انا حاير ولا ادري وش اسوي
السلام عليكم ورحمة الله
انا حاير ولا ادري وش اسوي تكفون دلوني و قولو للي وش اسوي ، ابقولكم قصتي من البداية الي اليوم الحالي ونتم عاد افزعو معي و قولو للي وش اسوي:
طول عمري ونا صارف النظر عن موضوع الزواج ولا افكر فيه بالذات من بنات بلدي السعودية ، كل وقتي و جهدي كنت مكرسة لدراستي و عملي و الاهتمام بمي و اخواني الاصغر مني.
كنت دايم اقول انه ما فيه شي احسن من الحرية ، الزواج ازعاج و دوخة و وجع راس ماله داعي.
اخواني الاصغر مني زوجتهم و امي شريت الهاء بيت و امنت الهاء كل شي ممكن تحتاج له ، و رغم هذا ما فكرت في الزواج ، ولا اخفيكم ماني صغير في العمر ، انا الان انتصفت في العقد الثالث من عمري ، ولكن ما فكرت في الزواج.
اكون صريح معكم اكثر ما كنت اعتقد ان فيه بنت ممكن تملا على حياتي و تكون الامل و الحلم اللي طالماء بحثت عنه..............
انا مدري وش انا ابحث عنه ، انا مدري البنت هذي وش ممكن تكون او وشي مواصفاتهاء.
..................
لكن لله حكمة في كل شي ، فنا اللي كنت ارفض الزواج بكل انواعة و معانية ، صحيت من النوم في واحد من الايام و قلت لنفسي انا ودي اتزوج ، بس عندي مشكلة ، وشلون اتزوج من وحده انا ما اعرفها ، طبعاً ممكن اسأل عنهاء و ممكن امي تجيب للي كل اخبارها ، لكن انا اخاف اني افشل ، اخاف ما نتفق ، اخاف نختلف في الاراء ، انا عايشت تجربة الطلاق لمن انفصل ابوي عن امي ، انا عايشت احزان و الام امي و اخواني ، اخاف افشل و تتكرر المشكلة هذي معي ، لذلك انا ما كنت على استعداد اني اتزوج من بنت ما اعرفها ولو بالتلفون ، و الحقيقة هذا كان شرطي الوحيد ، ما كان عندي اي مواصفات ما كان عندي اي شروط ، انا بس كنت ابغاء اعرف البنت اللي بتزوجها ، انا ما ابغاء اشوفها ، انا ما ابغاء اطلع معهاء ، انا بس ابي اكلمهاء ابغاء اعرف هل هي الامل و الحلم اللي انا ابحث عنه او لا.
و بالفعل تكلمت معهاء عبر التلفون ، ارتحت الهاء ، و ارتاحت للي ، بعد ثلاث مكالمات معهاء اتفقناء انا وياها اني اتقدم لخطبتهاء .
اتصلت امي على امهاء و راحت شافتهاء و بعدين انا رحت و شفتهاء ، اكون صريح معكم انا ما كان يهمني شكلهاء الخارجي ، لان الشكل الخارجي عمره ما كان يهمني ، انا و بكل بساطته ارتحت الهاء و حبيتهاء فقط من الكلام معهاء على التلفون ، و رحت شفتهاء ، و ياالله ما كنت اتوقع ان الثقافة و العلم و الحكمة ممكن تجتمع مع الجمال ، اعتقد اني لقيت املي اعتقد اني لقيت حلمي.
انا من كان عمري 16 سنة كنت مع امي و بعيد عن ابوي ، ما كنا نتفق ، كنت كارهه الي حد كبير بسبب ما حصل لامي بسببة ، و مع هذا رحت له كما تقضي العادات عشان يجي معي و يخطبهاء للي بشكل رسمي من والدها.
ولكن للاسف ابوي رفض ، ليه رفض؟؟ لاني انا اللي اخترتها ، كان يقول للي اذا تبي تزوج انا اللي لازم اختار لك، ولكن كان سببه الرئيسي في عدم الموافقة هو لانه كان يرفض يكون له دخل في اي شي يخصني ، ليه يرفض؟؟ لاني كنت دايم اوقف مع امي قدام جبروته و طغيانه.
رفض ابوي ولا ما رفض ، انا ما استسلمت ورحت لم جدي ( ابو امي ) و جبته معي للخطبة ، و وافقو اهلها و الحمدلله بعدها بسبوعين تملكنا ، طبعاً ابوي قطع كل علاقة له معي بسبب اصراري على الزواج من من اختار ( هذا كان عذره طبعاً) ، لذلك رفض يساعدني باي شكل من الاشكال في تكاليف الزواج.
انا لو اني ما على ديون بعد ما شريت البيت حق امي كان ما احتجت له ولا احتجت لغيره ، لكن كان على ديون كاسره ضهري ، لذلك ما كنت مجمع شي ، فعشان اقدر ادفع المهر اخذت سياره بالتقسيط و بعتها ، و عشان اشتري الشبكة اخذت سياره ثانية بالتقسيط و بعتهاء و عشان اشتري جزء من الاثاث اخذت سياره ثالثه و بعتها و عشان اعتق بوية البيت و احط سراميك و ديكورات جبس في البيت حسب ما طلبت امها اخذت سياره رابعة بالتقسيط و بعتها.
و الان و بعد كل الديون هذي صار معاد يبقاء للي من راتبي شي ، فرحت و قدمت على وظيفة ثانية بالليل عشان اشتغل بايع في محل و استفيد من الراتب اللي باخذه من الوظيفة هذي لتغطية المصاريف اليومية بعد الزواج. صرت اطلع من وظيفتي الاولي و روح للبيت ابدل ملابسي و اروح للوظيفة الثانية ، و لين رجعت من الوظيفة الثانية احط راسي و انام ، ونا على الحال هذا سبعة ايام في الاسبوع.
.......................
بس الان عندي مشكلة ، مع كل اللي انا سويته و تدينته ، صرت طفران ولعاد صار عندي فلوس لهدية الصباحة و شهر العسل في اوربا حسب ما طلب مني ، ام البنت تقول بنتنا ما كانت مرمية في الشارع و ان الصباحة لازم ما تقل قيمتها عن الشبكة، طيب اذا كانت الشبكة بذيك القيمة انا وين اجيب قيمة الصباحة منه ، و ازود من كذا وين اجيب تكاليف شهر العسل و باقي الاثاث منه.
انا في حيره وش اسوي ، صرت افكر بجدية اني اهون عن الزواج و همومه ، وش اللي حادني على وجع الراس هذا كله.
تكفون قولو للي وش اسوي لاني مهموم ، ولعاد صرت اقدر انام الليل من كثر التفكير.
إبتعد عن التفاصيل الغير ضرورية
تعديل SuperFadi1
التعديل الأخير تم بواسطة superfadi1 ; 11-11-2004 الساعة 10:51 AM
09-11-2004, 09:19 PM
ضوابط المشاركة
العرض الشجري