السلام عليكم ورحمة الله و بركاته

الأغلب يكون قرأ موضوعي في قسم ساعدني، وأبو حكيم ما قصر معاي
لكن حدث موقف اليوم يحتاج لحل سريع ، و قلت تشاركوني . و أخفف على أخونا أبوحكيم

عندي موعد في العيادة عصراً ، وأعلم أن زوجي سيذهب للكلية لكن لا أعرف متى محاضرته
في الصباح سألته : متى سنذهب اليوم . قال : من الحين ؟ بعدين يصير خير
بعد الغداء . فلان متى محاضرتك اليوم ؟ مايرد
فلان متى بنطلع عشان أرتب أموري ؟ ما يرد
مشغول بالتلفون
وأنا أريد أن أعرف هل يوجد وقت كافي لاذهب للمسجد أسمع حفظي و أرجع ، وكذلك ابنتي تاخذ قيلولة قريب العصر فما أريد نطلع وهي بأول نومها .

سكوته يعني أنه مب مستعجل . و حطيت فبالي أروح المسجد

دخلت الغرفة وقت إقامة صلاة العصر و أشوفه مجهز
سألته : متى بنروح ؟ قال : اجهزي بسرعة
قلت : ليش ما خبرتني من قبل كم مرة سألتك ؟ و أحتاج وقت أرتب شنطة بنتي و أجهز البنت و أصلي . وكل شي يحتاج وقت
قال : يلا بسرعة .

المهم طلعنا . و طلبت منه فلوس لأنه ما عندي و صار لي كم من يوم كل ما طلعت أقوله يعطيني ما يكون عنده( اختربت محفظته وما ادري وين يحط فلوسه مع اني فتشت جيوبه )

قال لي : ما عندي صرف . ونزلت بدون

الساعة 5 وشي وصلنا . و الساعة 5 و ثلث قال لي بنتظر ساعة لو ما خلصتي بروح الكلية و برد آخذج الساعة 8 ونص
قلت : طيب

6 و ثلث خلصت . اتصل طلع بالكلية
قال لي خلاص أبوي بيمرج . أبوه كان بعيد و ما قدر
فاتفقنا على 8 ونص

استوت 8 و ربع . اتصل يخبرني إنه بيمر الساعة 9 . ما سألت و لا ناقشت . قلت أكيد يقصد إنه بيطلع 8 ونص و يباله مسافة الدرب .

9 . ما وصل . و بنتي ضايقة تبا تنام
9 ونص . ما وصل . و خلص حليب البنت
9 و 40 دقيقة ... شرف الحبيب

دخلت السيارة ما سلمت . و كنت ناوية لو سالني شو قالت الدكتورة بقول الحمدلله كل شي تمام .و ما بشرح شو قالت.
و لا قال و لا كلمة لين وصلنا البيت .

ما فكر بالانسانه اللي وياها بنت بدون عربتها و مب ماخذه احتياطي اني بتم هالكثر عشان احطلها عشا او ازيد كمية الحليب . وبدون فلوس و بدون رصيد بالتلفون .


العربة الأولى انسرقت . و صار لي شهر أطلب عربة و هو ولا كأن الأمر يعنيه
قال لي بنطلب من النت . دخلت الموقع و خبرته أي وحده أبا . و للحين ما اشترى
و مااقدر أطلب بدون موافقته . عادة هو اللي يطلب و يدفع
طيب نروح أي مكان و نشتري . ما بقولكم انه يقول لا . أصلا هو لاهي بدنيته و أشك إنه يعرف بوجودي بحياته .
إيدي و كتفي صاير لهم شد من كثر ما أشل البنت . هو يعرف إني ما أتحمل أشل شيء
البنت بايد و الشنطة على كتفي .. رايحة رادة فيها سواء للحديقة أو العيادة أو المسجد
صح هي تمشي لكن كم بتتحمل . وكم بتم معاها تمشي حبة حبة .

بتقولون ليش ما هزأتيه . مليت و الله مليت
الله منزل علي صبر من عنده
وأعرف لو تكلمت بيطلعني غلطانه و بيستهزأ بكلامي . و بيقول : اسكتي
أمس رد من دوامه نام لين الساعة 10 ونص . بعدها كان بينام الساعة 12 و شي و يقولي حطيلي دوا
( مرهم الصدفية ) فقلت له : ما شبعت نوم
قال : حاسبيني بعد ، يلا اسكتي . قلتله خير إن شاء الله .
عشان جي ما بكلمه و ما بعتبره موجود
مع اني أتمنى ألاقي شي يقهره أكثر و يعرفه حدوده

زعلااااااااااااااانة على نفسي
كل مشاعر الحب / الاحترام / التقدير .. كانت سراب
كنت أظنها موجودة لكني مثل السكران اللي توه صحى و درى عن نفسه.



كل هذه الفضفضة لأسألكم

غدا صباحا لدي موعد أسنان ... ماذا أفعل ؟

هل أرسل له إن كان سيبقى معي فالعيادة فسأذهب و الا سألغي الموعد
هل أطلب منه تحديد الساعة اللتي سنخرج ، حتى أعرف كيف أجهز للغداء؟
وهل أخبره أن يشتري عربة على ذوقه ، وأني أن أذهب بابنته لأي مشوار قبل شراءها .و أني سأترك ابنتي عند أمه غدا وهو من سيخبرها .
و سأطلب منه مصروفاً
بالعادة لا يعطيني مقدار محدد . لكني آخذ من محفظته
لكن هذه الفترة يعلم أنه لا شي لدي و الأمر عادي بالنسبة له




تم تغيير العنوان ليتناسب مع المضمون