في الحياة اشياء بسيطة ..وأشياء معقدة !!

والناس تختلف في تقبلها لهذه الامور حسب إحتياجاتهم النفسية والإجتماعية والإقتصادية ...الخ
مو شرط إنك تكون عالم بكل الأمور ..لكن خذ الخبرات من الحياة حسب إحتياجك وبس !!
اعتبر إن رأسك عبارة عن هارد ديسك (زي اللي في الكومبيوتر) له سعة محددة للتخزين .. ولاتخزن فيه الغث والسمين !!
خزن خبراتك حسب إحتياجك ..ولو أضطررت إنك تخزن حاجة كده على الطاير مافي مشكلة ..
بس أهم حاجة لاتعمل ديليت delete لأنك رح تحتاج للمعلومة هذي في يوم من الأيام ..

ابغا اعطيكم معلومة مخزنة في الهارد ديسك حقي ..جبتها من كتاب !!
تقول ..
( الناس يا أصحابي 3 انواع ..
ناس بتصنع الحدث
وناس تتفرج على الحدث
وناس تقول (ماذا حدث؟ )
عاد شوف انت مين فيهم ..

قيم نفسك قبل لايجي واحد لاتعرفه ولا يعرفك ويقيمك ويتفلسف عليك وفي النهاية تكره نفسك وتكره إن عندك مشكلة من الأساس !!
وصدقني ياصاحبي إن عقلك يوزن بلد ..
بس إنت لسه ماوزنته علشان تعرف ..
حاول قبل لا تطرح مشكلتك إنك تجيب ورقة وقلم وتجلس مع صاحب المشكلة اللي هو (انت) !!
بس لاحظ ..
بما إنه مافي غيرك (إنت) فالمشكلة مارح تنحل !!
علشان كده سوي حركة حلوة (اتعلمتها من واحد مستشار إجتماعي في احد الدورات )..
اسمها حركة (الفصل) !!
بمعنى إنك تجلس مع أطراف المشكلة في خيالك وتنظر للمشكلة من وجهة نظرهم واحد واحد ..
واعطيك مثال علشان لاتقول ان ابو فراس اتجنن
يعني مثلاً ..
وحدة تعبانة من زوجها وأولادها وجاتها حالة نفسية من تعامل زوجها معاها ومن تصرفات اولادها اللي ترفع الضغط ..
تجلس مع نفسها شوية وتجيب ورقة وقلم وتقعد تكتب مشكلتها من وجهة نظرها بالتفصيل ..كده 50% من (الهم والغضب) يروح ..لكن المشكلة لازالت موجودة !!
طيب ..صبرك بالله !!
المشكلة حتى الآن لها وجهة نظر وحدة ..وهي صاحبة المشكلة !!
طيب الآن نيجي للفصل العقلي ..وتفصل هذه المرأة حالتها ووجهة نظرها وتنظر للمشكلة من وجهة نظر زوجها ..
طبعاً الحبيب يمكن مايكون عنده مشكلة لأنه مفتري
لكن لما المرأة تبدأ تنظر بحيادية وتحط نفسها مكان زوجها ..أكيد رح توصل لحقيقة كانت غايبة عنها ..ويمكن تلاقي مجموعة كبيرة من الإجابات لتساؤلاتها !!
وطبعاً لازم تسجل هذه المرأة الإستنتاجات في الورقة من وجهة نظر زوجها ..بس اهم شي لاتكون المرأة مفترية هي كمان وماتشوف ولا حاجة حلوة في الراجل دا
ونفس الموضوع تكرره مع أولادها وتحط نفسها مكانهم ..وأكيد رح تعرف هما بيعملو كده ليه !!
نيجي الآن للمرحلة قبل الآخيرة ..
تنظر المرأة للمشكلة من وجهة نظر (الناس) لهذه العائلة ..
وإسمها وجهة نظر (الحكم) ..زي الحكم اللي في المباريات !!
وتكتب كل ملاحظات الحكم !!
أما المرحلة ألأخيرة وهي الأهم ..
تأخذ كل الملاحظات وتقرأ جميع وجهات النظر ..
وانا ابصم بالعشرة إن الحالة النفسية والعقلية رح تختلف لهذه المرأة وتتجه للأفضل بسبب إنها كانت (منصفة وحيادية) في رؤيتها للموضوع ..
صحيح مو كل المشاكل تنحل بالطريقة هذه ..لكن المبادرة بنية حسنة هي أول طريق لحل أصعب مشكلة بالعالم !!
والمبادرة من صفات الإنسان الإيجابي والمجتهد ..
طيب ..
ايش الفرق بين الطالب الشاطر والطالب الخايب ؟؟

الطالب الشاطر: يجتهد في لحظات حضوره للدرس ويستجمع تركيزه ليفهم ويستوعب كل كلمة ..وإذا فاته معنى او جملة يسأل الاستاذ او حتى زملائه ..ولما يرجع بيته يراجع درس اليوم ويحضر لدروس بكرة !!

اما الطالب الخايب : يجتهد في اللعب والإنشغال في الحصة ويحاول يركز على اي شيء غير الدرس إما بأذية للي قاعد بجنبه او يجتهد بالشخبطة بدفتره واللعب بالأقلام .. وإذا سأله الاستاذ تلاقيه متنح ولا هو جايب خبر الدرس ولا فاهم السؤال من أصله ..ولما يرجع بيتهم اول حاجة يسويها يتخلص من الكتب ويبدا في هبل اليوم المعتاد
معليش لو حسيتم انكم تتفرجوا على قناة طيور الجنة
لكن اليوم انا قررت ابتعد عن التكلف والتفلسف واخاطب قلوبكم قبل عقولكم !!
وسبب هذا التشبيه إني وضعت الطالب النجيب كمثال للإنسان الحكيم في الحياة ..
الإنسان الحكيم ماوصل لمرتبة الحكمة إلا بعد ما أستفاد من كل درس حصل له ..
عنده رصيد كبير من المعرفة بسبب (المشاكل) اللي مرت عليه ..
وهي الحياة أصلاً حياة بدون مشاكل ؟؟
لكنه ما عجز ..ولا ماطل..ولا تذمر ..ولا اصابه اليأس !!
يبحث عن حل حتى لو في المريخ .
الإنسان الحكيم يعرف بإن (الإيجابية) هي سر التفوق ..و (السلبية) اساس الفشل !!
و علشان كده تلاقيه غالباً مبتسم <<< كده !!

اما الطالب الخايب فهو بالتأكيد عكس الكلام السابق تماماً !!
فهو ماصار خايب إلا لأنه عايش مثل التائه !! ..
الحياة بتعطيه دروس ..لكن مايفهم إلا من الدرس القاسي ..وياليته يستفيد منه !!
رصيده من المعرفة بسيط لأنه مايحب التعقيد وعايش كل يوم بيومه ..ومشي حالك ياعم :14: !!
إذا وقع في مشكلة ..اول حاجة يسويها إنه يجزع و يقنط من رحمة الله ويبدأ في الشكوى والتذمر واليأس !!
طيب مو عيب إنك تستشير الناس ..بس لو كانت مشكلتك بسيطة او بايخة لاتشتكي وتقول (إيش اسوي ؟؟ ) لأنك رح تكشف حقيقة سلبيتك امام الناس وبالتالي تكون امام فريقين :
- إما ناس تشفق عليك وتنصحك
- أو ناس تتشمت فيك وتهزئك

وخلاصة الكلام :

(حاول تحل مشكلتك بنفسك مرة وإثنين وثلاثة ...لاتيأس !!
وفي كل مرة حاول تحلها بطريقة مختلفة ..
وانظر للمشكلة بحيادية ومن وجهة نظر الآخرين ..
ولازم تقرا وتتثقف علشان تعمل لك رصيد فكري يساعدك على توضيح الأمور من حولك )

وفي النهاية سامحونا على الإطالة
وربنا يوفقكم ويسعدكم أجمعين

اخوكم ابو فراس

(أعتذر على اللهجة العامية ..فهي حالة تصيبني عندما اكتب من صميم أعماق قلبي)