حقه الشرعى ابدا ولا ليله ولا مشت بناته من البيت .
الاخوات فى المنتدى هنا قالوا لها نزوه ما تتطلقيش هى بس اللى كانت عارفه انها مش نزوه وسمعت كلامهم
تقوله نيجى نعيش معاك يتحجج.طاب ارجع ......... نعيش فى عشه ونبيع البيت لو القصه فلوس يرفض ويقول لها انتى عاوزه تضيعى مستقبلى.طاب اعمل لى فيزا مفتوحه .ماينفعش.
طاب فيزا زياره وكل ماتنتهى جددها.مافيش حاجه اسمها كده
طاب طلقنى .لاء
الزوجه فقدت عقلها وصحتها وروحها وربنا مايورى حد اللى كانت فيه ولا الايام السودا اللى شافتها .
طاب ورينى ورقه الطلاق بتاعه الست دى .الجواز كان عرفى وانا قطعت الورقه.طاب عزل من العماره اللى هى ساكنه فيها ....لا دى مصاريف وكل اخواتى فى صفه طبعا
جنون
عمل على الزوجه حمله انها نكديه ومقرفه ومش بتثق فيه بالله عليكم بأماره ايه تثق فيه؟
فضل الحال كده سنه ونص والزوجه مااشتكتش لاهله خالص.وهو سايب الدنيا ومسافر عايش حياته لوحده .
الماسنجر مليان اسماء بنات و الموبايل ارقام ستات .بدأت تدور وراه وهو كداااااااااااااااااب
مارفعتش قضيه عشان العشره ماكانتش عاوزه اخرتها تبقى كده محاكم وقرف
وهو بيحلف انه بيحبها ومش بيخونها
وشويه طاب اتنازلى عن كل حاجه واطلقك.توافق يماطلها
حتى اسف ماقالها الا بعدها بشهور لما قالت له انت حتى ما اعتذرت
بناته بعد سنه ونص من القصه دى قالوا لها احنا عاوزين نرجع لامنا انتى نكديه وابونا حر يتجوز زى ماهو عاوز
تخيلوا سواد الدنيا والعيشه.الكل شايفها هى اللى غلطانه ماحدش حاطط روحه مكانها ماحدش حاسس الا بالزوج والهدايا والكلام الحلو أنما الفعل هى بس اللى بتشوفه
المهم قالت له انا سحبت ورق الولاد من المدارس وهنسافر معاك ياكده يا نتطلق.بعد مماطله وافق
سافرت وهى عارفه انها ياترجع متطلقه ياحياتهم تتعدل

الإشراف/تم تعديل العنوان بما يناسب المضمون

باقى القصه


المحطه التالته:



سافرت وماقدرش اجتماع غربه وقهر ووحده عليها

اهمال ليها وعجرفه ومعامله 10 ايام زفت ويومين كويسين.

ولما تقول له طاب اعتقنى لوجه الله يقول لها لاء...طاب افتكر انى ربيت لك بناتك يقول لها عند ربنا.

قبل السفر وعدها بشغل وطبعا خلف وعده وهى كمان كرهته وكرهت عيشتها ودنيتها ولسانها بقى مجنون بقت تقول له انت ماسكنى عشان انا ضعيفه وماليش حد لما اقوى هرميك زى ما انت رميتنى كان جواها حقد وغل رهيب ناحيته

اه بتنام معاه كالعاده بس عشان ربنا مش عشانه وتعيط وتدعى ربنا يخلصها من الاسر ده

بدأ من تانى شهر سفر يكلمها عن ستات وبنات تانيه هتموت عليه وبتعاكسه سنه 52 سنه وبيراهق..!!

خلاص الراجل ده مات جواها بعد كلامه ده بقى حاجه كده وخلاص .يعنى جواها اتحول انما لسه قايمه بواجباتها كامله كزوجه وام وربه منزل.

وفى ليله بعد ما قضى وطره منها قال لها انا هطلقك لانى هتجوز

جالها خرس

قال لها انا عاوز اطلقك بس اتنازلى عن كل حاجه

وبدأ اسبوعيا يسافر للست التانيه بدبى 3 ايام بالاسبوع ويسيب الزوجه بالبيت مع اولادها الاتنين فى بلد غربه.

كان يرجع يقول لها شفتى جابت لى ايه؟او يجيب هديه للولاد وزوجته لاء.

قهر وحاجه لو هوصفها هتاخد كتير اوى.الزوجه بقى جواها موت

4 شهور كل اسبوع 3 ايام يروح دبى عشان الست اللى هيتجوزها

وشويه يقولهاهطلقك وشويه مش هطلقك.يعنى موتها نفسيا كمان.مضت له ورقه بأنها اتنازلت عن كل حقوقها

كلم اخواتها قال لهم انا هطلق اختكم لانها مقرفه، ماقالش عشان بحب وهتجوز.....

قال لها قولى لى بحبك وانا ما اطلقكيش

حست بأهانه جامده اوى وانه بيبتزها ، ماقدرتش تطلعها من بقها

قالت له طاب ما تطلقنيش وهكتب لك ورقه انك تتجوز رفض

طاب طلقنى وسيبنى فى البلد دى اشتغل واربى العيال واهو نبقى تحت عينيك.رفض

قال لها هطلقك وهلغى اقامتك انا مش عاوزكم معايا

فاضل على طلاقها 3 شهور والزوج عايش حياته .بدأت تنزل معاه تشترى له لبس شهر العسل مع العروسه الجديده وتسمع حكاياته عنها وبقت عايشه بشخصيه غريبه تايهه وتعبانه وكل ده بتعمله عشان يوفى ويطلقها

المهم بعد التلات شهور اخد وطره للمره الاخيره والصبح نزلوا اتطلقوا ورجعت بلدها



المحطه الاخيره:



ماحدش هان عليه يقول لها اتطلقتى ازاى او نفسيتك شكلها ايه رجعت لوحدها خالص

خدت ولادها فى حضنها ودورت على شغل واشتغلت والطليق عاوز يرجعها وقله ادب منه وطوله لسان وشرشحه

وهى رافضه تماما

الزوجه دى اتغيرت خالص وزنها قل جدا وشكلها اتغير صغرت 10 سنين وانفتحت على الحياه

رجعت بعد الطلاق صفر اليدين ، بس جواها امل ان ربنا هيكرمها وألفت اول كتاب لها

الكتاب لقى صدى محترم واهلها لجايزه محترمه فى بلد عربى وعملت الكتاب التانى ، صحيح مش بتكسب فلوس بس اهى عرفت جواها انها مش تافهه ولا تستاهل تترمى

الطليق هيموت يرجعها وبيهدد ويتوعد وساعات يوعد ويقول اتعلمت وفى نفس الوقت لسه مع الست اللى فى دبى

بينزل بلده وبيقعد فى شقه فى بيت الطليقه البيت كبير وفيه شقتين بينهم باب.

ماتقدرش تسيب البيت لانها مالهاش مكان تانى واخواتها البنات ماعرضوش عليها تروح لهم وهو هنا ولما حبت تجرب مره وتفرض روحها على واحده من اخواتها بالذوق كده الاخت قالت لها مالكيش مكان ورجعت مكسوره

حاربها فى شغلها لحد ماسابته وقعدت فى البيت،شاركت واحد متجوز واتقدم لهافى شغلانه تطلع لها فلوس ومشى الحال الطليق عرف قادت فيه النار،ولع الدنيا وكلم زوجه العريس وشنع على طليقته وهددها ياخد منها العيال لو اتجوزت وضربها كمان قدام عيالها ، وعيالها سنهم 14 سنه قال لهم امكم عاوزه تتجوز قالوا لها لو اتجوزتى مش عاوزين نعرفك وهنقعد مع ابوناوفضلوا واخدين منها موقف لمده طويله

الطليقه طبعا اتنازلت عن الجوازه واتنصب عليها فى فلوسها وقعدت اهيه زى البيت الوقف.

الطليق اتجوز حبيبته بتاعة دبى وجاب لها شبكه ومؤخر كبير نزل خطبها من اهلها الزوجه الجديده سنها 53 سنه ومطلقه مرتين ، والطليق بقى 55 سنه وهى فى دبى وهو فى غربته،ولسه عاوز طليقته ترجع له ،وكمان متعرف على واحده جديده فى بلد الغربه اللى هو فيها واظنه متجوزها

هتسألونى وهى ليه بتسمح له ييجى البيت

لانها مالهاش مكان تروحه وهو بيقول لعياله قبل منها انا مش هينفع انزل اشوفكم لانى ماعنديش بيت وامكم مانعانى اجى البيت

طبعا ياريت تفهموا الوضع والابتزاز العاطفى وان منظر العيال وهم بيبصوا لامهم الجباره منظر صعب

ماحدش يعرف من الجيران انها اتطلقت ولا يعرفوا ان البيت فيه جواه شقه منفصله يعنى الكل عارف انها لسه على ذمته.....يعنى واقف حالها وهى كمان زهدت الجواز والرجاله وهى لسه 35 سنه

الطليقه جواها حاجه غريبه لسه بترعى مصالحه وماله ماكرهتهوش ولا عمرها دعت عليه بس مابقاش زوج او راجل تتمناه لا بقى اخ دى عشره 17 سنه

ولما ثارت مره وقالت له انت عايش حياتك ومتجوز عاوز منى ايه؟ قال لها بحبك وعاوزك وانا اتعلمت

قالت له لو كنت اتعلمت ماكنتش من واحده لواحده انت انانى وخربت البيت عشان ولا حاجه

قال لها انتى اللى انانيه.مارضيتيش ترجعى لى ومش بتحبينى

حتى فى العيد بيدبح فى بيتها ولما قالت له مراتك بقى تشيل همك تدبح وتتحملك وتراعى فلوسك ومصالحك وشيلك مش الضحك ليها والقرف للغلبانه طليقتك

قال لها انتى ست مش كويسه وبتقطعى رزق الغلابه اللى بيستنوا اللحمه من العيد للعيد!

بناته رجعوا ييجوا البيت عند الطليقه وعند اخواتهم تانى لان امهم قارفاهم وكمان عشان يشوفوا ابوهم لما ييجى من السفر.وهى اعتبرت روحها اخت للكل بتخدمهم طول النهار واخر الليل تدخل شقتها وتنام لحد ما يسافر.فندق وخدمه ببلاش يعنى..حتى عربية طليقته بيقضى بيها مشاويره لانه ماعندوش عربيه هنا.النسوان فلسوه

طبعا هو هيموت قهر انه البيت عمران من غيره وحتى بناته عند طليقته والاخوات الاربعه سوا وهو اللى غريب ، بناته بيأمنوا لام اخواتهم اكتر من امهم وابوهم دلوقتى عرفوا انها ست كويسه وهى والله بتحبهم وبتفرح بجيتهم عندها وبتلح عليهم يزوروها كتير

الطليقه دى يتيمه اب من وهى عندها 10 سنين ويتيمة ام وهى 20 سنه لسه ومالهاش حد لاخال ولا عم واخواتها بنات كل واحده مع نفسها.يعنى مالهاش الا ربنا
ولحد النهارده بيقول لها رغم انك مش بتدينى ماسيجات وكلام حب زى التانيين بس انا عاوزك يعنى برضه كلامه مش موزون
حب ايه وازاى بعد كل ده
عاوز صفحه جديده طاب ازاى اجيب له صفحه منين

القصه طويله انا عارفه بس الراجل ده عاوز ايه؟

متجوز وفيه ست على ذمته .وطليقته قالت له انها مش هتتجوز خلاص لاهو ولا غيره

ماينفعش الطليقه ترجع له خالص لانها ماتت ناحيته حتى مش هتقدر تديه حقه الشرعى ماحدش بينام مع خاله او عمه من وجهه نظرها

ثم لو رجعت له هو مش هيتغير ابدا.وهى من جواها شاخت وعجزت ما بقتش حمل غيره وقرف

يعنى يا اما هتطنشه خالص وهو عاوز يبقى محور اهتمامها تانى وتموت عليه يا اما هتغير وبرضه مش هيتحمل

يعنى فشل من كل الجوانب

عارفين انه لما بيمرض بيجرى عليها وهى اللى بتشيله ، وهى برضه اللى لما فى اخر عمره (ربنا يخليه لعياله )هيحتاج يتسند هيتسند عليها لانها هتسد ولانه عارف انها اصيله وهى كمان مش هترميه



هو جزاء الاحسان كده.وللا الست دى فعلا تستاهل تترمى.

هو دلعها ليه هو اللى خلاه يعمل كده، معقول بعد كل ده يكون جزائها كده

الراجل ده مصلى ومحسن ومش بيعمل حرام لا بيتجوز

، بس عشان ماحدش يقول انه ماعندوش دين .

فيه حاجه غلط عاوزه اعرف ايه هى
هو انا كان المفروض ابقى ازاى عشان جوزى ما يبصش بره
هو انا قصرت فى ايه
هو الرجاله عاوزين ايه؟انا راعيت ربنا فيه وفى بناته واولادى وماله وكنت حريصه عليه وربنا شاهد......
لما انا عملت كل ده وفى الاخر اترميت ملط بعد عشره السنين ...يبقى اثق فى اى حد ازاى
حقوقى راحت وحياتى كمان وشبابى ....هو الصح ان الراجل يكفر سيئات الست بتاعته لحد ماتقول له حقى برقبتى

ممكن ما تردوش على براحتكم بس بلاش هجوم انا دموعى مبهدلانى وانا بكتب لكم.مش ندم ولا حسره ،لا وجع كده مالى قلبى ولو ما فضفضتش كنت هتخنق

انا مش يائسه لا والله بس متعجبه منه ومش فاهماه انا بعزه والله بس زى اخ او قريب.

يمكن اللى حصل لى خلانى مش طبيعيه

اعذرونى طولت عليكم
معلش سامحونى اختكم ومخنوقه

فتوشي
قرأت الموضوع اكتر من مرة ... مش عارفة استوعب كل اللي وصفتيه ... ياااااااه !!!
ولسة بتعزيه ؟؟!! .. على هالموال أنا جنبك بطلع مش ست !! .. مش عارفة من وين الستات بتجيب الصبر !!

معلش رح أأجل الرد في الموضوع لأني لو رديت ممكن لساني يزل بشتيمة .. كل اللي نفسي اعمله احضنك وامسح دموعك ..ربنا معاكي

كملي فضفضة .. ولما تهدي رح نحكي بالعقل .. هاد بعد اذنك طبعا ..

ربنا ينور بصيرتك ويفرجها عليكي وعلينا والمسلمين اجمعين

يا حبيبتي يا فتوشي ...........والله كسرتي خاطري

قصتك جدا محزنة

عملتي الصح لما فضفضتي لان الانسان المفروض ما يخلي هل الامور تتراكم في صدره

ليس لدي ما اقوله لك غير اني ادعيلك من كل قلبي بالسعادة والراحة النفسية ونسيان كل

ما يكدر صفوك

وعلى فكرة اختي فتوشي انا من المعجبين بردودك جدا جدا جدا

بارك الله فيك والى الامام دوما

__________________
اللهم اني اسالك باسمك الحبيب الكافي......
ان تكفيني كل اموري مع زوجي...مما يشوش خاطري ويسهر ناظري....
الله الف بين قلبي وقلبه كما الفت بين قلوب عبادك,اللهم سخره لي كما سخرت البحر لموسى....عليه السلام....ولا تجعل لزوجي حظا في النساء مع غيري ابدا....
يا حي يا قيوم...واجعلني الزوجة الوحيدة له دائما...واجعلني ماء عينه ودم قلبه ودفء حياته واسعدني ولا تشقيني معه.....

يا ارحم الراحمين.....اللهم ارزقني ذرية صالحة مؤمنة بك وحدك....وابعد عنهم شياطين الانس والجن....

اللهم اميييين

maimai واميرة موناكو جسمى قشعر يخرب عقولكم:24:

عصافيرى انا بضحك بس كنت اتخنقت حبه وحبيت افضفض كده

كلام بالعقل يبقى مواعظ وانا طهقت مواعظ

بصراحه انا بس عاوزه نتناقش بس ده المطلوب يعنى نرغى رغى حريم ورجاله لو يحبوا يردوا

وبلاش كلام ...... من الاعضاء الاخرين بتاع صلى وصومى وكده انا ولله الحمد براعى حق ربنا تمام و
امبارح بدأت القصه من البدايه بتاعه ست ب100 راجل بس الاداره حذفتها كانت قصتى من وانا عشر سنين

تصدقوا فكرت اعملها قصه يمكن تتاخد فيلم بس هيبقى هندى اوى
عارفين انا برغى معاكم ليه لانى ما بتكلمش مع حد خالص غير الورقه والقلم وانتم
ياللا بقى ارغوا معايا .......مستنياكم:25:

فتوشي ..كان قصتك قريبه من قصتي بس يالله هذي الدنيا دراسه وعبر ولا ليش سميت دنيا


فتوشي غلطتي كثير كثير في امور لكن أخاف أقولها وتشيلي علي بخاطرك وانتي مو حمل كلام صح؟


لكن بالاول والاخير الشرع حلل التعدد فلوولا هذي التي نقلت لك زواجه لما حدث ماحدث وكان الصبر وتحمل البعد اهون بكثير من كونك علمتي ماذا يفعل في غربته


هكذا هو الفراق ياتي بعد وشايه ونقل اخبار للطرف الاخر





















































لاحول ولاقوة إلا بالله

فتوشي انضممت الينا انت 55انا64 الله يعينك ويقويكي اسمك جميل وطيب وردودك حلوه

__________________
http://live.gph.gov.sa/
اللهم اني استودعك اولادي

بوصي انا كنت هحللك الموضوع جملة جملة

بس انتي قولتي انك بتفضفضي ...

يبقى مش محتاجة غير اني اواسيكي

بس نصيحة أخيره بلاش التضحية اللي مش في محلها لواحد مش جوزك !!!

انتي في حاجة جواكي مش مظبوطة على فكرة وممكن تكوني محتاجة لدكتور نفساني .. مش بهرج

يعني اظاهر من كتر ماقعدتي معاه ... مش متخيلة حياتك الا معاه .. يعني حتى انتي بتقولي انه بعد عمر طويل بالنسبة ليه .. انه مش هيلاقي غيرك يسنده.. طيب على اساس ايه يعني ؟؟ انا مش فاهمة !!

وواضح ان عندك استعداد عجيب اوي !! ومين قال انه اخوكي او ابنك حتى !! عاوزة تقنعيني ان ابنك ممكن يعمل فيكي ده كله!!

بوصي في حاجة قريتها ان الست اللي بتتعرض لأذى كتير من شريكها سواء لفظي او جسدي او معنوي بيكون عندها نوع من انواع الخوف والرعب والهلع من انها تسيبه او تتخيل حياتها من غيره... تخيلي حتى الاحساس ده نفسه بيكون عند المخطوفة .. لما البوليس بييجي يحررها بترفض وتستنى اللي خاطفها .. حالة نفسية بجد

واحساسك كله تناقضات وبيأكد الموضوع ده ...

انتي قوية جدا يا فاتوشي ... يعني انتي تقدري تقرري حياتك هيبقى منظرها ايه .. معدتيش البنت اللي عندها 17 سنة رغم انك كنت قوية برده واتجوزتي اللي انتي عاوزاه.. تجاربك واللي مريتي بيه يخليكي تعيدي حساباتك تاني وتوقفي التضحيات عند حد .. وتوقفي الحاجات اللي بتستنزف مشاعرك .. عشان انتي محتاجة كل ذرة في طاقتك ....

تصدقي اني بقعد اكتب كلام وامسحه لإن انتي بالذات مش محتاجة كلام ..

__________________

وحاجة تانية ليه كل الناس بتقلب عليكي كدا اخواتك او عيالك

وخصوصا عيالك .. يعني لو هما شايفين ان انتي تصرفاتك مش اد كدا سبيهم مع باباهم عشان يعرفوا ان الله حق...

لازم لازم الناس تقدرك ومش هتقدرك الا اذا كشرتي عن انيابك

ودي مش قلة أصل ده حق

__________________

كلام اختي helwaya مضبوط

بلاش تضحيات

عيشي لنفسك

ولنفسك عليك حقا

__________________
لا اله الا انت سبحانك اني كنت من الظالمين