رغم صراحتي الا ان زوجي اتهمني بالكذب والمراوغه . مالحل.؟
السلام عليكم ورحمة الله وبركاته
احب اطرح مشكلتي وابي اشوف الحل منكم يمكن تساعدني على الحيره اللي انا فيها
انا متزوجه من ثلاث سنين ونص لايوجد لدي اطفال الله يرزقنا ويرزق كل المتاخرين
الحمدلله احاول قد مااقدر مايكون بيني وبيني زوجي مشاكل ابي الحياه تكون حلوه بدون منغصات
انا جداً وبشكل غير طبيعي صريحه مع زوجي لازم اقوله كل شي عن طلعاتي عن وش اسوي ووش سويت اليوم يكون عنده خبر بكل شي حتى وصلت وش شربت اليوم عندي فكره انه يعرف مني قبل مايعرف من غيري ويكون بالصوره المهم خلال ذي الثلاث سنوات حصلت مشكلتين بيني وبينه المشكله الاول والله وبعزته وجلاله مالي دخل فيها وانا والله عند الناس جياتي قليله وغامضه مستحيل اسولف شي عني وعن زوجي عند الناس بس المشكله الاول كلام حريم قالو نبي نكلمه يسمح لزوجته تجينا عندهم فكره انه طاردني منهم هالعايله وقال ليش الناس قالو كذا وقلت له ورب العزه والجلاله ماعمري تكلمت عندهم بالاخير طلعت بنتهم هي اللي قالت هاللكلام مررتها وجيته وراضيته وهو المخطي وانا اقول لاتخلي الناس تشكك فيني اي شي بخاطرك تعال قلي بدون زعل ولاشي والمشكله الثانيه كنت بالرياض حاظره زواج وتاخرت وزعل علي وجيته وراضيته قلت مايصير كذا ووالله والله اني احبه وادري يحبني بس هو مدري كيف
مشكلتي اللي بتكلم فيها وابي حل صايره لها اربعه ايام كنت طبعا انا اروح للمستشفى عشان تاخر الحمل يعني اتعالج المهم هالشهر ماوداني للمستشفى وخلاني اروح مع اخوي وتعرفون علاج النساء الخاص بالحمل لازم كشف من تحت وخرابيط المهم انا عند دكتورتي يعني حرمه مارحت لدكتور لاني لوحدي ومع اخوي المهم رحت اسوي اشعه من تحت والاشعه طبعا مو عند الدكتوره في مكان الاشعه واللي بيسوي الاشعه دكتور المهم طلعت اخوي من الغرفه ياناس صعبه يكون معي ويكشف علي من تحت وطلبت ممرضه هي اللي تساعدني والدكتور بالاخير يجي بس يقيس التبويض ويطلع المهم وجيت ووالله علمته مابيه يكتشف من وراي اني اكذب عليه وقلت له السالفه المهم كتم وسكت وثلاثه ايام ماكلمني وانا على النيه يعني بس قلت له وش صار معي بالمستشفى وجيته رابع يوم وقلت انت ليه زعلان عشان شي لابد منه قال لامنقهر ليش سويت كشفيه قلت الممرضه هي اللي سوت كل شي والدكتور بس جاء بالاخير وشاف الاشعه قال لاالمفروض طلعتي مو لازم سويتي قلت هذا الاشعه مهمه ولازم بنفس اليوم قلت طيب وليه زعلان قال منقهر من حركتكي قلت طيب ليش تزعل وانا قبل ثمانيه شهور خليتني اروح لحالي مع اخوي للمستشفى وسويت ابرة تفجير ومتابعة تبويض والكشفيه من تحت عند دكتوري الاول اللي كنا نتابع معه قال انتي ماقلتي لي وانا ورب العزه والجلاله قايله له كل شي ولاقال شي ولاصار منه ردت فعل يقول انتي ماقلتي لي انتي تراوغين بالكلام وتكذبين يعني بعد كل هالصراحه طلعت اروغ وكذابه والحين لي خمسه ايام ماكلمه انا امر بحاله نفسيه صعبه عشان تاخر الحمل وهو يزيدها وبكيت الين قلت بس وتنفخت عيوني وهو يدري ولاجاءني ولاقالي شي يعني يبيني انا اللي اجي واراضيه بالنهايه انا تعبت بعد كل هالسنين اكتشف انه يشوفني كذابه واروغ وانا والله حتى طلعتي مع اهلي استاذنه واعلمه وين طلعت معهم وين رحت حتى مع امه اذا طلعت ولاشي اقول له كل شي صار ومستحييييييييييييل احد يعرف شي عني وعنه حتى امي اقرب الناس مستحيل اقولها لها شي عن حياتي وشي خاص فيني ليش اقول لهم عنها
وربي مقهوره ونفسيتي بالحضيض اني بعد مابنيت الصراحه في حياتي وكل شي مكشوف قدامه اكتشف انوه يشوفني اراوغ واكذب
ابي مساعدتكم بعد الله واللي بتقولونه لي بسويه عطوني الحل قولو لي وش اسوي
واسفه اني طولت عليكم بس من حر مابي ونفسي افضفض
التعديل الأخير تم بواسطة أعماق ; 11-03-2012 الساعة 02:30 PM
11-03-2012, 04:15 AM
ضوابط المشاركة
العرض الشجري