السلام عليكم ورحمة الله وبركاته


الله يجزاكم كل خير انكم فتحتوا هالقسم
لاني جد كنت محتاجه له حييييل

حالتي عجزت افسرها هل هي عين - مس - نحاسه ما ادري صراحه وشوو


بقولكم الموضوع


فتاه عمري 24 جامعيه عندي 6 اخوات
ثنتين متزوجات واربعه لا

بدات الاحظ التغيرات اللي صارت في حياتي من ايام الدراسه
كنت متفوقه والكل يشهد باخلاقي
لدرجة ان استاذاتي كانوا يمدحوني انا وخواتي عند اهلهم خارج المنطقه اللي حنا بها باخلاقنا وجمالنا وكل شي

المهم
بالثانوي تدهورت دراستي 180 درجه
اصبحت مهمله انطوائيه خجوله

وتخرجت على هذا الحال

الى الان والوضع اوكي


وقررت الوالده تزوج اخوي الكبير
وزوجناه الحمدلله وكان العرس مو بالمكان اللي حنا به بمدينه ثانيه

بالعرس جت حرمه للوالده وقالت لها ماينخاف عليك يا ام فلان زوجتي 3 عيال عندك وزوجك متوفي
ماينخاف اجل ع الباقيات

يمين بالله يوم رجعنا صارت مشاكل بين اختي وزوجها وصلت للطلاق لكن ربي ستر عليهم

والوالده بدت تمرض وصابها السكر والم بعيونها ورجولها مع العلم ان هالمرض بعيد كل البعد عن عايلتها


وانا وخواتي طبعا عقب هالسالفه نسمع بالخطاب ولا نشوفهم
اقصى حد للخطبه كلام بين الاهل وان الام تجي وتشوف
وبعدها مانسمع عنهم اي شي

ومرت سنين وانخطبت اختي اللي اصغر مني
صحيح زعلت وتكدرت وحتى كتبت موضوع هنا بالمنتدى

وصارت الشوفه لكن مالله كتب لها التمام
ةتكنسل كل شي
مع العلم انهم من اهلنا
لكن الحمدلله

طبعا بدت الوسوسه باختي والوالده وخواتي الثانيات
وطلبوا ياخذون اثر <<مني طبعا لكن بطريقه غير مباشره وذربه

انا قلت ميخالف

انا عاد ما ادري هم خذوا من اثري او لا

وعقب اسبوع قلت لاختي ليش ماتخذين من اثر زوجة اخوي
لانها هي عندنا في البيت وياما عانينيا منها
واخذنا اثر من ملابسها
ورب البيت بعد 3 ايام تقريبا اختي مرضت وتعبت وحرارتها ارتفعت
بالرغم من انه فصل الصيف لكن مره كانت حالتها تعبانه

قلنا الحمدلله ع كل حال والظاهر ان هذي هي اثار خروج العين << صح ؟

وعقب شهر سمعنا ان حرمه تبي تجي وتشوفني لولدها
وفعلا جت وطلعت لها انا واختي بعد << خيرناها وش تبي احسن من كذا

مالكم علي يمين ماجلست في البيت اكثر من ربع ساعه
وراحت ولا ردت الى يومكم هذا
حتى اعتذار ماسمعنا منه ولا كلمه تلمح بها لامي انه خلاص مانبيهم ولا اي شي<<قسسم حسيت انها شافت قروود مو بنااات

وكل العالم يستغربون ليه للحين ماتزوجنا مع اننا على قدر كبير من الاخلاق والجمال الحمدلله

انا هنا قلت خلاص عااد الموضوع ماينسكت عليه
صرت انا واختي نقرا سورة البقره لمدرة شهر

انا عن نفسي كل ماقراتها يجيني النوووم بشكل مو طبيعي وصداع بوسط راسي

وعقب ماخلصنا قراتها

حاولت اسجل بمواقع للرقيه وكذا لكن ماقدرت
وكنت اشوف بمواضيع في بعض المنتديات ايات معينه يطلبونها من المريض ان يقراا ويشوف وش العلامات اللي تطرأ عليه

انا ما استرجي اقراها ابد
مدري ليه بس اخااف

وصرت انام على الرقيه
اول الايام احس ان جسمي كله يرتعش لا ارديا لدرجة وربي احس ان السرير يتحرك معي
كنت اقول اكيد من الخوف والوسوسه وانا مافيني شي ومن هالكلام
لكن بعدين صرت احس بضيقه فضيعه
لدرجة اني جلست شهر كامل مانمت به اللييل ابد
وربي كل نومي بالنهار
اذا قاموا اهلي نمت انا
وادري ان هالشي ضايق امي لكن وش اسوي والله اخاف ما اقدر
وان سمعت الرقيا غصب عني انام حتى لوحاولت اقاوم ما اقدر والله




هذي قصتي بالتفصيل الممل


واسفه اسفه اسفه ان طولت عليكم وطفشتكم
لكن انا اخذتها من باب الفضفضه والاستفاده من ارائكم بنفس الوقت


بارك الله فيكم وجزاكم كل خيير


وعندي سؤال اخير

اذا كان هالشي تفسيره عين وكانت بامي
هل تاثر علينا حنا بعد ؟؟